Севастополго ракеталык чабуул
Ишембинин кечинде Украинанын Орусия аннексиялап алган Севастополь шаарында абадан чабуул болушу мүмкүн деген эскертүү берилди.
Жергиликтүү тургундар жардыруулардын видеолорун жарыялашты. Ракета Соловьев көчөсүндөгү Украинанын Аскер-деңиз флотунун мурдагы штабына, азыр Орусиянын Кара деңиз флотунун маалымат-эсептөө борборун бутага алып, тийген деген божомол бар.
Орус аскерлери 24-мартта эртең менен Украинанын Львов облусуна "Канжар" менен сокку урду.
Облустук аскер администрациясынын башчысы Максим Козицкийдин айтымында, алдын ала маалыматтар боюнча, түн ичинде аткыланган бир эле маанилүү инфраструктуралык объектиге эки жолу сокку урулган.
Ошол маалда иштеп жаткан өрт өчүрүүчүлөргө убагында эскертүү берилип, алар коопсуз жайга чыгып кетүүгө үлгүрүшкөн.
Украинанын Коргоо министрлигинин Чалгын башкармалыгы орус президенти Владимир Путиндин "Крокус Ситидеги” окуяга шектүү чек араны өтүүдө “украин тараптан даярдалган жол болгон” сөзүн четке какты.
Чалгын башкармалыгынын өкүлү Андрей Юсов Путиндин версиясы суу кечпейт турганын айтты. Юсов Орусия Украинага согуш ачкан үч жылдан бери чек ара аймактарында армия, атайын тыңчы, атайын кызматтын өкүлдөрү, күч түзүмдөрүнө толуп турарын айтып, чек сызыктарында мина коюлганын жана аэрочалгын баштаган бардык жабдыктар менен эки тарап тең көз салып турарын билдирди.
Орусиянын президенти Владимир Путин 23-мартта, түштөн кийин телекайрылуу жасап, шектүүлөр Украинаны көздөй баратканда кармалганын, аларга чек арадан өтүп кетүүгө “жол” даярдалганын билдирген. Бирок анын чоо-жайына токтолгон эмес.
Украина орусиялык 34 дронду атып түшүргөнүн, Орусия беш аймагына чабуул болгонун билдирди
23-мартта Орусия Украинанын аймагын Shahed үлгүсүндөгү 34 учкучсуз учак менен аткылады. Чабуулга Полтава, Николаев, Днепропетровск, Херсон жана Запорожье облустары кабылганын Украинанын Аскер аба күчтөрү билдирди. Расмий маалыматта 31 дрон атып түшүрүлгөн. Жабыр тарткандар жана кыйроолор тууралуу маалымат азырынча айтыла элек.
Украинанын Башкы штабы 23-марттын таңында өткөн суткада 69 аскердик кагылышуу болгонун билдирди. Айыгышкан кармаш новопавловка багытындагы - Красногоровка, Новомихайловка, Георгиевка жана Урожайное калктуу конуштарында болгон. Кандуу кармаштар Авдеевканын чыгышында да жүрүп жатат.
Ал эми 23-мартта Орусиянын беш аймагы учкучсуз учактардын чабуулуна кабылды. Алдын ала маалыматта жарадар болгондор жана жабыр тарткандар жок. Соккулар үчүн орус бийлиги Украинаны айыптады.
Самара облусунда Куйбышев жана Новокуйбышев мунай заводдоруна сокку урулганын аймактын губернатору Дмитрий Азаров билдирди. Биринчисинде, мунайды иштеткен колонна күйүп кеткен, экинчисине урулган чабуулдун мизи кайтарылган. Жабыр тарткандар жана курмандыктар жок.
Орусиянын Коргоо министрлигинин маалыматында түндө 12 учкучсуз учактын бешөө Брянск жана Белгород облустарында, Воронеж жана Саратов облустарында бирден атып түшүрүлгөн.
Белгороддо бизнес борборго сокку урулганын "Сота" сүрөт жана видеолор менен жарыялады. Калган аймактарда кыйроолор жана жабыр тарткандар тууралуу маалымат айтыла элек.