Орус аскерлери 6-мартка караган түнү Украинага 42 "жанкечти" дрон жана беш ракета менен сокку урду. Бул тууралуу украин куралдуу күчтөрүнүн Башкы штабы билдирип, 38 учкучсуз учак атып түшүрүлгөнүн кошумчалады.
“Азаттыктын” украин редакциясы чабуулга Винница, Днепропетровск, Одесса, Сумы, Харьков, Херсон, Хмельницкий, Черкассы облустары туш болду.
Сумынын жергиликтүү администрациясынын башчысы Владимир Артюх үч объектиге дрон тийгенин, беш киши, анын ичинде бир бала жарадар болгонун маалымдады. Анын айтымында, аскерлер бир дронду атып түшүрдү, бир нечесинин багытын өзгөртүүгө жетишти. Артюх бир дрон оорукананы бутага алганын айтты.
Шаршембиде эртең менен орусиялык МиГ-31К истребители абага көтөрүлгөндө Украинанын аймагында сокку коркунучун эскерткен сиреналар жаңырып турду. Окуялардын андан аркы өнүгүүсү азырынча белгисиз.
Орус аскерлери украинанын жер-жерине түрдүү курал менен сокку уруп келет. Далилдерге, күбөлөрдүн айткандарына карабай Москва жарандык жайларды бутага алганын танууда.
Бир күн мурда Гаагадагы эл аралык кылмыш соту Орусиянын эки жогорку кол башчысына издөө жарыялаган. Алыскы авиациянын командачысы, генерал Сергей Кобалыш жана Кара деңиз флотунун командачысы, адмирал Виктор Соколов жарандык жайларга сокку урганы, карапайым элге өтө көп зыян алып келгени, адамзатка каршы кылмыш жасаганы үчүн айыпталууда.
Украина Орусия аннексиялап алган Крымда орусиялык деңиз кайгуул кемесин жок кылганын бүгүн 5-мартта билдирди. Өлкөнүн Башкы аскер чалгын башкармалыгынын маалыматына караганда, украиналык Group 13 атайын бөлүгү шейшембиге караган түнү Magura V5 деңиз дрондору менен Орусиянын Кара деңиз флотунун «Сергей Котов» кайгуул кемесие чабуул коюшту.
Операция Украинанын Аскердик-деңиз күчтөрү жана Санарип трансформация министрлиги менен биргеликте Керч булуңунан анча алыс эмес жерде, деңиздин Украинага таандык тилкесинен ишке ашырылганы, баасы 65 миллион долларлык кеменин арткы бөлүгү, оң жана сол капталы талкаланганы маалымдалды.
Интернеттеги социалдык түйүндөрдө тараган кабарларга караганда, Крым көпүрөсүндө кыймыл сегиз саатка токтотулду. Орусиянын аймагын Крым жарым аралы менен байланыштырып туруучу 18 чакырымдык бул көпүрөнү Орусия Крымды 2014-жылы аннексиялап алгандан кийин курган.
Орусия «Сергей Котов» кайгуул кемеси боюнча билдирүүлөргө комментарий бере элек.
Украина Орусиянын Самара облусунда темир жол көпүрөсүн жарактан чыгаруу аракети жасалганын тастыктады. Өлкөнүн Башкы чалгын кызматынын 4-марттагы маалыматына караганда, орус аскерлери Чапаевка суусундагы бул көпүрөнү Украинага чабуул коюу үчүн аскердик жүгүн, Чапаевск шаарындагы "Полимер" ишканасында жасалуучу инженердик жабдыктарын ташыганга колдонуп келет.
Орусиялык маалымат каражаттары билдиргендей, жарылуу таңкы саат беш чамасында болгон. Темир жол кыймылы азырынча токтоп турат. Көпүрөнүн тирөөчтөрү бүтүн экени, темир жолдун өзү иштен чыкканы маалымдалды.
Түшкө маал ошол эле темир жол тилкесинде дагы колго жасалган эки жардыргыч табылганы кабарланды.
Орусия Украинага 2022-жылдын февралында кол салган. Өзү бул согушту «атайын аскердик операция» деп атап келет.
Орусиянын аймагында темир жол инфраструктурасын иштен чыгаруу аракеттери буга чейин да катталган.
Соңку суткада Украинанын үч облусунда Орусиянын чабуулдарынан бир кишинин өмүрү кыйылганын, 20 чакты киши жараат алганын 4-мартта жергиликтүү бийлик башчылары билдиришти.
Харьковдун башчысы Олег Синегубовдун айтымында, облус аймагында артиллериялык жана миномет чабуулдарынан 15 калктуу пункт жабыркады.
Херсон облусунда 16 кыштакта окуу жайлар, чарба имараттары талкаланып, бир киши каза тапты.
Донецк облусунда Орусиянын чабуулдарынан 19 киши жараат алды.
Орусия соңку эки жылдан бери Украинанын аймактарын болгон күжүрмөн курал-жарагы менен бутага алып келет. Январда чабуулдар күчөп, ондогон украиналык каза болду, жүздөгөн киши жараат алды.
Бириккен Улуттар Уюмунун (БУУ) быйылкы жылдын 21-февралына карата маалыматы боюнча, эки жыл аралыгында Орусиянын толук масштабдуу кол салуусунан Украина 10 582 жаранынан айрылды, дагы 19 875 киши жараат алды. Уюм чынында курмандыктар мындан көп деп эсептейт.
Москва кол салуусун «атайын аскердик операция» деп атап, Украинанын жарандарын өлтүрүп, жарандык инфраструктурасын талкалап жатканын далилдерге карабастан моюнуна албай келет.
Одесса шаарына 2-мартта жасалган дрон чабуулунан каза болгондор 12ге жетти. Набыт кеткендердин төртөө балдар, алардын экөө ымыркайлар экенин украин бийлиги билдирди.
Өлкө президенти Владимир Зеленский 3-марттагы кайрылуусунда Орусияны жеңүүгө жардам сурап, «дүйнө Орусиянын жаалына каршы чыгып, жообун бериши керектигин» белгиледи.