Орусиянын Ички иштер министрлиги крым татар ырчысы жана актрисасы Жамалага (өзүнүн аты-жөнү Cусана Жамалидинова) издөө жарыялаганын “Медиазона” басылмасы мекеменин маалымат базасына таянып жазды.
Андагы маалыматка караганда, Жамалага орус армиясы тууралуу “фейктерди” таратканы үчүн кылмыш иши козголуп, ноябрь айында сыртынан орус соту камакка алуу чечимин чыгарган.
Буга чейин “Известия” басылмасы ырчыга Орусиянын аймагына 50 жылга кирүүгө тыюу салынганын жазган эле.
Орусия Крымды 2014-жылы аннексиялап алгандан кийин, Жамала 2016-жылы “Евровидение” ыр сынагын “1944” деген аталыштагы крым татарларынын депортациясы тууралуу ыры менен жеңген.
Орусия Украинага жапырт кол салгандан кийин Жамала эки баласы менен мекенинен чыгып кетүүгө аргасыз болгон.
Жамала 1983-жылы Кыргызстанда төрөлүп, кийин үй-бүлөсү менен Крымга көчүп кеткен.
Өткөн суткада фронтто 71 куралдуу кармаш болгонун Украинанын Куралдуу күчтөрүнүн Башкы штабы жекшембиде эртең менен билдирди.
«Орусиянын террористтик чабуулдарынан бейкүнөө элдин арасында өлгөндөр жана жарадар болгондор бар. Менчик үйлөр, жарандык жайлар жабыркады» - деп айтылат билдирүүдө.
Чернигов, Сумы, Харьков, Луганск, Донецк, Запарожье, Херсон жана Николаевск облустарынын 150дөн ашуун айыл-кыштагы артиллериялык чабуулга кабылган.
Лиман багытында орус армясы чабуул койсо, украин жоокерлери Бахмут багытында алардын мизин кайтарган. Украин армиясы Бахмуттун түштүгүндө контрчабуулун улантууда.
Орус армиясы Авдеевканы курчоого алууга аракеттенип, украиндер коргонууну кармап турганы Украинанын куралдуу күчтөрүнүн билдирүүсүндө белгиленген.
Авдеевкага чабуулду орус күчтөрү 10-октябрда баштап, алгачкы күндөрү чоң жоготууларга учурганы маалым болгон. Баш кеңсеси Вашингтондо жайгашкан Согушту иликтөө институту орус армиясы жүздөн ашуун аскеринен жана жүздөн көп брондолгон техникасынан ажыраганын кабарлады.
2022-жылы Орусия Украинага согуш ачкандан бери кеминде 37 миң орусиялык аскер набыт болгонун, алардын 4,5 миңдейи мобилизация аркылуу армияга тартылгандар экенин “Медиазона” басылмасы менен Би-Би-Синин орус кызматы аныктаган.
Украинанын куралдуу күчтөрү Орусиянын 20 дронунун 15ин атып түшүргөнүн билдирди. Москванын мэри Сергей Собянин Москва облусунда дрон атып түшүрүлгөнүн жарыялады.
Украинанын Куралдуу күчтөрүнүн Аскер-аба күчтөрүнүн командачылыгынын маалыматы боюнча, Киев, Чернигов жана Полтава шаарларына сокку урулду. Киев шаардык аскердикк администрациясынын башчысы Сергей Попконун айтымында, түнү Киевдин үстүндө жана борбордун четинде онго жакын дрон жок кылынган.
Киев облусунда түнкү дрон чабуулунан улам инфраструктуралык объектиге зыян келтирилгенин РБК-Украина жергиликтүү аскердик администрациясына таянуу менен билдирди. Баштапкы маалыматтарга караганда, жабыркагандар жок, өрт өчүрүлдү.
Дрон чабуулу, аскерлердин ийгилиги, Зеленскийдин билдирүүсү
Украианын Энергетика министрлиги Фейсбуктагы расмий баракчасы аркылуу Орусия ишемби күнү Shahed дрону менен чабуул койгон Одессадагы "энергетикалык инфраструктуранын объектиси" мунай базасы болгонун билдирди.
Чабуулдун натыйжасында электр түйүндөрү иштен чыгып, 1500 адам жана 416 калктуу пункт жарыксыз калган. Электр жарыгы Запорожье, Донецк жана Чернигов облустарында өчкөн.
Орусия 18-ноябрга караган түнү Киев, Одесса жана Хмельницкий облустарына "Шахед" жанкечти дрондору менен кол салган. Украинанын аба күчтөрү Курск облусунан учурулган 38 дрондун 29ун атып түшүргөнүн ырастады.
Киевдин мэриясы шаарга учурулган 10 дрондун баары атып түшүрүлгөнүн билдирди. Украин армиясынын маалыматында Одесса облусунда бир учаксыз учак энергетикалык инфраструктуранын объектисине келип түшкөндө бир адам жараат алды.
Одесса облусунун администрациясынын башчысы Олег Кипер ишкана жабыркап, жараат алган адам ооруканага жаткырылганын тастыктады.
Херсон облусунда өткөн сутка ичинде атышуулардан бир адам каза таап, үчөө жараат алды. Облустук аскердик администрациясынын башчысы Александр Прокудиндин айтымында, снаряддар облустун калктуу конуштарынын турак жай кварталдарына жана Берислав районундагы маданият үйүнө тийген.
Өз кезегинде Орусиянын Коргоо министрлиги Украинанын учкучсуз учагы Брянск облусуна кол салууга аракет кылганын билдирди.
Белгород облусунун губернатору Вячеслав Гладков ишемби күнү эртең менен Телеграм- каналында 17-ноябрда аймактагы калктуу пункттарга артиллериядан жана минометтордон 40тан ашык ок атылганын, бир нече айылга дрондор кол салганын жазды. Гладков аткылоодон жабыркагандар жана кыйроолор жок экенин белгиледи.
Украин тарап азырынча мындай билдирүүгө комментарий бере элек.
17-ноябрда Украинанын куралдуу күчтөрүнүн Башкы штабы Днепрдин сол жээгиндеги плацдармдарды ээлеп алганын расмий билдирген.
Анда аскерлер Херсон облусунда бир катар аракеттери ийгиликтүү болгонун кабарлашкан.
"Эрктүүлүк жана адискөйлүктүн арты менен украин деңиз күчтөрү башка бөлүктөр менен тыгыз кызматташуусунун негизинде бир нече плацдармда позициясын бекемдеди", - деп айтылат Деңиз күчтөрүнүн маалыматында.
Буга чейин Батыш аналитиктери украин күчтөрү Днепрдин сол жээгиндеги плацдармдарды аларын билдирген. Украин президенти Владимир Зеленский аскерлеринин бул ийгилигин өзүнүн Телеграм-каналына жазды.
Зеленский ушул эле күнү Израилдин ХАМАС куралдуу тобу (АКШ менен Европада террордук деп табылган) менен согушу Батыш коомчулугунун көңүлүн Жакынкы Чыгышка бурганын белгиледи. Анын айтымында, бул жагдай Украинага өтө керектүү 155-миллиметрлик артилериялык снаряддардын келишин жайлаткан.
Bloomberg агенттиги билдиргендей, Зеленский журналисттердин алдында сүйлөп жатып "бул боло берчү көрүнүш, ар бирөө биз сыяктуу жашоого умтулуп жатат" деп айткан. Анткен менен ал Батыш өнөктөштөрү менен Украинага аскердик жардамды көбөйтүүнү сүйлөшүп жатканын билдирген. Украин президенти аларды өлкөсү аскердик аракетти кышында да өткөрө турганына ынандырууга аракет кылууда.
Украинага жардам берүү маселесинде АКШда Байдендин администрациясы менен Өкүлдөр палатасындагы республикачыл көпчүлүк ортосундагы келишпестик чыккан. Алар бул маселеде эки башка көз карашты карманышууда. Politico басылмасы республикачылардын көпчүлүгү Киевге кошумча берилчү каражатты Латын Америкасы аркылуу келген миграция агымына каршы күрөшүү үчүн түштүк чек араны бекемдөөгө жумшоого чакырууда.