Германиянын коргоо министри Борис Писториус Украинага HIMARS ракеталык системасынан үчтү жеткирерин билдирди. Бул тууралуу ал АКШдагы сапары маалында 9-майда жарыялады.
“Биз америкалыктар менен кызматташтыкта Украинага үч HIMARS системасын жеткире турганыбызды ырастай алам”, - деди Писториус. Маалыматка караганда, системалар америка куралдуу күчтөрүнүн запасынан жиберилет, акчасын Берлин төлөйт.
Бул ракеталар 80 чакырым радиуска чейин сокку ура алат. Буга чейин Вашингтон Киевге 30 HIMARS берген.
2024-жылдын февралында Украина менен Германия Киевге узак мөөнөттүк колдоо көрсөтүү жана коопсуздук тармагында макулдашууга кол коюшкан. Украинанын президенти Владимир Зеленский аны "буга чейин болуп көрбөгөндөй макулдашуу" деп мүнөздөгөн. Келишимдин алкагында Берлин Киевге бул жылы 7 миллиард евролук жардам көрсөттү.
Ал эми апрелде Германия бийлиги Украинага орус армиясынын чабуулдарынын мизин кайтаруу үчүн Patriot абадан коргонуу системасын жеткирерин жарыялаган.
Зеленский ыраазычылыгын билдирип, башка лидерлерди немис канцлери Олаф Шольцтон үлгү алууга чакырган.
Орусиянын армиясы 10-майга карагана түнү Украинанын Харьков облусуна ракеталык сокку урду. Аймак башчысы Олег Синегубов кабарлагандай, соккудан 11 жаштагы кыз жана 72 жаштагы аял жабыркады.
Ал эми Харьков шаарынын мэри Игорь Тереховдун маалыматына караганда, үч менчик үйдө өрт тутанып, эки турак жай толугу менен талкаланды. Жалпысынан 26 там жабыркап, сексенден көп конуш электр жарыксыз калганы кабарланды.
Мэрдин айтымында, сокку С-300 ракетасы менен жасалган. Облус прокуратурасы ал Белгород облусунан учурулганын билдирди.
Жалпысынан 10-майга караган түнү орус күчтөрү Украинанын аймагына он жанкечти дрон жана эки С-300/С-400 ракеталары менен чабуул койгонун украин армиясы билдирди. Маалыматка караганда, учкучсуз аппараттын баары абадан атып түшүрүлгөн.
Игорь Терехов апрель айынын башында орус армиясынын тынымсыз соккуларынан мамлекеттик жана жеке энергетикалык инфратүзүмдөрдүн дээрлик баардыгы кыйраганын билдирген.
Көптөгөн фото жана видео далилдерге карабастан Орусиянын Коргоо министрлиги жарандык жайларга сокку урганын төгүндөп, бир гана аскердик обьектилерди бутага аларын айтып келет.
Орус аскерлери Харьков шаарына сокку урганда беш киши, арасында үч өспүрүм жабыркады. Бул тууралуу облус губернатору Олег Синегубов маалымдады. Анын айтымында, 12, 13 жана 15 жаштагы эркек балдар жарадар болду, биринин абалы оор деп бааланууда.
Синегубов бир дүрмөт билим берүү мекемесинин короосундагы балдар сейилдеп жүргөн стадионго тийгенин кошумчалады.
Харьков облусунун полиция башчысы Владимир Тимошко балдар футбол ойноп жатканда сокку урулганын билдирди. Ал эки өспүрүмдүн абалы оор деп айтты, биринин бутун кесүүгө туура келет.
Өткөн айдын башында жергиликтүү бийлик Харьковдо орусиялык ракета соккуларынан мамлекеттик жана менчик энергетикалык инфраструктуранын дээрлдик бардыгы талкаланганын билдирген. Киевдин маалыматына ылайык, өлкөдөгү экинчи ири шаарга күн сайын С-300 ракеталары, дрондор жана башкарылган жабдыктардан сокку урулуп келет.
8-майга караган түнү украин аймагына 50 ракета жана 20 дрон атылганы кабарланган.
Орусия далилдерге карабай, карапайым кишилерди жана жарандык жайларды бутага алганын танып келет.
Украинада 4-майга караган түнү орус армиясынын дрон чабуулунан алты киши жабыркады. Төртөө Харьков, экөө Днепропетровск облустарында экенин жергиликтүү бийлик башчылары маалымдашты.
Харьковдо ооруканага түшкөндөрдүн бири - 13 жаштагы бала, экөө пенсия курагындагы аялдар.
Иран өндүрүшүндөгү "Шахед" жанкечти дрондорунун сыныгы кулаганда Харьковдогу эки кабаттуу кеңсе имараты күйүп кетти. Өрт бак-дарактарга да жабылганын облус башчысы Олег Синегубов билдирди.
Днепропетровск облусунун жетекчиси Сергей Лысак эки адам бейтапканага түшкөнүн маалымдады. Дрон сыныктары банк имаратына, беш үйгө, лицейге тийип, айрымдарында өрт тутанган. Электр энергиясына зыян келтирген.
Украинанын армиясы ишембиге караган түнү Орусия 13 дрон, С-300 үлгүсүндөгү төрт ракета учурганын билдирди. Дрондордун баары атып түшүрүлгөн, ракета соккулары тууралуу маалымат бериле элек. Орусиянын Коргоо министрлиги буга комментарий берген жок.