24-январда жергиликтүү убакыт боюнча саат 11де Орусияда украиналык согуш туткундарын айырбаштоо үчүн салып бараткан учак кырсыкка кабылганын Орусиянын Коргоо министрлиги билдирди.
Мекеменин маалыматына караганда, окуя Белгород облусунда болду. Ил-76 учагынын ичинде украиналык 65 туткун аскер жана Орусиянын тогуз жараны (экипаждын алты мүчөсү жана коштоп бараткан үч киши) бараткан.
Белгород облусунун губернатору Вячеслав Гладков «Корочанский районунда транспорттук учак кыйрады. Ал калктуу пункттан алыс эмес жердеги талаага кулап түштү. Ичиндегилердин баары каза болду», - деп Telegram аркылуу билдирди.
Жергиликтүү басылмалар жарыялап жаткан видеолордон жана сүрөттөрдөн кулап бараткан учактан кийинки жарылууну, түтүн чыгып жаткан жерди аскер кызматкерлери курчап турганын көрүүгө болот.
Киев Москва менен согуш туткундарын алмашууну пландаганын «Эркин Европа/Азаттык» радиосуна Украинанын Башкы чалгын башкармалыгынын өкүлү Андрей Юсов билдирди.
«Бүгүнкүгө пландалган алмашуу азырынча боло электигин айта алам», – деди ал.
Юсов Орусиянын расмий органдарынын Белгород облусунда кырсыкка учураган Ил-76 аскердик-транспорттук учагында украиналык туткундар баратканы тууралуу билдирүүлөрү азыр текшерилип жатканын айтты.
Украинанын согуш туткундарынын маселеси боюнча координациялык штабы өлкөнүн тийиштүү мекемелери бардык маалыматтарды териштирип жатканын кабарлады.
Жогорку Раданын адам укуктары боюнча ыйгарым укуктуу өкүлү Дмитрий Лубинец журналисттерди жана украин жарандарын «шашылыш тыянак чыгарбай коё турууга, расмий гана маалыматтарды угууга» чакырды.
«Мен окуянын бардык деталдарын териштирип, тактап, анализдеп жатам… Душман айлакер. Орусия украин коомчулугун дүрбөлөңгө салыш үчүн өтө оор ыкмыларды колдонушу ыктымал экенин баарыбыз билебиз. Чагымга алдырбагыла», – деп жазды ал Telegram баракчасына.
"Украинская правда" жана "РБК-Украина" агенттиктери өз булактарына таянып, учакты украин аскерлери атып салганын жазды. Ишенимдүү булак журналисттерге кулаган Ил-76 учагы туткундарды эмес, Харьков облусун аткылоо үчүн С-300 ракеталарын ташып бараткан болушу "ыктамал" экенин айткан.
"Мэш" телеграм-каналы учакты Украинанын куралдуу күчтөрү "Пэтриот" ракеталык комплексинен атканын жазды. Телеграм-канал билдиргендей, буга чейин борт туткундарды жеткирип, Белгороддун жабык аэропортунан ээн-эркин учуп-конуп жүргөн.
Кремль Коргоо министрлигинин маалыматына комментарий бере элек. Орус президентинин басма сөз катчысы Дмитрий Песков «кабарды жаңы укканын " айтып чектелди.
Азырынча Киев окуя боюнча расмий маалымат тарата элек.
23-январда эртең менен Орусия Украинанын бир катар аймагына, анын ичинде борбор калаа Киевге баллистикалык ракета менен жапырт чабуул койгонун украин бийлиги билдирди. Жалпы өлкө аймагында абадан эскертүү берилди. Саат 14кө карата каза болгондор беш адам экени кабарланды.
Киевде жыйырмадай киши жараат алганы, машиналар, көп кабат үйлөрдөгү айрым батирлер талкаланганы, Харьковдо үч киши каза болгону, дагы 11 киши ооруканага жеткирилгени, Павлоградда бир кишинин өмүрү кыйылганы маалымдалды.
Орусия бул чабуулдарга тиешеси жоктугун айтууда, Кремлдин басма сөз катчысы Дмитрий Песков бул «Донецкидеги базарга жасалган чабуулга жооп эмес» деп айтты.
Өткөн жекшемби күнү Украинанын Донецк аймагынын Орусия оккупациялап алган бөлүгүндө базарда жарылуу болуп, 27 киши каза болгон, дагы 25 киши жараат алган.
Украина бул окуяга тиешеси жоктугун билдирген.
2022-жылы февралда Орусия Украинага каршы толук масштабдуу согуш баштаган, муну өзү «атайын операция» деп атап келет.
Украинанын президенти Владимир Зеленский атыштагы өнөктөштөр менен бир катар жаңы, эки тараптуу келишимдер даярдалып жатканын, февраль айында аларга кол коюлушу күтүлүп жатканын билдирди.
Орусия 2022-жылдын февраль айында Украинага басып киргени Батыш өлкөлөрү Украинага аскердик жана башка жардам көрсөтүп келет. Согуш үчүнчү жылга созулуп, соңку 12 айда фронтто чоң өзгөрүүлөр болбой, жардам маселесинде АКШда каршылык күчөгөндүктөн соңку айларда өлкөгө зарыл каражат, жабдуулар жай келип жатат.
Зеленский бир нече жумадан бери өнөктөштөр менен сүйлөшүп, көбүрөөк саясий жана аскердик колдоо алууга аракет кылууда. Ал Орусиянын кышкы аба соккуларынын көбөйүшү жана Москванын Украинанын чыгышындагы жай, бирок катаал чабуулу Киевдин абадан жана жерден коргонуусун күчөтүү зарылдыгын көрсөтүп жатканын кайталап келет.
Январдын башында Киевдин ишенимдүү колдоочуларынын бири болгон Британия келерки жылы Украинага колдоосун 2,5 миллиард фунт стерлингге (3,19 миллиард долларга) жеткирерин билдирген.
Франциянын президенти Эммануэл Макрон февралда Украинага эки тараптуу коопсуздук кепилдиги боюнча келишимди аягына чыгаруу үчүн барарын билдирген. Ага ылайык Париж заманбап курал-жарактарды, анын ичинде алыскы аралыкка учуучу канаттуу ракеталарды жеткирери айтылган.
Орусия Москва жана Ленинград облустарында дрондор кармалганын ырастады
Орусиянын Коргоо министрлиги Украинага кол салгандан бери алгачкы жолу 18-январда Ленинград облусунда дрон кармалганын расмий кабарлады. Санкт-Петербургдун губернатору Александр Беглов «Ленинград облусундагы инцидентке байланыштуу» жабыркагандар жок экенин, тергөө иштери жүрүп жатканын билдирди.
Жергиликтүү маалымдоо каражаттары учкучсуз учактан үчөө болгонун, экөө Фин булуңуна, үчүнчүсү Санкт-Петербургдагы деңиз портуна жакын мунай терминалынын аймагына түшкөнүн, ал жакта жарылуу болуп, 130 чарчы метр жерде өрт чыкканын жазышты.
Коргоо министрлиги Москва облусунда да өткөн түнү дрон атып түшүрүлгөнүн маалымдады. Москванын мэри Сергей Собянин окуя Подольск аймагында болгонун, баштапкы маалымат боюнча, жабыркагандар жок экенин айтты.
Түшкө маал Москванын «Внуково» аэропорту да убактылуу жабык турду, учууга жана конууга тыюу салынып жатты, себеби, мамлекеттик органдар билдиргендей, түнкүсүн Москва облусунда учкучсуз учак атып түшүрүлгөн.
Украина менен чектешкен Белгород облусунда 10 ракетаны атып түшүрүшкөнүн жергиликтүү бийлик башчысы Вячеслав Гладков билдирди. Аталган аймак буга чейин да аткылоого кабылган. Орус тарап бул үчүн Украинаны айыптоодо. Украина эч кандай расмий комментарий бербей келет