АКШ жана Улуу Британия санкциялык тизмени кеңейтип, ага Орусия менен Ирандын жаңы компанияларын, жеке адамдарды киргизди. Бул жолу санкцияга Орусиянын Аба-космостук күчтөрү, Аскердик-транспорттук авиация командачылыгы жана 924-мамлекеттик учкучсуз авиация борбору илинди.
Улуу Британия Орусиянын Аскер-деңиз флотунун "Скиф-В", "Муса Жалил", "Бегей", "Балтийский-111" жана "Омский-103" (акыркы эки кеменин аты санкциялык тизмеге ката менен киргизилген - ред.) деген аталыштагы беш транспорттук кемесин кошту. Американын тизмесинде дагы бир нече жарандык кемелер бар.
Чектөөлөргө Ислам революциясынын сакчылар корпусунун бир нече жогорку офицерлери жана Иран армиясы менен өлкөнүн коргонуу тармагындагы компаниялары дуушар болду. Британ өкмөтү өз билдирүүсүндө ушундай эле санкцияларды АКШ да киргизерин билдирди.
Британия Иран менен эки тараптуу аба каттамдары боюнча келишимдерди жокко чыгарып, Iran Air авиакомпаниясынын Британияга учуу мүмкүнчүлүгүн чектейт. Компания азыр Лондонго учат. Иран авиакомпанияларынын Европа Биримдигине каттамдарына да чектөөлөр киргизилери күтүлүүдө.
Америка Кошмо Штаттары Iran Air авиакомпаниясын америкалык жарандар жана компаниялар менен ар кандай карым-катнаштарга тыюу салган санкциялардын тизмесине киргизди. Орусиянын "Трансморфлот" кеме компаниясы да ошол тизмеде.
Американын санкциялык тизмесине Оля деңиз портунун башкы директору Жамалдин Пашев да илинген. Порт Волга боюнда, Волга-Каспий каналынын оң жээгинде жайгашкан. Ал аркылуу Орусия менен Ирандын ортосунда жүк ташылат.
Вашингтон бир нече айдан бери Иранга Москвага баллистикалык ракеталарды бербөөнү эскертип келген.
Буга чейин АКШнын чалгын кызматтары Түндүк Корея Орусияга Украинадагы согушка колдонуу үчүн курал-жабдык жана ракеталарды жөнөткөнүн аныкташкан. Иран дагы Орусияга "Шахед" дрондорун жөнөтүп, Кремлге учкучсуз аппараттарды чыгарган завод курууга көмөктөшкөнү кабарланган.
Подмосковьедеги дрондордун чабуулу, жарадарлар бар
10-сентябрда Москва облусундагы Раменский аймагында дрон көп кабаттуу үйгө тийген. Орус бийлиги чабуул үчүн Украинаны айыптады.
46 жаштагы бир адам каза таап, төрт адам жараат алды, үчөө ооруканага жеткирилгенин Подмосковья облусунун губернатору Андрей Воробьёв билдирди. Өрт толугу менен өчүрүлгөн.
Дрондун чабуулунан аз дегенде жыйырма батир талкаланып, алты балкон толугу менен күйүп кеткен. Дагы алтоонун айнеги күбүлүп түшкөн.
Украинага түнкү чабуул: 38 дрон атып түшүрүлдү
Украинанын аскер-аба күчтөрүнүн билдиришинче 10-сентябрга караганда Орусия Украинанын аймагын 46 дрон, эки ракета менен аткылады. 38 дрон атып түшүрүлдү. Абадан коргоо күчтөрү Украинанын 13 облусунда иштеген.
Черкас облусунда 14 дрон атып түшүрүлгөн. Дрондун сыныгынан эки адам жарадар болуп, аларга жардам көрсөтүлгөн.
Херсон облусундагы Понятовка айылында жүргүнчү ташыган автобуска учкучсуз учактан жардыргыч ыргытылган. Андан бир аял жараат алганын жергиликтүү бийликтен кабарлашты.
Бир жылда орус армиясында кызмат өтөө үчүн келишим түзгөндөрдүн саны алты эсеге өскөн. Бул тууралуу "Важные истории" басылмасы федералдык бюджеттин чыгашаларына таянып жазды.
Маалыматтарга караганда, өткөн жылдын биринчи жарымында 26 700 адам келишим түзгөнү үчүн бир жолку төлөм алса, быйылкы жылдын ушул мезгилинде алардын саны 166 миңге жеткен.
Келишим түзгөн аскерлердин санынын кескин өсүшү биринчи кезекте аларга төлөнүүчү акчанын көбөйүшүнө байланыштуу экени белгиленген.
Москвада Коргоо министрлиги менен келишим түзгөндөрдүн бир жолку сый акысынын өлчөмү 1,9 миллион рублга, Москва облусунда 1,7 миллионго, Ростов облусунда 1,2 миллионго, Башкырстан менен Дагестанда 500 миң рублга жеткен.
Ушуга байланыштуу апрель айынан июнга чейин эле дээрлик 93 миң киши орус армиясын менен келишим түзгөн.
Би-Би-Синин орус кызматынын жана "Медиазона" басылмасынын соңку эсебинде Орусия Украинага толук кандуу согуш ачкандан бери 61 009 орус аскери каза тапкан. Бул тек-жайы такталгандары гана. Каза тапкандардын саны мындан да көп болушу ыктымал.
Буга чейин "Медуза" жана SOTA басылмалары орусиялыктарга Украинадагы согушка чакырган СМС билдирүүлөр келип жатканын кабарлаган. Билдирүүдө "Коргоо министрлиги менен келишим түз. 800 миң рубль жана жеңилдиктер дароо берилет. 117ге чал!", - деп жазылган.