АКШнын жана Европа Биримдигинин өкүлдөрү Украинанын Орусия менен тынчтык сүйлөшүүлөрү тууралуу талкууларды баштады. Бул тууралуу NBC News телеканалы Кошмо Штаттарындагы азыркы жана мурдагы эки таасирлүү аткаминерге шилтеме кылып жазды.
Ага ылайык, "айрым бир аялуу талкуулар" өткөн айда 50дөн ашык өлкө кирген Укранинаны коргоо боюнча байланыш тобунун жолугушуусунда талкууланган.
Аталган телеканалдын булактары тынчтык мунасына жетүү үчүн Киев эмнеден баш тарта алышы мүмкүн деген жагдайда сөз болгон. Ошол эле маалда НАТОго мүчө мамлекеттер Орусияын агрессиясын чектөө максатында Украинага "коопсуздуктун кайсы бир кепилдиктерин" сунуштоого даяр экенин билдирген.
NBC News каналынын билдиришинче, мындай талкуулар Вашингтон менен Брюсселдин согуш каатчылыкка кептелип, Киевге мындан ары керектүү жардам берилбей калат деген кооптонуулардан улам башталган.
Каналдын ырасташынча, АКШнын президенти Жо Байдендин администрациясы дагы Украинанын күчү мокоп баратат деп тынчсызданууда. Ошол эле маалда Вашингтон Орусиянын президенти Владимир Путин Украина менен сүйлөшүүгө баруу ниетин көрбөй жатканын белгилеген
АКШнын бийлик өкүлдөрү Украинаны тынчтык сүйлөшүүлөргө барууга көндүрүп жатканы тууралуу маалыматтарды четке кагып келет.
Буга чейин Кошмо Штаттарынын Улуттук коопсуздук кеңешинин басма сөз катчысы Эдриен Уотсон "сүйлөшүүлөр тууралуу кандай гана чечим болбосун, аны Украина кабыл алат. Биз өз эркиндигин, орусиялык агрессиядан эгемендигин коргоп жаткан Украинанын колдоону уланта беребиз", - деген.
Тынчтык сүйлөшүүлөрү тууралуу соңку маалыматтарга Киев менен Кремл комментарий бере элек.
Расмий Вашингтон 3-ноябрда Украинага көрсөтүлө турган жаңы аскердик жардамдын айлампасы тууралуу жарыялоого камданууда.
Бул тууралуу өз булактарына таянып Рейтер агенттиги кабарлады. Жалпы 425 млн долларды түзгөн бул жардамга дрондорго каршы күрөштө колдоно турган каражаттар жана абадан коргонуу системасынын тетиктери кирет. Андан тышкары NASAMS, РСЗО HIMARS сыяктуу зениттик-ракеталык комлекстерине караштуу жабдыктар да камтыларын агенттик жазды.
Бул Вашингтон Украинага көрсөтүп жаткан жардамдын 50-айлампасы. Буга чейинкисине Stinger зениттик ракеталары, танктарга каршы колдончу Javelin ракеталык комплекстери да кирген.
Орусия Украинага согуш ачкан 2022-жылдын февраль айынан бери Вашингтон Киевге 43,9 миллиард долларлык жардам жөнөттү.
Украинанын Куралдуу күчтөрүнүн башкы штабы тараткан билдирүүдө Орусиянын армиясы 3-ноябрга караган түнү Украинанын аймагына 38 учкучсуз аппарат жана бир Х-59 канаттуу ракетасы менен кол салганы жазылат. Украин аскерлеринин маалыматына караганда, 24 дрон жана бир ракета атып түшүрүлгөн.
Харьков облусунун полициясы билдиргендей, орус армиясы учурган он дрон аймактын жарандык инфратүзүмдөрүн бутага алды.
Харьков шаарынын мэри жана облус администрациясы эки дрондун соккусунан карапайым кишилер жашаган үйлөр, окуу жайдын имараты жана автоунаалар жабыркаганын кабарлашты. Жараат алгандар тууралу азырынча маалымат жок. Ошондой эле дрондор Украинанын батышындагы Львов облусуна чейин жеткени кабарланды.
Орусиянын Коргоо министрлиги соңку чабуул боюнча маалымат бере элек. Согуш маалында тараптардын билдирүүлөрүн көз карандысыз булактардан ырастоо мүмкүн эмес.
Кошмо Штаттарында Өкүлдөр палатасы Украинаны кошпой, Израилге гана 14,5 миллиард долларлык жардам берүүнү колдоду. Сенатта көпчүлүктү түзгөн демократтар буга каршы чыгып, эки өлкөгө тең жардам берилишин талап кылып жатат.
Буга чейин президент Жо Байден эгер бул документ Конгресстин эки палатасында тең колдоо тапса вето коерун эскерткен. Сенаттын спикери Чак Шумер аны добушка койбосун айткан.
Байден Конгресстен жалпы баасы 106 млрд долларга жеткен жардам берүүнү колдоого чакырган. Анда каражаттын басымдуу бөлүгүн Украинага жумшоо, калганын Израилге, Тайванга жана Мексика менен чек араны бекемдөөгө берүү каралган.
30-октябрда Өкүлдөр палатасындагы республикачылар Израилге 14,3 млрд доллар жардам берүүнү, бул үчүн АКШнын салык кызматын каржылоону кыскартууну сунуш кылган.
Палатанын жаңы спикери Майк Жонсон адегенде Израилге жардамды бөлүүнү, Украинаны өзүнчө талкуулоону жактарын айткан. Буга чейин Трамптын тарапташы катары белгилүү мыйзам чыгаруучу Киевге кошумча жардам берүүгө каршы добуш берип келген.