Орусиялык армия Авдеевканын жана Донецкинин чыгышында чабуулга өттү
Өткөн суткада авдеевка багытында 20дай орусиялык чабуул болгонун, Украинанын башкы штабы билдирди. Кармаш Бердичи-Орловка-Тоненьке – Первомайское линиясында жүрүп жатат. Бул багытта Авдеевкадан чегинген украин күчтөрү турган.
Орусиялык күчтөр андан тышкары Донецкинин чыгыш тарабындагы Красногоровка, Георгиевка жана Новомихайловка калктуу пункттарында чабуулга өтүп жатат, Украинанын Башкы штабы орусиялык күчтөр коргонууну жырып өтүү үчүн 22 жолу аракет кылганын билдирди.
Украинадагы согушта адам укугу бузулган окуяларды иликтеген комиссиянын эксперттери кезектеги баяндамасын даярдашканын бүгүн 15-мартта Би-Би-Си жана бир катар маалымат агенттиктери жазышты. Комиссия 2022-жылдын март айында Бириккен Улуттар Уюмунун (БУУ) Адам укуктары боюнча кеңешинин чечими менен түзүлгөн.
Келерки аптада Женевада жарыялана турган документте орус аскерлеринин “системалуу жана кеңири масштабдагы” мыйзам бузуулары тууралуу баяндалганы, аларды аскер кылмышы жана адамзатка каршы кылмыш деп бааласа болору белгиленди.
Баяндаманын көпчүлүк бөлүгүндө Орусияга туткунга түшүп калган украиналык аскер кызматкерлери кабылган кыйноо жана мазактоо фактылары камтылган, алар тууралуу мурдагы туткундар жана орусиялык дезертирлер өзүлөрү айтып берген.
Уруп-сабоо, сексуалдык зомбулук, тамак же суу бербей кыйноо, электрошокер колдонуу фактылары баяндалган.
Украин жарандарынын укугу бузулган окуялар да бар экени, алар негизинен Орусия менен кызматташкан деп айыпталганы, бирок, маалымат берүүдөн таптакыр баш тартып койгон орус тарапка караганда Украинанын расмий адамдары БУУнун эксперттери менен кызматташып турганы белгиленди.
Орусиялык соккунун кесепетинен Одессада 14 адам каза тапкан. Арасында бир куткаруучу жана медик бар. 46 адам жараат алган, алардын сегизи куткаруучу.
Орусия Одессага "Искандер" баллистикалык ракетасы менен сокку урганы кабарланууда. Мунун айынан бир катар мамлекеттик имараттар жана турак жайлар кыйраган.
Украинанын Одесса шаарында бүгүн 15-мартта ракеталык чабуулдардан кеминде 14 адамдын өмүрү кыйылганын, арасында Өзгөчө кырдаалдар боюнча мамлекеттик башкармалыктын фельдшери жана кызматкери бар экенин облустук администрациянын башчысы Олег Кипер билдирди.
46 киши, арасында куткаруучулар, жараат алганы кабарланды.
16-март Одессада аза күтүү күнү деп жарыяланды. 3-мартта да бул шаарда 12 киши, арасында беш бала каза тапканда аза күтүү күнү болгон.
Бүгүн орус аскерлери Одессага сокку уруп, куткаруу иштери жүрүп жаткан жерге кайрадан чабуул койгону, баллистикалык ракета колдонулганы маалымдалды.
Одессага жасалган чабуул
