25-ноябрга караган түнү Орусиянын Киевди аткылоосунан беш адам жараат алды, бирөө 11 жаштагы бала.
Бул тууралуу Киевдин мэри Виталий Кличко Телеграм-каналына жазды.
Мэрдин маалыматында, абадан чабуул тууралуу эскертүү алты саатка созулду. Бул аралыкта орусиялык дрондордун аткылоосунан Соломен районунда бала бакча өрттөнүп, үйлөрдүн айнектери күбүлүп түшкөн. Беш кабаттуу үйдө камалып калган эки аялды куткаруучулар чыгарган. Дрондун сыныгы ачык жерге кулап, өрт чыккан.
Ушундай эле дрон сыныктары Печора, Подольск райондорунда ачык жерге, ал эми Днепропетровск жана Голосеев райондорунда көп кабаттуу үйгө түшкөн.
Учурда куткаруу иштери жүрүп жатат.
Днепропетровск районунда беш киши жабыркаган.
Украин аскерлери 25-ноябрга караган түнү Орусиянын дрон чабуулу өзгөчө катуу болгонун белгилешти. 75 дрондун 71и атып түшүрүлдү.
60 чакты дрон Киевге багытталган. Шаар тургундары жана маалымат каражаттары да чабуул алты саатка созулганын маалымдашты. Чабуулдун натыйжасында шаардагы 77 көп кабаттуу үй жана 120 мекеме электр жарыгы жок калган.
Украин президенти Владимир Зеленский чабуул Голодомордун 90 жылдыгына туш келгенин белгиледи.
Киевге расмий сапар менен келген Латвиянын президенти Эдгар Ринкевичс бомбадан коргонуучу жайда түнөгөнүн, сүрөт таңкы саат 5те тартылганын Х социалдык тармагындагы баракчасына жазды.
Орусия Киевге чабуулун комментарийлеген жок.
Аскердик талдоочулар акыркы сутканы эске албаганда Орусия акыркы бир нече айдан бери Украинага ракета менен жапырт чабуул койбогонун, аны масштабы чоң чабуулга даярдап жатканын айтышууда.
Орус өкмөтү киргизген өзгөртүүгө ылайык, 2024-жылдан тарта аскерде кызмат өтөөгө 18 жаштан 30 жашка чейинки эркектер чакырылат. Мурдагы чек 27 жашка чейин болчу.
Өкмөттүн бул токтому быйыл жайында Мамдума тарабынан кабыл алынып, президент кол койгон федералдык мыйзамды ишке киргизүү үчүн зарыл экени айтылууда. Баштапкы долбоордо аскерге чакыруу курагын 18 жаштан эмес, 21 жаштан деп өзгөртүү да сунушталган. Бирок экинчи окууда сунуш өткөн эмес. Мамдуманын коргонуу комитетинин башчысы Андрей Картаполов мунун себебин демографиялык кырдаалдан улам аскерге чакырылган орусиялыктардын саны азайып кеткени менен түшүндүргөн.
Орусия Украинага кол салгандан кийин орус өкмөтү аскердик кызматка байланыштуу мыйзамдарына бир топ өзгөртүүлөрдү киргизди. Ага ылайык, жашы жеткени үчүн чакырылган жоокерлер акча үчүн кызмат өтөө келишимин түзө алат.
Аскер комиссариатына өз учурунда келбеген жарандарга айып пул суммасы 3 миң рублден 30 миң рублге көтөрүлгөн. Абактарда отургандарды аскердик каттоого алуу боюнча өзгөчө режим киргизилди. Мурда аларга аскерде кызмат өтөө укугунан ажыратылган.
Украин президенти Владимир Зеленский Орусиянын 147 жаранын жана 303 ишканасын "кара тизмеге" киргизүү тууралуу Улуттук коопсуздук кеңешинин чечимин жактырды. Санкциялык тизмеге Орусиянын мурдагы финансы министри, учурда "Яндекстин" корпоративдик өнүгүү боюнча кеңешчиси Алексей Кудрин жана "Роснано" ишканасынын мурдагы жетекчиси Анатолий Чубайс да киргизилген. Ал Украинага согуш ачылгандан кийин Орусиядан кеткен.
.
Кеминде төрт кишини өлтүргөнү үчүн айыпталып, каннибализм боюнча 22 жылга соттолгон Сахалин облусунун тургуну Денис Горин Украинадагы согушка аттанганы маалым болду.
Бул тууралуу "Сахалин против войны" Телеграм-каналы жазды.
Ушу тапта Горин орточо деңгээлдеги жараат алып Түштүк Сахалиндеги ооруканада жатканын күбөлөрдүн бири "Сибирь.Реалии" сайтына билдирген.
Горин 2003-жылы адам өлтүрүү жана мыкаачылык беренелери менен он жылга кесилген. Жети жылдан кийин "үлгүлүү тартиби" үчүн шартуу түрдө мөөнөтүнөн мурда эркиндикке чыгарылган.
2012-жылы бир тууганы Евгений Горин менен адам өлтүрүүгө айыпталып камалган. Ошол эле жылы анын колунан төрт киши өлгөнү маалым болгон. Тергөөнүн версиясына караганда, ал 2010-жылы бир адамды өлтүрүп, этин жеген. Анда Горин 22 жылга кесилген.
Бир ай мурда Гориндин социалдык тармактардагы баракчасына "Z" деген жазуусу бар аскердик форма кийип турган сүрөтү жарыяланган.
Украинада согуш башталгандан бери Орусия оор кылмыш үчүн соттолгондорду да бошотуп, фронтко жөнөтүп келет. Алардын колунан каза тапкандардын жакындары буга каршы ар кандай акцияларды өткөргөнү менен, эч кандай жыйынтык чыга элек.
Журналисттердин эсебинде, Орусиянын президенти Владимир Путин адам өлтүргөнү үчүн соттолгон 17 кишиге ырайым берген. Алардын баары Украинадагы согушка катышып, үйлөрүнө кайткан. Айрымдары жаңы кылмыштарды жасаганы да маалым болгон.