Украинада орусиялык аскерлердин кербени аткылоого кабылганда Чувашиядан мобилизацияланган ондогон киши набыт болду. Idel.Реалии сайты жазганына караганда, окуя 29-октябрда болгон. КамАЗ жана УАЗ менен бараткан аскерлерди HIMARS ракеталары менен аткылашкан. Өлгөндөрдүн так саны белгисиз.
Чувашиялык дагы бир сайт майдандагы булактарына шилтеме менен бери дегенде 19 киши каза тапканын жана жарадар болгонун жазды. Жараат алгандардын бири Idel.Реалии сайтына курмандыктардын саны 47ге жетерин айткан.
Аймактын бийлиги бул кабарларды украин Телеграм каналдары уюштурган жана «коомдо дүрбөлөң жаратууну" көздөгөн "маалымат чабуулу" деп атады.
Орусиянын Коргоо министрлиги Чувашиядан согушка чакырылгандардын каза тапканы жөнүндө маалыматтарды комментарийлеген жок. Москва Украинадагы жоготууларын ачыкка чыгарбайт.
Украин бийлиги өткөн 24 саатта орус армиясынын аткылоосунан бери дегенде үч карапайым киши мүрт кеткенин, 10дон ашууну жарадар болгонун бейшембиде эртең менен билдирди.
Пхеньян акыркы үч айда Орусияга миллиондон ашуун артиллериялык дүрмөт жөнөткөнун Түштүк Кореянын чалгын кызматы билдирди. Алар тараткан маалымат менен парламент депутаты Ю Сан Бом бөлүшкөнүн "Свобода" радиосу жазды.
Анын айтымында, чалгынчылар Түндүк Корея Орусияга учактар жана кемелер менен ок-дары жиберген 10 учурду каттаган. Андан кийин жүк темир жол менен Украинанын оккупацияланган аймактарына, ал жерден майданга жеткирилип турганы маалымдалды.
Түштүк кореялык чалгын кызматынын баамында, миллион дүрмөт Украинада эки ай активдүү согуш жүргүзүүгө жетиштүү. Маалыматка караганда, бул үчүн Орусия Пхеньянга спутник технологияларын берген болушу мүмкүн. Май жана август айларындагы спутник учуруулар ийгиликсиз аяктаган.
Ю Сан Бом чалгынчылар Түндүк Кореянын лидери Ким Чен Ын Израил менен согушуп жаткан ХАМАС тобуна жардам берүү жолун издеп атат деп эсептерин кошумчалады. Ага чейин израилдик аскерлер жоочулар Түндүк Кореяда чыгарылган курал-жаракты пайдаланышканын тастыкташкан.
Расмий Сеул азырынча депутаттын айткандарын комментарийлеген жок. Түштүк Корея жана өнөктөштөрү Пхеньян Москваны ок-дары менен камсыздап, ал жактан ракета технологияларын алышы ыктымал деген камтамасын айтып келишкен. Орусияга колдоосун билдирип жүргөн Пхеньян каруу-жарак жөнөткөнүн танып жатат. Москва дагы муну моюнга алган эмес.
Сентябрда Ким Чен Ын Орусияда президент Владимир Путин жана коргоо министри Сергей Шойгу менен жолугушкан. Жакында Пхеньянга Орусиянын башкы дипломаты Сергей Лавров барып кетти.
АКШнын президенти Жо Байден республикачылардын Украинанын кызыкчылыктары эске алынбай, Израилге гана жардам берүү каралган мыйзам долбооруна вето коерун эскертти. Бул тууралуу Ак үй билдирди. Документ адегенде Конгресстин эки палатасынын кароосунан өтүүгө тийиш.
Президенттин администрациясынын Башкаруу жана бюджет бюросу белгилегендей, Израилге жана Украинага берилчү жардам бир пакетке камтылууга тийиш, аларды бөлүү улуттук коопсуздук үчүн «глобалдуу кесепеттерге алып келиши» ыктымал.
30-октябрда Өкүлдөр палатасындагы республикачылар Израилге 14,3 млрд доллар жардам берүүнү, бул үчүн АКШнын салык кызматын каржылоону кыскартууну сунуш кылышкан.
Палатанын жаңы спикери Майк Жонсон адегенде Израилге жардамды бөлүүнү, Украинаны өзүнчө талкуулоону жактарын айткан. Буга чейин Трамптын тарапташы катары белгилүү мыйзам чыгаруучу Киевге кошумча жардам берүүгө каршы добуш берип келген.
Демократтар республикачыларды "Израилге көмөктөшүү ишине жолтоо болууда" деп айыпташты.
Байден Конгресстен 106 млрд доллар бөлүүнү сураган. Анын теңинен көбү Украинага, калганы Израил, Тайван жана АКШ менен Мексика чек арасын коргоого жумшалмак.
Украина 31-октябрда өлкөнүн ар кайсы жериндеги 118 шаар, айыл-кыштактар чабуулга кабылганын билдирди. Быйыл мынча көп сандагы калк жашаган жерлерге сокку урулганы катталган эмес. Ички иштер министрлиги 10 облус аткыланганын шаршембиде маалымдады.
Ал эми Украина армиясынын Аба күчтөрү 1-ноябрга караган түнү орус аскерлери учкучсуз учактар жана Х-59 авиациялык ракета менен чабуул койгонун билдирди. Өлкөнүн борбордук жана батыш тараптарындагы маанилүү инфраструктурага жана аскердик жайларга сокку урулду. Маалыматта украин аскерлери 20 дрондун 18ин жана бир ракетаны атып түшүргөнү айтылат.
«Азаттыктын» украин кызматы жазганына караганда, Полтаванын облустук администрациянын башчысы Филип Пронин бир дрон Кременчуг шаарындагы мунай иштетүүчү заводго тийгенин билдирди. Жетекчи өрт өчүрүлгөнүн, алдын ала маалыматтарга ылайык эч ким жабыркабаганын, ишкана иштебей турганын айтты.
Хмельницкий, Кировоград, Полтава жана дагы бир нече облустарда сокку ыктымалдагын эскерткен сиреналар жаңырып турду.
Түнкү аткылоодон Харьков облусунда бир киши окко учканы, экинчиси жараат алганы украин Ички иштер министрлигинин маалыматында жазылган.
Донецкиде бир киши каза тапты, Херсондо экөө жараат алып, бирөө мүрт кетти.
Орусия 31-октябрдын отчетторунда куралдуу күчтөрү Бахмуттун айланасында ийгиликтүү чабуул койгонун билдирди.
Согуш шартында касташкан тараптардын маалыматтарын дароо текшерүү мүмкүн эмес.