Еврокомиссия шаршембиде Орусиянын экономикасына каршы кезектеги 12-санкцияны киргизери күтүлүүдө. Анын ичинде Орусиянын алмазын экспорттоого да тыюу салынарын Евробиримдиктин тышкы саясат боюнча башкы комиссары Жозеп Боррел 13-ноябрда билдирди.
Жаңы документте мунай баасына таасир этүүчү чектөөлөр, экономиканын тармактарына жана айрым адамдарга карата жеке санкциялар салынары белгиленген.
Еврокомиссия документти шаршембиде колдоп берсе, андан кийин биримдикке мүчө өлкөлөрдүн макулдугун алуу зарылдыгын Reuters маалымдады.
Bloomberg агенттиги санкциялар Орусияда чыгарылган ширетүүчү жабдыктарды, химикаттарды жана башка аскердик максатта пайдаланылуучу технологияларды экспорттоого таасирин тийгизерин өткөн айда жазган. Агенттиктин маалыматында, Евробиримдик Орусияны программалык камсыздоого лицензиялык тыюу киргизиши, иштетилген металлдарды импорттоого, алюминий, курулуш материалдарын сатууга тыюу салышы мүмкүн. Чектөөлөр жалпысынан 5 млрд евролук товарга киргизилет.
Евробиримдик Орусиядан жылына орто эсепте 1.5 млрд евролук алмаз сатып алат.
Чектөөлөр маселеси мурда да көтөрүлгөн. Бирок кымбат баалуу таштар соодаланган негизги борбор - Бельгиянын каршылыгына тушуккан. Брюссель санкциялар алмаздын башка өлкөлөргө сатылышына алып келерин айтып, каршы чыккан.
Орусиянын алмазын сатып алууга санкцияны Евробиримдиктен кийин бриллиант базарынын 70% камтыган G7 уюмундагы өлкөлөр да киргизери айтылууда. Reuters жазгандай, уюмдагы өлкөлөрдө санкциялар январдан тартып күчүнө кириши ыктымал.
Украинанын Харьков жана Донецк облустарында айыгышкан салгылашуулар уланууда. Купянск, Бахмут жана Авдеевка багыттарында 70тен ашуун кагылыш болгонун украин куралдуу күчтөрүнүн Башкы штабы 13-ноябрда билдирди. Штаб аскерлери Бахмуттун түштүгүндө чабуулун улантып жатканын кошумчалады. Маалыматта каршы тарап Адвеевканы "курчоо аракетинен баш тартпаганы”, украин армиясы Мелитопол багытында алга жылуу операцияларын жүргүзгөнү айтылат.
Ал арада Херсон аймагынын аскердик администрациясы 12-ноябрга караган түнү шаарга урулган соккунун кесепети, Гончар атындагы облустук китепкана жабыркаганы тартылган видеону жарыялады. Имараттын сырты жана ичи жарым-жартылай талкаланды.
Куткаруучулар бир жарым саат өрт менен күрөшкөнүн облус администрациясынын башчысы Александр Прокудин Телеграм-каналга жазды. Анын айтымында, эч ким жабыркаган жок.
Кийинчерээк Прокудин шаардын Днепр районунда орус армиясынын соккусунан 64 жаштагы киши үйүнүн короосунда каза тапканын, анын аялы жарадар болгонун билдирди.
Далилдерге карабай, Орусия жарандык жайларды, калк жашаган райондорду бутага алганын танып келатат.
Жекшембиде Орусиянын Коргоо министрлиги украин аскердик буталарына сокку урулганын, Донецк, Запорожье жана Херсон аймактарында каршы тараптын чабуулдарынын мизи кайтарылганын маалымдаган.
Согуш шартында тараптардын маалыматтарын тактоо мүмкүн эмес.
Орусиянын мамлекеттик ТАСС жана РИА "Новости" кабар агенттиктери Коргоо министрлигине шилтеме менен Украиндагы аскерлер «Днепр дарыясынын чыгыш тарабына, артыкчылыктуу позицияларга жайгаштырылары» тууралуу маалыматты чыгарып, бир нече мүнөттөн кийин алып салышты.
«Свобода» радиосу адатта бул армия чегингенде колдонуларына көңүл буруп, мындай абал былтыр Харьков жана Херсондо байкалганын белгилейт.
Өчүрүлгөн маалыматта «Түзүлгөн кырдаалды баамдап, «Днепр» тобунун командачылыгы аскерлерди Днепрдин чыгышындагы артыкчылыктуу позицияларга которууну чечти. Кайра топтолгондон кийин айрым бөлүктөр башка багыттардагы кармаштарга тартылмакчы» деп жазылган.
Орус Коргоо министрлиги мекеменин басма сөз кызматы таратканы айтылган маалыматты «чагым» деп атады. Маалыматтын булагы көрсөтүлгөн жок. Бул тууралуу РБК жазды.
Акыркы жумаларда украиналык армия бир нече жерде Днепр дарыясынан Херсон облусуна өткөнү кабарланган. Талдоочулар алар плацдармын кеңейтүүгө жетишкенин айтып келишет.
Германиянын канцлери Олаф Шольц башында турган башкаруучу коалиция Украинага аскердик жардамды 8 млрд еврого чейин жеткирүүгө макулдугун берди. Бул тууралуу Reuters Берлиндин саясий чөйрөсүндөгү булагына шилтеме кылып жазды. Парламент колдоп берсе, Германиянын коргонуу чыгашасы өлкөнүн ички дүң продукциясынын (ИДП) 2,1% чейин көбөйөт. Бул НАТОго мүчө өлкөлөргө бекитилген чыгашалардын төмөнкү чегинен ашып түшөт.
Reuters маалымдагандай, социал-демократтар, "Эркин демократиялык партиясынын" жана Жашылдар партиясынын мүчөлөрү чыгашаны көбөйтүүнү келерки жылдын федералдык бюджетин талкуулаган учурда макулдашты. Маселени Бундестагдын бюджет комитети 16-ноябрда карайт.
Берлиндин аскердик жардамды көбөйтүү дымагын алгачкылардан болуп, ишембиде Bloomberg агенттиги өз булактарына таянып маалымдаган.
Bild am Sonntag гезити парламент мүчөсү Андреас Шварцтын: "Аскердик чыгашаны эки эсе көбөйтүү - туура жана маанилүү", - деген сөзү менен парламент комитети кошумча төрт млрд евро бөлүүнү бекитип берүүгө тийиштигин жазды. Шварц парламенттеги аскердик бюджетке жооп берет.
Коргоо министрлигинин өкүлү Бундестаг комитетинде маселе талкууланып бүтө электигин айтып, комментарий берүүдөн баш тарткан.
Германия - Украинанын Европадагы башкы өнөктөшү. Киевге берилген жардам боюнча өлкө АКШдан кийинки орунда турат.