Украинанын президенти Владимир Зеленский Батыш өлкөлөрүн согуш башталганда Орусиянын чет жакта эсеби жабылган 300 млрд долларлык активин Киевге берүүгө чакырды. Зеленскийдин пикиринде, бул Орусияны "агрессиясы үчүн кун төлөткөн" адилеттүү кадам болмок.
"Бул дүйнөдөгү потенциалдуу агрессорлорго туура белги болмок: башка өлкөгө кол салуу дивиденд алып келбейт, агрессор акыр-аягында кун төлөөгө тийиш" деп жазган Зеленский Х социалдык түйүнүндөгү баракчасына.
Буга чейин британиялык Financial Times гезити Батыш өлкөлөрү орусиялык активдерди Украинанын пайдасы үчүн конфискация кылуу жолун караштырып жатканын жазган.
АКШ жабык өткөн акыркы сүйлөшүүлөрдө орусиялык активдерди конфискациялоо керек деген позицияны карманганы айтылууда. "Чоң жетинин" жыйындарында АКШ активдерди конфискациялоо жолун "эл аралык укуктун негизинде" тапса болоруна ынандырган.
"Чоң жетинин" мүчөлөрү жана башка мамлекеттер Орусиянын агрессиясын токтотуу үчүн жооп чараларды көрө алат" деп жазылган АКШ өкмөтүнүн гезит таанышкан документинде.
Бул маселе Орусиянын Украинага басып киргенинин эки жылдыгына карата февралда өтө турган "Чоң жетинин" жолугушуусунда талкууланышы мүмкүн. Бул сүйлөшүүгө Украинага бериле турган 100 млрд доллардык жардамдын башы ачылбай турганы себеп болууда: АКШ Конгресси Киевди 2024-жылы каржылоо чечимин кабыл ала элек, Венгриянын премьер-министри Виктор Орбан 14-декабрда өткөн Евробиримдиктин саммитинде Украинага жакынкы жылдары бериле турган 50 млрд евролук жардамды бөгөттөдү.
Москва өз кезегинде орусиялык активдер конфискацияланса, жооп болорун айтууда.
- 2022-жылы февралда Украинага согуш ачкандан кийин Орусиянын Борбордук банкынын четтеги 300 млрд долларлык резервинин эсеби жабылган.
Орусиянын Коргоо министрлиги аннексияланган Крымдын үстүнөн төрт ракета жок кылынганын билдирди. Мекеме чабуул 6-январга караган түнү болгонун, ошол маалда бир сааттай Крым көпүрөсүндөгү кыймыл токтулганын маалымдады.
Украинага ыктаган Телеграм-каналдар Евпатория жана Орусия колдонгон "Саки" аскердик аэродрому жайгашкан Новофёдоровка райондорунда жарылуулар болгонун жазышты.
Украинанын Аскер-аба күчтөрүнүн кол башчысы Николай Олещук Телеграм-каналына украин жоокерлери аталган аэродромдогу командалык бекетке чабуул жасаганын жазды.
Москва бул маалымат тууралуу комментарий берген жок.
Орусиянын Коргоо министрлиги 5-январда дагы Крымга чабуул жасалып, он ракета атып түшүрүлгөнүн, ондогон дрон жок кылынганын билдирген. Николай Олещук бул аскердик операцияда Севастополдун жанындагы орусиялык армиянын командалык пункту чабуулга алынган айтып, украин учкучтарына алкыш жарыялаган.
Согуш маалында бул маалыматтарды бейтарап булактардан тактоо мүмкүн эмес.
Орусия аннексиялап алган Крым жарым аралына 4-январда жасалган чабуулдун натыйжасында орус аскерлеринин командалык пункту гана талкаланбастан, жарым аралдын өзүн коргоо системасына да олуттуу зыян келтирилген. Бул тууралуу бүгүн 5-январда украин аскерлери билдиришти.
«Чынында өтө олуттуу күжүрмөн иш аткарылды», — деп айтты Украинанын Куралдуу күчтөрүнүн маалымат кызматынын өкүлү Наталья Гуменюк.
Анын айтымында, бул орус аскерлерине өзүнүн коргонуу системасын кайра карап чыгууга олуттуу түрткү боло турган чабуулдардын биринчиси эмес.
4-январда Украина Крым жарым аралындагы Севастополь аймагына жакын жерде орус аскерлеринин командалык байланыш пунктуна сокку урганын кабарлаган.
Севастополдун Москва дайындаган губернатору Михаил Развожаев шаар «соңку кездеги эң оор чабуулга кабылганын» билдирген. Ал эми Орусиянын Коргоо министрлиги Крым жарым аралында абадан коргонуу системалары Украинанын 10 ракетасын атып түшүргөнүн маалымдаган.
Орусия Украинанын Крым жарым аралын 2014-жылы аннексиялап алган, 2022-жылдын февралында Украинага толук масштабдуу согуш ачкан.