Украинанын жергиликтүү бийлик өкүлдөрү жана аскердик мекемелери өлкө соңку суткада да Орусиянын дрон жана ракета чабуулуна кабылганын, бир нече киши каза тапканын 1-августта билдиришти.
Днепропетров облусундагы Никопол шаарында эки аялдын – 72 жаштагы апасынын жана 40 жаштагы кызынын өмүрү кыйылганын облустук аскердик администрация башчысы Сергей Лысак билдирди. Ал шаар орус аскерлеринин аткылоосуна кабылганын, ондогон снаряд түшкөнүн Телеграмга жазды жана дагы бир жергиликтүү тургун жараат алганын, үйлөр, автомашиналар, мектеп имараты талкаланганын маалымдады.
Харьков облусунда 1-августка караган түнү темир жол станцияларынын бирине ракеталык сокку урулганын, бир кызматкер жараат алганын, айрым поезддердин иш жадыбалы убактылуу өзгөртүлгөнүн «Укрзализныци» ишканасы билдирди. Облустун аскердик администрация башчысы Олег Синегубов Изюм шаары «Искандер-М» ракетасы менен аткыланганын, бир киши каза тапканын, дагы бири жараат алганын жазды.
Украинанын Куралдуу күчтөрүнүн Аба күчтөрүнүн командачысы Николай Олещук өлкөнүн абадан коргонуу күчтөрү 1-августка караган түнү Киев, Полтава, Херсон жана Днепропетров облустарынын аймагында Shahed дрондорунан жетөөнү атып түшүрүшкөнүн билдирди.
Ал тапта украин президенти Владимир Зеленский Украина боюнча экинчи тынчтык саммитине орус тарапты да чакыруу зарыл экенин айтып жатышканын франциялык Le Monde басылмасына курган маегинде билдирди:
«Дүйнөнүн көпчүлүк бөлүгү ушуну каалайт. Бүгүн дүйнөнүн көпчүлүгү Орусиянын өкүлдөрү экинчи [Тынчтык] саммитинде болушу керек, болбосо биз маанилүү жыйынтыктарга жете албайбыз, анткени Орусия Украинага каршы согушуп жатат жана бул согуштун бир тарабы болуп эсептелет деп айтып жатат».
Орус аскерлери 2022-жылы Украинага каршы согуш ачкандан бери курал-жарагынын көптөгөн түрлөрүнөн – согуштук дрон, ракета, башкарылуучу авиабомба, жапырт аткылоочу реактивдүү система менен чабуул коюп келе жатат. Украинанын жайкын тургундары каза болуп, социалдык жана жарандык инфраструктурасы кыйрап жатканы тууралуу айыптоолорун орус бийлиги четке кагып келет. Киев жана эл аралык укук коргоо уюмдары Орусиянын соккуларын атайын жасалып жаткан согуш кылмышы деп баалашат.
Украинадагы соңку кырдаал (28-29-30-июлдагы маалыматтар)
Орусияда коргоо министринин мурдагы орун басары, генерал Дмитрий Булгаков кармалды. Бул тууралуу Тергөө комитети кабарлады. Маалыматка караганда, буга коррупция боюнча козголгон иш түрткү болду. ТАСС генерал Москвадагы "Бутырка" убактылуу кармоочу жайына киргизилгенин жазды.
Коргоо министрлигинде Булгаков материалдык-техникалык камсыздоо үчүн жооптуу болгон. Ал министрдин орун басары кызматын 2008-жылдан 2022-жылга чейин аркалаган. 2016-жылы ага Орусиянын Баатыры наамы ыйгарылган.
Буга чейин ири көлөмдөгү пара алууга шек саналып коргоо министринин мурдагы орун басары Тимур Иванов жана министрликтин кадрларды башкаруу бөлүмүнүн жетекчиси, генерал-лейтенант Юрий Кузнецов камалган.
Ал эми май айында Башкы штабдын жетекчисинин орун басары Вадим Шамарин колго түшкөн. Ал да ири көлөмдөгү пара алууга шек саналып жатат.
17-майда генерал-майор Иван Попов кармалган. Тергөөнүн версиясына караганда, ал Запорожье багытында тосмолорду курууга бөлүнгөн 1700 тонна металлды кымырып алууга шектелүүдө. Июль айынын ортосунда ал үй камагына чыгарылган.
Орусия Украинага кол салып, бастырып киргенден бери кеминде 61 009 орусиялык аскер мерт болду. Бул тууралуу Би-Би-Си менен "Медиазона" басылмасы ачык булактарга таянып чогуу аныктап чыкты.
Алардын маалыматына ылайык, набыт болгондордун дээрлик жарымы согуш башталганга чейин орус армиясы менен байланышта болгон эмес. Некрологдордун басымдуу бөлүгүндөгү алардын формачан эмес түшкөн сүрөттөрү тиркелген.
Би-Би-Си учурда расмий Москва согушка жаңы адамдарды тартуу аракетин жандантканын, Орусиянын кеминде он аймагында жаңы келишим түзгөндөргө төлөнчү акчанын көлөмү бир топ көбөйгөнүн билдирди.
Журналисттер согушта ажал тапкандардын аты-жөнүн, тек-жайын жергиликтүү бийликтердин айткандары, маркумдардын жакындары бөлүшкөн кабарлар, көрүстөндөр өңдүү ачык булактардан алынган маалыматтын негизинде тактап келет. Иликтөөчүлөр реалдуу сан кеминде мындан эки эсеге көп экенин белгилешет.
Москва менен Киев уруштагы жоготууларын ачыкка чыгарышпайт. Согушкан тараптар адатта өз жоготууларын азайтып, душмандыкын көбөйтүп көрсөткөнгө аракет кылат.