Украинанын Одесса шаарында орус күчтөрүнүн дрон чабуулунан кеминде 10 киши набыт болду. Алардын арасында төрт жана сегиз айлык эки ымыркай, үч жашка чыга элек наристе бар. Украин президенти Владимир Зеленский Батыштын жардамынын кечигиши жай тургундар арасындагы жоготууга жол ачып жатканын айтты.
Ымыркайлардын өмүрүн алган чабуул
Жекшемби күнү Украинанын Одесса шаарындагы бир тарабы кыйрап калган тогуз кабаттуу үйдүн урандыларынын алдынан дагы эки кишинин сөөгү табылды.
Украинанын Өзгөчө кырдаалдар кызматы алар сегиз айлык ымыркай жана анын апасы экенин билдирди.
“Апасы сегиз айлык ымыркайын калкалоого аракет кылган. Коргогусу келген. Аял баласын бекем кучактаган абалда табылды", - деп айтылат билдирүүдө.
Ушуну менен ишембиге оогон түнү орус күчтөрү учурган "Шахед" дрондорунан кыйраган турак жайдын он тургуну, анын ичинде үч наристе каза тапканы ырасталды.
Буга чейин украин бийлиги Одессадагы чабуулда өлгөндөрдүн арасында Марк аттуу үч жашка чыга элек наристе жана Тимофей аттуу төрт айлык ымыркай бар экенин тактаган. Тимофейди да анын апасы Анна Гайдаржинин сөөгүнүн жанынан табышкан.
Маркум келиндин иниси Андрейдин айтымында, дрон чабуулу эжеси ымыркайы менен көп кабаттуу үйдүн кыйрап калган бурчундагы уктоочу бөлмөдө жаткан учурда болгон жана жездеси Сергей Гайдаржи кызы менен качып чыгууга үлгүргөн.
"Ал кантип чыкканын деле эстей албайт. Кызын колуна алган бойдон сыртка чуркап чыгыптыр. Анан кайра кайтып барып, уктоочу бөлмөнүн эшигин ачса, бөлмөнүн эч жери калбаптыр", - деп айтып берди Андрей "Франс пресс" агенттигине.
Украин президентинин балдар укугу боюнча мурдагы атайын өкүлү Николай Кулеба Анна Гайдаржинин ымыркайы менен түшкөн сүрөтүн жарыялап, "энесинин койнунда тынч уктап жаткан төрт айлык ымыркайдын сөөгү табылды" деп жазды.
Шаар бийлигин маалыматы боюнча, чабуулдан тогуз кабаттуу үйдөгү 18 батир толугу менен кыйрап, дагы жети батирге зыян келген.
Бул чабуулдан кийин жекшембиде Одесса облусунда жана Одесса шаарында аза күтүү күнү жарыяланды. Жергиликтүү бийлик урандылардын алдында дагы бир нече адамдын сөөгү болушу мүмкүн деп болжоп жатат.
Одессадан тышкары орус күчтөрүнүн 2-марттагы дрон чабуулдарынан Харьков жана Николаев шаарларында үч кишинин өмүрү кыйылды.
Москва Украинадагы жайкын тургундардын өлүмү тууралуу үн каткан жок. Орус бийлиги далилдерге карабастан Украинада аскердик объектилерди гана бутага аларын билдирип келет.
Украинанын башкы прокурору Андрей Костин Одессада кыйраган үйдүн жанында эч кандай аскердик жай жок экенин белгиледи.
"Орус армиясы Одессадагы турак жайды билип туруп бутага алды, анын жанында эч кандай аскердик объектилер болгон эмес", – деди Костин.
Кечиккен жардам, күчөгөн басым
Украин президенти Владимир Зеленский ишембидеги кандуу чабуулдан кийинки билдирүүсүндө Батыштын жардамы кечиккендиктен жайкын тургундар арасындагы жоготуулар көбөйүп жатканын белгиледи.
"Дүйнө террорго каршы турса болорун билет. Дүйнөдө ракетадан коргоочу системалар, "Шахед" дрондорунан жана ракеталарынан сактоочу системалар жетиштүү. Украинага курал-жаракты, биздин элди коргоо үчүн зарыл болгон ракета системаларын кечиктирүү, тилекке каршы, ушундай жоготууларга жана Орусиянын колунан өлгөн балдардын тизмесинин туруктуу түрдө узарышына жол ачууда", - деди Зеленский.
Ал Украина Батыштан адам өмүрлөрүн сактоо үчүн зарыл болгон аскердик жардамды гана сурап жатканын, жайкын тургундардын өмүрү кыйылып жаткан маалда Украинанын өнөктөштөрү "ички саясий оюндар жана талкуулар" менен алектенип жатканын белгиледи. Ошондой эле Украинанын коргонуу жөндөмүн аксаткан бул аракеттерди "унутуу мүмкүн эмес, дүйнө эсинен чыгарбайт" деп айтты.
Бул сөзү менен Зеленский Кошмо Штаттардагы Украинага аскердик жардам көрсөтүү маселесине байланыштуу талаш-талкууларды ишарат кылгандай болду. Учурда АКШ өкмөтү убада кылган 60 миллиард доллардык жардам пакети Конгрессте мунаса табылбай жатканына байланыштуу Украинанын колуна тие элек.
Киевдин жардамды тездетүү чакырыгы жана жайкын тургундардын өмүрүн алган чабуулдар Орусия фронтто украин күчтөрүнө басымды күчөтүүгө аракет кылып жаткан мезгилге туш келди.
Өткөн айда орус күчтөрү Донецк облусундагы Авдеевка шаарына көзөмөлүн орноткон. Алар соңку күндөрү Авдеевкага туштан бир нече майда кыштактарды да ээлеп, батышты көздөй жылууга аракет кылып жатат. Орусиянын Коргоо министрлиги 3-марттагы билдирүүсүндө орус армиясы Донецк облусунда ыңгайлуу позицияларды ээлеп жатканын белгиледи.
Киев курал-жарагы, ок-дарысы жана аскердик күчтөрү жетишсиз экенин моюнга алат. Украинанын коргоо министри Батыш убада кылган ок-дарылардын жарымы белгиленген мөөнөттөн кечигип келип жатканын билдирген.
Украин армиясынын бир нече апта мурда дайындалган башкы командачысы Александр Сырский ишемби күнү согуш тилкесиндеги аскердик бөлүктөрдү кыдырып келди. Ал "фронтто кырдаал оор болгону менен көзөмөлдө экенин" айтты.
Зеленский 2-марттагы видео кайрылуусунда генерал Сырскийден фронттогу кырдаал тууралуу "деталдуу маалымат жана конкреттүү сунуштарды" күтөрүн айтты. Ошондой эле ал жаңы командачыга армиянын курамында жана башкы штабда кадрдык өзгөртүүлөрдү жасоого "карт-бланш" же чексиз ыйгарым укук берерин кошумчалады.
Украинанын армиясы жекшембинин таңында маалымдагандай, акыркы бир сутка ичинде орус күчтөрү Украинага 1 ракета учуруп, 50 жолу абадан сокку урду. Украинанын кеминде тогуз облусу 112 жолу артиллериялык аткылоого кабылды.
Дем алыш күндөрү Орусиянын аймактары да учкучсуз учуучу аппараттардын чабуулдарына туш болду. 2-мартка караган түнү Санкт-Петербург шаарындагы турак жайга кулаган дрон алты кишини жарадар кылганы кабарланды. Социалдык тармактарга тараган видеодо бир дрон ылдыйды көздөй айланып түшкөнүн, имаратка тийген соң жарылганын көрүүгө болот.
Украин медиасы бул дрон жакын жердеги мунай кампасына сокку урууну көздөгөнүн, Орусиянын абадан коргонуу системалары аны бутага жеткирбей атып түшүргөнүн жазышты.
Ишемби күнү украин дрондору Орусиянын чек арага жакын жайгашкан Брянск аймагына да чабуул койгону маалым болду. Орус армиясы жекшембиге караган түнү Киев Орусиянын аймагына баш-аягы 38 дрон учурганын билдирди.
Украин жетекчилери Орусиянын аймагындагы дрон чабуулдары боюнча комментарий бербейт.
Берлиндин шаштысын кетирген аудио
Украин күчтөрүнүн абалы жана фронттогу кырдаал Батыш өлкөлөрүндө тынчсызданууларды жаратып жаткан маалда апта соңун утурлай Германиянын армия жетекчилеринин видеоконференциясынын аудиосу делген үн жазма ачыкка чыгып кетти. Аны жума күнү Орусия каржылаган RT (Russia Today) телеканалынын жетекчиси Маргарита Симоньян соцтармактарга жарыялап, бул аудиону "Германиянын Крымга сокку урууну көздөп жатканынын далили" деп атады.
38 мүнөттүк аудиодо офицерлер Украина Германияда чыгарылган TAURUS ракеталарын кантип, кандай шартта колдоно алары жана анын таасири тууралуу сүйлөшүшкөн. Би-Би-Си жазгандай, бул жыйында немис ракеталары Орусияны аннексияланган Крым жарым аралы менен байланыштырган Керч көпүрөсүнө сокку ура ала турганы жөнүндө да сөз болгон.
Германиянын бийлиги аскер жетекчилердин онлайн форматтагы видеоконференциясы өткөн платформа хакердик чабуулга кабылганын мойнуна алгандай болду. Ишемби күнү Германиянын канцлери Олаф Шольц үн жазуунун ачыкка чыгып кетишин "өтө олуттуу маселе" деп мүнөздөп, бул окуя "тез арада" иликтене турганын айтты.
Der Spiegel журналы офицерлердин видеоконференциясы армиянын ички жашыруун түйүнү аркылуу эмес, көпчүлүккө белгилүү WebEx платформасы аркылуу уюштурулганын жазды.
Орусиянын Тышкы иштер министрлиги Берлинден чукул түшүндүрмө талап кылды. Москванын башкы дипломаты Сергей Лавров аудио тасма "Германия Крымдагы көпүрөгө жана башка объектилерге, анын ичинде курал-жарак кампаларына чабуул коюуга камылга көрүп жатканын көрсөтөт" деп айтты.
Германиянын Коргоо министрлигинин басма сөз катчысы аба күчтөрүнүн офицерлеринин сүйлөшүүсү жаздырылып алынганын мойнуна алып, бирок аудио бурмаланып бурмаланбаганын азырынча так айта албай турганын билдирди.
Соңку бир суткада фронтто 83 жерде кагылышуу болгонун, Орусия үч ракеталык, 91 авиациялык, жапырт аткылоочу реактивдүү системалардан 142 сокку урганын бүгүн 1-мартта Украинанын Куралдуу күчтөрүнүн Башкы штабы билдирди.
Мекеменин маалыматына караганда, жай тургундар арасында каза болгондор жана жараат алгандар бар. Үйлөр, жарандык инфраструктура объектилери жана бир чиркөө талкаланганы маалымдалды.
Украинанын Куралдуу күчтөрүнүн башкы командачысы Александр Сырский Авдеевка жана Курахов багыттарында “ээлеп турган позицияларды кармап калуу жана чегинген тилкелердеги турумду калыбына келтирүү” аракети көрүлүп жатканын 29-февралда билдирген.
Ушул эле күнү Улуу Британиянын чалгын мекемеси Авдеевканын батышындагы аймак Орусия аскерлеринин чабуулдарынын борборунда экенин маалымдады.
Орусия Херсон багытында да активдешкенин бүгүн 1-мартта Украинанын «Түштүк» ыкчам башкаруу борборунун жетекчиси Наталья Гуменюк билдирди.
1-мартка караган түнү Харьков облусунун айрым райондору артиллериядан жана минометтон аткыланганын аймактын жетекчиси Олег Синегубов маалымдады.
29-февралда Украин президенти Владимир Зеленский Албаниянын борбору Тирана шаарында өткөн «Украина — Түштүк-Чыгыш Европа» саммитинин жыйынтыгында бул аймактагы өлкөлөр курал-жарактан жардам берүүнү убада кылышканын айтты.
Ал эми Орусия Украина менен чектеш аймактагы Курск облусунда украин аскерлеринин дрон чабуулунан төрт айыл электр жарыгысыз калганын кабарлады.
Украинанын Куралдуу күчтөрүнүн Атайын операция күчтөрү 29-февралга караган түнү 73-деңиз борборунун жоокерлери курман болгонун тастыктады. Маалыматта айтылгандай, алар «атайын тапшырманы аткаргандан кийин топтун негизги күчтөрүнүн чыгып кетишин камсыз кылып жаткан учурда» курман болушту.
Орусиялык кабарчылардын айтымында, кармаш украин аскерлери Херсон облусунун оккупациядагы бөлүгүндөгү Тендров саяңынын жээгине беш кайык менен барып түшүүгө аракет кылган учурда болгон. Орус аскерлери төрт кайыкты бутага алышкан, бешинчиси сүзүп кетүүгө үлгүргөн.
Mash басылмасынын маалыматына караганда, кеминде 20 украиналык жоокер набыт кетти.
Тендров саяңы — Кара деңиздеги, Херсон облусунун жээгине жакын жайгашкан узун кууш аралча. Эгер аны Украина өз карамагына алса, облустун Орусия оккупациялап алган бөлүгүнө чабуул коюуга мүмкүнчүлүк ачылмак.
Орусиянын президенти Владимир Путин бүгүн 29-февралда Федералдык жыйынга кайрылуусун Украина маселесинен баштады.
«Орусия азыр өзүнүн суверенитети жана коопсуздугу үчүн адилет күрөш жүргүзүп жатат», - деген Путин Украинага каршы согушун «орусиялыктардын абсолюттук көпчүлүгү колдогонун» айтты.
Белгилүү болгондой, Кремль эки жыл мурдагы Украинага кол салуусун согуш деп эмес, «атайын аскердик операция» деп атап келет.
Путин кайрадан Батыш өлкөлөрүн кескин сынга алды. "Батыш биздин өнүгүүбүзгө бут тосууга гана умтулган жок, аларга Орусиянын ордуна жок болуп бараткан мейкиндик керек", - деди орус президенти жана Батыш "адашканын" айтты.
"Батыш Орусия Европага кол салганы жатат деп калп айтуусун улантууда. Бул болбогон сөз. Украинага НАТО контингентин жөнөтүү тууралуу айта башташты. Бирок контингентин жөнөткөндөрдүн тагдыры эмне болгону биздин эсибизде. Эми интервенттер үчүн кесепеттер алда канча трагедиялуу болот. Бизде да алардын аймагын бутага алууга жөндөмдүү курал-жарагыбыз бар", - деди Путин.
Ал Орусиянын жаңы куралдануусу тууралуу айтып, жакында күжүрмөн нөөмөттө турган райондордогу "Сармат" оор баллистикалык ракеталары көрсөтүлөрүн убада кылды. Путиндин айтымында, "стратегиялык ядролук күчтөр кепилденген колдонууга толук даяр» абалда турушат. Орус президенти Батыш «ойдон чыгарып айтып, дүйнөнү коркутуп» жатканынын баары ядролук курал колдонулуучу конфликтти тутандырышы ыктымал реалдуу коркунуч экенин белгиледи.
Өткөн аптада, согуштун эки жылдыгына карата АКШ, Канада, Европа Биримдиги жана Улуу Британия Москвага каршы кезектеги санкцияларды жарыялашкан.
Украинанын коргоо министри Рустем Умеров 25-февралда «Украина. 2024-жыл» форумунда сүйлөп жатып Батыш убада кылган аскердик жардамдын жарымы өз маалында келбей жаткандыктан Украина жоокерлеринен да, жерлеринен да айрылып жатканын айткан.
26-февралда Франциянын демилгеси менен борбор калаа Парижде Украина маселеси боюнча Европадагы 20 өлкөнүн, АКШнын, Канаданын лидерлери жана өкүлдөрү катышкан саммит өткөн. Анын жыйынтыгында Европа лидерлери Украинага Орусиянын кол салуусуна каршы күрөшүү үчүн “орто жана алыс аралыкка жетүүчү ракеталарды жана бомбаларды” жөнөтүү максатында коалиция түзүүнү макулдашканын өлкө президенти Эммануэл Макрон билдирген.
Ошондой эле Макрон Украинага аскер жөнөтүү ыктымалдыгы боюнча азыр бир пикир жоктугун, бирок андайды жокко чыгаруу да болбой турганын кошумчалаган.
Европанын НАТОго мүчө бир нече өлкөсү Макрондун аскер жөнөтүү тууралуу билдирүүсүн четке кагышкан.