Атом энергиясы боюнча эл аралык агенттигинин (МАГАТЭ) жетекчиси Рафаэл Гросси агенттик дрон чабуулдарында Украинадагы “Запорожье атомдук-электр станциясындагы реактордун тосмосуна үч сокку таамай тийгенин ырастаганын билдирди.
Мунун алдында Гросси орус күчтөрү көзөмөлдөп жаткан Запорожье атомдук электр станциясынын аймагында бир дрондун жарылганын ырастап, учкучсуз аппарат кайсы тараптан учурулганын тактаган эмес.
“МАГАТЭнин Запорожье атомдук электр станциясындагы эксперттери билдиргендей, бүгүн объектинин аймагында дрон жарылды. Бул биздин байкоолорубузга дал келет. Мен МАГАТЭнин беш принцибине жана өзөктүк коопсуздукка каршы келген аракеттерден карманууга чакырам”, - деди Гросси Х социалдык тармагына жазган билдирүүсүндө.
Би-Би-Си жазгандай, Запорожье атомдук электр станциясынын оккупациялап алган бийлик дайындаган жетекчилиги жекшембиде станциянын аймагы жана жүк портуна, ашканага украиналык "жанкечти" дрондору сокку урган. “Росатомдун” билдиришинче, үч кызматкер жараат алган, алардын биринин абалы оор.
Атомдук станция Украинанын куралдуу күчтөрү алтынчы энергетикалык блоктун чатырына чабуул жасаганын билдирди. Мындан чоң зыян келтирилбегени, коопсуздукка коркунуч жараткан жагдай болбогону станциянын Телеграм-каналына жазылган.
Орусиянын "Росатом" корпорациясы жекшемби күнү Запорожье атомдук электр станциясы болуп көрбөгөндөй дрон чабуулдарына дуушар болуп, станциянын коопсуздугуна түздөн-түз коркунуч келтирилгенин белгиледи.
Украинанын башкы чалгындоо башкармалыгы Киев Энергодардагы оккупацияланган атомдук электр станциясындагы куралдуу чагымдарга катышы жок экенин билдирди.
“Агрессор-мамлекет бул жолу да өзөктүк объектиге, жалпы Европа аймагынын калктуу аймактарына жана айлана-чөйрөсүнө коркунуч жаратты”, - деди башкармалыктын өкүлү “Украинской правда” басылмасына берген маегинде.
Ал Орусия жасалма соккуларды Запорожье аймагына да уруп жатканын билдирди. Юсов муну “туруктуу кылмыштык тажрыйба” деп баалады.
Запорожье атомдук электр станциясы – Европадагы ири энергетикалык станциялардын бири. Орус күчтөрү 2022-жылы март айында Энергодар шаарын жана ага жакын жайгашкан станцияны оккупациялап алган.
Станциянын аймагы маал-маал менен аткылоого кабылып турат, бул үчүн Орусия менен Украина бири-бирин айыптап келет. Украин бийлиги орус армиясы станцияны аскердик техника жана аскерлерин сактоо үчүн пайдаланып жатканын билдирген.
Жекшембиге оогон түнү Украинанын Запорожье облусунда орус армиясынын аткылоосунан үч киши набыт болгонун аймактык администрациянын башчысы Иван Фёдоров билдирди. Маалыматка карагандай, Гуляйполе шаары "Град" системасы менен аткыланган. Снаряд тийген үй кулап, эки эркек жана аял уранды алдында калып каза тапты. Дагы бир киши жараат алып, ооруканага түштү
Харьков облусундагы Купянскиде орус армиясы көп кабаттуу үйгө авиабомба таштаганда бир аял набыт болгонун "РБК-Украина" агенттиги кабарлады.
Харьков шаары дагы учкучсуз аппараттардын чабуулуна кабылды. Алардын бири үйгө тийгенде бир киши жаракат алып ооруканага түшсө, дагы эки адамга жеринде медициналык жардам көрсөтүлдү.
Жекшембиге караган түнү Украинанын аймагында орустардын «Шахед» үлгүсүндөгү 17 учкучсуз аппараты атып түшүрүлгөнүн Киевдеги Башкы штаб билдирди. Соңку апталарда орус армиясы Украинага 10 ракета коё берип, 88 авиачабуул жасаганын Киевдеги аскердик жетекчилик билдирди.
Орусия жетиштүү далилдерге карабай Украинадагы карапайым калкка, жарандык жайларга сокку урулуп жатканын мойнуна албайт. Москва тескерисинче аскердик жайларды гана бутага аларын такай кайталайт.
Орусия Харьковго чабуулун улантууда
- автор Айнура Жекше кызы
Бейшембиге караган түнү орус аскерлери Харьковго кайрадан дрон менен чабуул койгондо төрт киши каза тапты. Бийлик бир нече убакыттан бери бутага алынып келаткан Украинанын экинчи ири шаарын эвакуациялоо азырынча күн тартибинде турбаганын маалымдады.
Жергиликтүү бийлик биринчи сокку урулгандан кийин жарадар болгондорго жардам берүүгө жана өрт өчүрүүгө келген куткаруу кызматынын үч айдоочусу мерт кеткенин билдирди. Шаар мэри Игорь Терехов төртүнчү киши турак жайдын тургуну экенин айтты.
“Шахед” дрондору көп кабатуу үйлөргө, жер тамдарга тийип, медициналык жай жана айланадагы машиналар зыян тартты.
Облус губернатору Олег Синегубов 12 киши жараланганын, орус аскерлери кеминде 15 дронду учурганын телеграм-каналына жазды.
Ал эми украин армиясынын Башкы штабы түн ичинде 20 пилотсуз учактын 11и атып түшүрүлгөнүн маалымдады.
Орусиянын Коргоо министрлиги түнкү чабуулду комментарийлеген жок. Далилдерге карабай, Москва Украинанын жарандык инфраструктурасын, жөн-жай кишилерди бутага алганын танып келет.
Орусиянын пропагандасы акыркы маалда Харьковду көп талкуулап келатат. Өткөн жумада Мамлекеттик думанын депутаты Андрей Луговой калааны "жашоого жараксыз кылууну" сунуш кылды:
“Ал жерде калган 800 миң тургун машиналары менен, жөө, түйүнчөктөрүн көтөрүп, арабаларга отуруп алып, батыш тарапка жөнөсүн. Калган шаарларды, Киевди да ошондой кылуу керек”.
Мэр Терехов аткылоолорго жана электр энергиясынын үзүл-кесил берилгенине карабай, калаада 1,3 миллион киши турганын билдирди. Бийлик жана аскерлер Харьковду эвакуациялоонун азырынча зарылдыгы жоктугун айтышат.
Тереховдун айтымында, тургундарды көчүрүү тууралуу имиштерди орус тарап калктын “жүрөгүнүн үшүн алуу үчүн” атайын жайылтууда. Мэр эч кандай дүрбөлөң түшкөн маанай жок экенин кошумчалады.
“Верстка” басылмасы аты аталбаган жогорку аткаминерге шилтеме менен жазгандай, орус бийлиги Харьковду “экинчи Мариуполго” айландыргысы келбейт, шаарды сактап калууну максат кылат. Алардын айтымында, калааны курчоого алуу керек, бул үчүн Кремль дагы 300 миң кишини мобилизациялоону пландап жатат.
“Медуза” өз булактарынын эки ача маалыматтарын келтирди. Кээ бирлери Харьковго масштабдуу чабуул коюу чечими кабыл алынып-алынбаганын айтышса, башкалары Путин бул шаарды алгандан кийин "атайын аскердик операция" деп аталган согушту бара-бара токтотууну көздөгөнүн белгилешет.
Өткөн жылы германиялык «Билд» гезити орус армиясы 2026-жылдын аягына чейин Запорожье, Днепропетровск жана Харьков облустарынын ири бөлүктөрүн, анын ичинен Харьков, Днепр жана Запорожье шаарларын басып алып, Днепр дарыясына чейин жетүү максатын койгонун жазган.
Жакында украин президенти Владимир Зеленский да жаз-жай айларында орус армиясы жаңы чабуул коюуну пландап жатышы мүмкүн деп эскертти. Ал ошондой эле Орусия 1-июнга чейин 300 миң кишини мобилизациялоону көздөгөнүн айтты. Кремлдин басма сөз катчысы Дмитрий Песков бул билдирүүнү "калп" деп четке какты.
АКШда жайгашкан «Согушту изилдөө институтунун» эксперттери да Москва жаңы масштабдуу чабуулга камданып жатат деп болжолдошот. Алар ошондой эле Орусия акыркы мезгилде украин күчтөрүнүн позицияларына чабуулдарын күчөткөнүн билдиришти. Мисал катары аналитиктер Кременнаяга, Авдеевканын жанындагы Тоненькое айылына коюлган чабуулдарды келтиришет жана Орусия Киев Батыштан аскердик жардам алгыча ийгиликке жетүүнү, жолдорду эриген кардын суусу каптай электе бронетехниканы пайдаланууну көздөгөнүн айтышат.
Украиналык аскердик эксперт Михаил Самусь “Настоящее время” телеканалы менен болгон маекте Путин Харьковду алууну көздөп жатат деген маалыматтардын реалдуулукка байланышы жок деген оюн айтты:
"Бул маалыматтык-психологиялык операция коркуу, башаламандык маанайын түзүүнү максат кылат. Украиналыктар өз күчүнө ишенбей калсын дешет. Ушундай эле операция эки-үч жума мурун Сумы облусунда да жүргөн. Бул эки аймактын айланасындагы кырдаалга жакындан байкоо салган украин чалгынчылары орустардын Харьковду алмак турсун, чек арага жакындоо үчүн жетиштүү аскерлери жок экенин айтышат".
Орус аскерлери кошуна өлкөнүн экинчи ири шаарына дээрлик күн сайын сокку уруп жатат. Алар негизинен энергетикалык объектилерди керектен чыгарууну көздөөдө.
Бейшембиде дрондор Змиев жылуулук станциясына да тийгени кабарланып, Энергетика министрлиги 350 миңдей жашоочу электр жарыгысыз калганын билдирди. Харьковго электр жарыгы график менен берилүүдө.
Электр энергиясы өчүрүлгөн кезде да калаадагы жашоо кадимкидей уланат. Дүкөн, кафе, башка коомдук жайлар былтыр эле автономдуу генераторлорду даярдап алышкан. 22-мартта метро жана автобустар токтоп калып, көп узабай калыбына келтирилген.
Самусь маалымат операциясы калайыктын күнүмдүк жашоосуна эң чоң таасир эткен объектилерге соккулар менен коштолгонун, мындайда адамдар психологиялык туруктуулугун жоготорун белгилейт.
Орус аскерлери Харьковду согуштун башында, 2022-жылдын февраль-март айларында алууга аракеттенишкен. Кийинчерээк орус аскерлери мамлекеттик чек арадан ары чегинген.
Терехов калааны калыбына келтирүүгө 10 млрд доллардан ашуун каражат керектигин билдирди.
Украин куралдуу күчтөрүнүн Башкы штабы бейшемби күнкү бюллетенинде бир суткада Авдеевкага жана Донецкиге жакын жерде орус армиясы ондогон чабуул койгонун билдирди.
Орусия Украинаны соңку суткада учкучсуз учактар, үч баллистикалык ракета жана башкарылуучу эки зениттик С-300 ракетасы менен аткылаганын бүгүн 5-апрелде украин аскерлери билдиришти.
Оккупацияланган Крым жарым аралынан учурулган 13 Shahed дронунун баары атып түшүрүлгөнү маалымдалды.
Түндө Одессада жана Харьковдо жарылуулар катталганы айтылды.
Харьковдун мэри Игорь Тереховдун айтымында, адатта орусиялык аскерлер бул шаарды Белгород облусунан С-300 менен аткылашат – бул снаряддар 40 секундда учуп барат, бирок соңку кезде Shahed учкучсуз учактары көбүрөөк колдонула баштады.
Өткөн түнү Херсон облусунун Днепровский району да аткыланганын, эки адам жараат алганын, алардын бири 60 жаштагы эркек экенин, анын мээси чайкалып, бети кесилгенин, 54 жаштагы аял жарылуудан жаракат алганын, үйлөр талкаланганын жергиликтүү бийлик башчысы Роман Мрочко билдирди.
Ал эми фронтто кечээтен бери 65 жерде кагылышуу болгону, орус аскерлери негизинен Бахмут багытындагы чабуулдарын катуу жүргүзүп жатканы маалымдалды.
