Украинанын куралдуу күчтөрү: Үч айда орусиялык 4 миңдей дрон өлкө аймагына чабуул койду
"Август айында сентябрь жана октябрда орусиялык аскерлер Украинага каршы 4300 дронду колдонду, анын 71%, тагыраагы 3063ү атып түшүрүлдү. 24% түзгөн 1052 дрон радиоэлектрондук тоскоолдуктун жана башка себептердин негизинде радардан жоголду. Бутага таамай тийгени 5% түздү" деп айтылат билдирүүдө. Октябрь дрондор эң көп учурулган ай болуп калды, орусиялык күчтөр коңшу өлкөнү карай баш-аягы 2072 дрон менен чабуул койгон.
Украинанын аскер аба күчөрүнүн учкучсуз учактары биринчи жолу Дагестанга чабуул койду. Махачкаладагы аэропорт ишин токтотту. Аймактын башчысы Сергей Меликов дрон атып түшүрүлгөнүн, республиканын жашоочуларын коргоо үчүн чаралар көрүлүп жатканын билдирди.
Орусияда президент Владимир Путиндин Украинадагы согушка катышкандарга жана алардын үй-бүлө мүчөлөрүнө паспорт берүүгө жол ачуучу жарлыгына ылайык, быйыл жыл башынан бери 3344 чет өлкөлүккө орус жарандыгы берилди. Бул тууралуу Орусиянын Ички иштер министрлигинин расмий өкүлү Ирина Волк билдирди.
Бул аскер кызматкерлеринин гана саныбы же алардын жакындарын кошкондогу жалпы көрсөткүчпү, Волк тактап айткан жок.
Путин орус армиясы же орусиячыл аскердик түзүмдөр менен бир жылдык келишим түзгөн аскер кызматкерлерине жарандык ыйгаруу тууралуу мыйзамга 2022-жылы кол койгон.
Украинага каршы согуш ачкандан бери Орусияда бул өлкөнүн паспортун алып, бирок аскердик каттоого турбай койгондорду жарандыктан ажыратуу боюнча да мыйзам кабыл алынган. Быйыл сентябрь айында Ички иштер министрлиги (ИИМ) бул мыйзам аткарыла баштаганын билдирген.
Орусиянын жарандыгын алган чет өлкөлүктөрдү паспортунан ажыратууга негиз болуучу себептер тизмеси кеңейтилген. ИИМдин маалыматына караганда, быйыл сегиз айда 1117 киши Орусиянын жарандыгынан ажыратылды.