Украинада мамлекеттик жана аскер кызматкерлерине, коопсуздук жана коргоо мекемелеринде иштегендерге Telegram мессенжерин кызматтык телефонуна жана башка каражаттарына орнотуп, колдонууга тыюу салынды. Мындай чечим өлкөнүн Киберкоопсуздук боюнча улуттук координациялык борборунун отурумунда кабыл алынганын 20-сентябрда Улуттук коопсуздук жана коргоо кеңеши билдирди.
Мындай чечим коркунучтарды азайтуу максатында кабыл алынганы белгиленди.
Аскердик чалгын мекемесинин башчысы Кирилл Буданов аталган мессенжердин колдонуучуларынын кат алышуусу, жеке маалыматы орусиялык атайын кызматта бар болушу ыктымал экенин айтты.
Башкы штабдын жана Коопсуздук кызматынын адистери Орусия бул мессенжерди киберчабуул жасоо, колдонуучулардын геолокациясын билүү жана ракеталык соккуларын тууралоо үчүн колдонорун билдиришти.
Telegram бул боюнча азырынча расмий комментарий бере элек.
Аталган байланыш түйүнүн 2013-жылы орусиялык ишкерлер Павел жана Николай Дуровдор негиздешкен. Компаниянын кеңсеси азыр Дубайда жайгашкан. Павел Дуров мессенжердин коолдонуучулары тууралуу маалымат алууга аракет кылган мамлекеттердин жана атайын кызматтардын басымына кабылып турарын айткан.
Орусияныкынан тышкары Франциянын, Бириккен Араб Эмирликтеринин, жана Сент-Китс жана Невис федерациясынын жарандыгына ээ Павел Дуров өзү Францияда август айынан бери тергөө алдында. Ага өлкөдөн чыгууга тыюу салынган. Француз бийлиги Дуровду жашы жете электер аралашкан порнография, маңзаттын мыйзамсыз жүгүртүлүшү жана алдамчылык кылмыштары тууралуу маалыматты полициянын жана атайын кызматтын талабы боюнча ачыктоодон баш тарткан деген мазмундагы бир нече кылмышка айыптоодо.
Дуров камакка алынгандан кийин орусиялык күч кызматтары менен байланышы бар экени айтылып жүргөн "База" басылмасы Орусиянын бир катар күч органдарынын, президенттик жана өкмөттүк администрациялардын кызматкерлерине Telegram аркылуу жазышкандарынын баарын өчүрүү талабы коюлганын жазган.
Украина: Сумыда карылар үйүнө сокку урулуп, киши өмүрү кыйылды
Бейшемби күнү орус армиясынын чабуулунан Украинанын Сумы шаарындагы улгайган адамдар дарыланчу пансионат зыян тартты. Соңку маалыматтарга караганда, бир киши каза болду, 13ү жараат алды. Алардын айрымдарынын абалы оор экени кабарланды. Жараат алгандардын дээрлик бардыгы улгайгандар. Аталган жайда 200дөй киши туруктуу жашап келген.
Облустук аскердик администрациянын белгилешинче, орус армиясы пансионатты башкарылчу авиациялык бомба менен атайын бутага алган.
Украинанын президенти Владмир Зеленский окуя тууралуу айтып, "Орусиянын бул жер аскер базасы, аскердик объект эмес, анда улгайган адамдар жашай турганын билбей калышы мүмкүн эмес эле", - деген.
Орусиянын Коргоо министрлиги сокку тууралуу комментарий бере элек.
Сумы облусу укриан армиясы 6-августта кирип барган Орусиянын Курск облусу менен чектешет. Владимир Зеленский Украинада Орусиянын жерин ээлеп алуу ниети жок экенин, бирок сүйлөшүүлөрдө, туткун айырбаштоодо көбүрөөк мүмкүнчүлүк алууга жол ачыларын айткан. Ошол эле маалда украин армиясы Курск аймагына киргенден бери аткылоо бир топ күчөгөн.
Сумынын администрациясы жалпысынан алты миңдей адам жашаган 23 конуш милдеттүү түрдө эвакуацияланганын жарыялады. Сумыда балдар үйү жана реабилитациялык борбор ракеталык чабуулга кабылды. Бир күн мурун энергетикалык объектиге жасалган соккудан кийин шаар дээрлик толугу менен жарыксыз калган.
Индиянын артиллериялык снаряддары Украинага жеткирилип турган
Индиянын артиллериялык снаряддарынын Украинага европалык ортомчулар аркылуу берилип жатканы тууралуу билдирүүлөр Орусия менен Индиянын ортосунда чыңалууну жаратууда деп жазат Америкалык согушту изилдөө институту (ISW) өзүнүн жаңы отчетунда.
Ал эми Reuters агенттиги 19-сентябрда индиялык жана европалык 11 чиновникке жана коргонуу тармагындагы анонимдүү булактарга шилтеме берип, Украинага индиялык артиллериялык снаряддар европалык ортомчулар аркылуу Орусиянын каршылыгына карабастан бир жылдан ашык убакыт бою жеткирилип келгенин маалымдады. Ага ылайык, Нью-Дели Москвадан түшкөн нааразылыктарга карабай, бул сооданы токтотуу үчүн аралашкан эмес.
Бирок 19-сентябрда Индиянын Тышкы иштер министрлиги Reuters агенттигинин маалыматын «болжолдуу жана адаштыруучу» деп четке какты.
Индиянын премьер-министри Нарендра Моди август айында Украинага барган. Визит учурунда ал Индия Украинада тынчтыкка дипломатиялык жол менен жетүүнү жактай турганын, ошол эле учурда мамлекеттин суверенитетин жана аймактык бүтүндүгүн урматтоону колдоорун билдирген.
Bloomberg басылмасы Модинин Киевге визити Вашингтон менен Москва ортосундагы байланышты тең салмактоо аракети экенин жазган.
Ага чейин июлда Моди Орусияга визит жасаган. Индиялык маалымат каражаттарынын маалыматы боюнча, ал Орусия лидери Владимир Путин менен орусиялык армияга жаңылыш кирип калган индиялык жарандардын бошотулушу тууралуу сүйлөшкөн.
Бул визитти Украина президенти Владимир Зеленский сынга алган.
Индия Вашингтон менен мамилелери чыңалып жатканына карабастан, Москвага каршы батыштын санкцияларына кошулуудан баш тартып, Орусия менен арзан мунай булагын алууда кызматташып келет.
Европарламент Украинага Орусиянын алыскы аймактарына сокку урууга уруксат берүүгө чакырды
Бул тууралуу резолюцияны Европарламент 19-сентябрдагы резолюция кабыл алды. Парламентарийлер ЕБ мамлекеттерин алар Украинага берген куралдарды Орусиянын аймагындагы мыйзамдуу аскердик буталар үчүн колдонууга коюлган чектөөлөрдү алып салууга чакырды.
Бул документти Европарламенттин 425 депутаты колдоп добуш берди, 131 каршы болуп, 63ү калыс калышты.
Резолюциянын текстинде, эгерде чектөөлөр алынбаса, Украина өзүн коргоо укугунан толук кандуу пайдалана албай калары, орус чабуулдарынын, анын ичинде жарандык буталарга соккулардын алдында калып кетери айтылган.
Ошондой эле резолюцияда Евробиримдик өлкөлөрүнүн Украинага аскердик жардам көрсөтүүсүнүн көлөмүнүн азайып жатканына тынчсыздануу билдирилген. Документте Германиянын Киевге "Taurus" ракеталарын берүүдөн бир нече жолу баш тартканы өзүнчө белгиленген.
Европарламент депутаттарынын пикиринде, Евробиирмдикке мүчө мамлекеттер жана НАТО боюнча союздаштар Украинага аскердик жардам берүү боюнча өздөрүнө милдеттенме алып, жыл сайын өз ИДПсынын 0,25 пайызынан кем эмес каражат бөлүүгө тийиш.