Украинанын президенти 10-январда Балтика мамлекеттерине болгон күтүүсүз сапарынын алкагында Литванын баш калаасы Вильнюска барды.
Бул тууралуу ал социалдык тармактар аркылуу билдирди.
"Эстония, Латвия жана Литва – биздин ишенимдүү досторубуз жана принципиалдуу өнөктөштөрүбүз. Бүгүн мен Вильнюска келдим, андан ары Таллин менен Ригага барам”,-деп жазды Зеленский X социалдык түйүнүнө.
Украин президенти бул өлкөлөрдүн жетекчилери менен коопсуздук, Киевдин Евробиримдик менен НАТОго интеграциясы, радиоэлектрондук күрөш жана дрондор тармагындагы кызматташтык тууралуу маселелерди талкууларын кошумчалады.
Ал арада Орусиянын армиясы 9-январда Украинанын Харьков облусун аткылоону улантты. Ракеталык чабуулдан Харьков шаарындагы балдардын саламаттык борбору талкаланганын облус жетекчиси Олег Синегубов жазды.
Маалыматка караганда, орус күчтөрү C-300 ракеталык комлекстеринен сокку урган. Андан тышкары соңку бир суткада орус армиясынын аткылоосунан Херсон облусунда эки киши жараат алганы кабарланды.
Жергиликтүү бийлик тараткан маалыматка ылайык, аткылоолордон банк, завод, билим берүү жайы жана карапайым тургундардын үйлөрү жабыркаган. Орусиянын Коргоо министрлиги адатта аскердик гана жайларды бутага алганын билдирип, карапайым тургундардын үйлөрүнө жасалган чабуулдарды танып келет.
Соңку суткада фронтто 67 жерде кагылышуу болгонун 9-январда Украинанын Куралдуу күчтөрүнүн Башкы штабы билдирди.
«Душман биздин жоокерлер жайгашкан жерлерге жана калктуу пункттарга жалпысынан 55 ракеталык жана 22 авиациялык сокку урду, жапырт аткылоочу реактивдүү системалардан 35 жолу аткылоо болду», – деп айтылды мекеменин маалыматында.
Башкы штабдын кабарлоосуна караганда, Купянск багытында украин аскерлери Харьков облусунун Синьковка аймагында беш чабуулдун мизин кайтарды, ал эми Авдеевка аймагында орус аскерлеринин бул тилкени курчоого алуусуна жол бербөө аракетин улантышты.
Донецк облусунда жалпысынан 27 соккуга бөгөт коюлганы, Украинанын ракеталык аскерлеринин бөлүктөрү душмандын ок-дары сактаган эки жайын бутага алганы маалымдалды.
Өлкөнүн Куралдуу күчтөрүнүн түштүктөгү спикери Наталья Гуменюк 9-январга караган түнү орус аскерлери көптөн бери алгачкы жолу Украинанын аймагына Shahed жанкечти дрондорун учурбаганын, буга аба ырайы себеп болгонун айтты.
Орусия Украинага 2022-жылдын февралында кол салган. Москва коңшу өлкөгө басып киргенин "атайын аскердик операция" деп атап келет.
Украинанын дээрлик бардык аймагында 8-январдын түнү жана эртең менен абадан айгай салынды. Украин армиясы Орусия ракетанын ар кандай түрү менен чабуул койгонун билдирди.
Кривой Рог, Запорожье, Днепр, Харьков жана Хмельницкийде жарылуулардын үнү угулду. Анын кесепети тууралуу азырынча расмий маалымат жок.
Жергиликтүү басылмалар Кривой Рогдо соода борбору олуттуу зыян тартканын жазышты. Запорожьеде калктуу конушка урулган соккудан эки киши жабыркаганын, аймактын бир бөлүгүндө электр жарыгы өчкөнүн облустук админстрациянын башчысы кабарлады.
Харьковго бери дегенде төрт сокку урулганын, өндүрүш кампасында өрт чыкканын облустун жетекчиси Олег Синегубов маалымдады.
Москва Украинага урулган соккулар тууралуу комментарий берген жок. Орусиянын Коргоо министрлиги 8-январда эртең менен Белгород облусунун үстүнөн С-200 ракетасынын мизи кайтарылганын, оккупацияланган Донецк облусунда сегиз дрон жок кылынганын билдирди.
7-январга караган түнү орус күчтөрү Украинага үч С-300 ракетасы, «Шахед» дрондору менен чабуул койду. Украинанын Куралдуу күчтөрү 28 дрондун 21ин абадан коргонуу системасы атып түшүргөнүн билдирди.
Днепр шаарында 12 киши жараат алды. Жекшембиге караган түнкү чабуул масштабы жагынан буга чейинкилерге салыштырмалуу чакан болгону менен Орусия Украинанын жарандык жайларын бутага алып жатканынын дагы бир далили экенин көрсөттү.
Украин аба күчтөрүнүн басма сөз катчысы Юрий Игнат жергиликтүү телеканалга «каршылаштар майданга чукул Херсон дана Днепропетровск облустарына чабуул койгонун» айтты.
Орусия бул чабуулдар тууралуу комментарий берген жок.
Соңку эки аптада Орусия Украинанын аймактарын 300гө чукул ракета жана 200дөн ашуун учкучсуз аппарат менен аткылап, карапайым элдин жүрөгүнүн үшүн алууга аракеттенди.
29-декабрда украин шаараларына 120дан ашуун ракета атылып, кеминде 44 кишинин өмүрү кыйылды, алардын отузу баш калаада набыт болду.
2022-жылы февралда Орусия Украинага ар тарабынан басып киргенден бери Украинанын абадан коргонуу системасы кыйла күчтөндү. Орус күчтөрү учурган дрон, ракеталарды байкоо системасы жакшырды.
Өткөн аптада АКШнын расмийлери Орусия Түндүк Кореядан алган баллистикалык ракеталарды украин шаар-кыштактарына абадан сокку урганга колдоно баштаганын билдирген.