31-январда кечинде Орусиянын армиясы Украинанын Одесса облусуна ракетадан сокку уруп, жети киши жараат алды, тарыхый жай зыян тартты. Бул тууралуу облустук администрациянын башчысы Олег Киперге шилтеме кылып “Свобода” радиосу жазды.
Анын айтымында, жараат алгандардын бардыгы ооруканага жаткырылды, алардын абалы орточо оор деп бааланып жатат. Каза болгондор жок экени кабарланды.
Украинанын президенти Владимир Зеленский сокку урулган аймакта норвегиялык дипломаттар дагы болгонун билдирди.
Мындан сырткары Орусия армиясынын соккусунан ЮНЕСКОнун коргоо аймагындагы бир нече имарат зыян тартты. Алардын катарында музей, филармония жана XIX кылымда курулган “Бристоль” тарыхый мейманкана дагы бар.
Зеленский орус тараптын Одессадагы тарыхый жайларды аткылоосун “атайылап жасалган сокку” деп атады.
Украинанын ыктыярчылардан турган “Юг” армиясынын өкүлү Сергей Братчук Орусия оккупацияланган Крым аймагынан болжол менен "Искандер-М" ракетасы менен атканын белгиледи.
Учурда чабуулдун жагдайлары дагы такталып жатканы кабарланды. Аскерий кылмыш беренеси боюнча иш козголду.
Орусиянын Коргоо министрлиги соңку чабуул тууралуу комментарий бере элек.
Орусия Украинага ар тараптан басып кирип, согуш ачканына үч жылга чукулдады. Бириккен Улуттар Уюмунун (БУУ) эсебинде, 2024-жылдын ноябрь айына карай Украинада 12 миңдей адамдын өмүрү кыйылып, жараат алгандардын саны 27 миңге жеткен. Эл аралык уюм бул сан толук эмес экенин эске салган.
Украина: Покровск багытында чабуул күчөдү
Орусиянын армиясы фронтто Покровск багытында чабуулдарын күчөткөнүн Украинанын аскердик жетекчилиги ырастады. Орус күчтөрү Донецк облусундагы маанилүү байланыш борбору деп саналган шаарды жарым жылдан бери өз карамагына алуунун аракетин көрдү.
Дээрлик ээн калган Покровск шаарынын тургундары соңку кездери жер төлөлөрдөн сейрек чыгат. "Дрондор учуп келип жарылып жатат, кээде так жаныңа түшөт. Чатыр титиреп, шыптын баары урап, түнү тынч уктай албайсың. Коркунучутуу эле", - деди жергиликтүү тургун Элла Коломецова.
Соңку айда орус армиясы Покровскиге дрон чабуулун күчөттү. Көчөлөрдүн тамтыгы чыкты. Тегеректеги имараттардын баары урандыга айланган. Жардыруудан улам жолдор асты-үстү болуп аңтарылган. Шаар көптөн бери суу жана электр жарыгынын өксүп турат. Эки күн мурда калаадагы акыркы почта бөлүмү жабылды. Буга карабай калаадан кеткиси келбегендер көп.
Покровск шаардык аскердик администрациянын башчысы Сергей Добряктын маалыматына караганда, согушка чейин 60 миң киши жашаган калаада учурда жети гана миңдей киши бар. Айрым аналитиктердин божомолунда, орус армиясы түндүккө же батышка карай багыт алуу үчүн Покровскини плацдарм катары колдонушу мүмкүн.
"Эгер орус армиясы маселен, батыш тарапка Днепрды көздөй багыт алгысы келсе же түндүктөгү Славянск менен Краматорскиге чабуул коюуну пландаса анда, албетте, Покровскини өз карамагына алышы керек. Азыр орус аскерлери артиллерия менен аткылагыдай аралыкка жакындап, дрондор менен чабуул коюп жаткан шартта бул калаа украиндер үчүн мурдагыдай маанилүү байланыш түйүнү деле болбой калды. Аны логистикалык борбор катары колдонуу мүмкүн эмес. Анткени орус аскерлери такай аткылап, бутага алып турушат", - деп түшүндүрдү аскердик аналитик Паси Паранойен.
Ал украин армиясы Покровск фронтунда орус аскерлеринин чакан чабуулдарына дагы араң туруштук берип жатканын кошумчалайт. Себеби украин армиясы учурда жоокердин жетишсиздигинен бир топ кыйналып турат. Ошентсе да жакында эле украин президенти Владимир Зеленский жогорку даражалуу генералдардын бири Михаил Драпатыйды стратегиялык командалык үчүн жоопкер кылып дайындады. Ал Покровск үчүн да жооп берет.
"Эгер биз жакшы, күчтүү, негиздүү аскердик контрсокку урсак, ал Орусиянын аскердик жана саясий бийлигинин кыйроосуна жеткирет. Биз ага даярбыз", - деди украин армиясынын генералы Михаил Драпатый.
Орус армиясы былтыр февралда Авдеевканы өз карамагына алгандан кийин эле Покровскиге чабуулдарын баштаган. Ал арада Украинанын башка аймактары дагы дээрлик күн сайын дрон чабуулдарына дуушар болууда. 31-январда Одесса облусуна жасалган чабуулдан оорукана, дан кампасы жабыркап, төрт киши жараат алды.
Киев жана эл аралык уюмдар жайкын тургундарга, оорукана, мектеп жана маанилүү инфраструктурага мындай соккуларды согуш кылмышы деп сыпаттайт.
Орусиянын Коргоо министрлиги карапайым тургундар жашаган аймактарды эмес, аскердик жайларды бутага алганын билдирип келет. Ал эми карапайым тургундардын өлүмү тууралуу же үн катпайт, же украиндердин абадан коргонуу системасына шылтап коет.
Украинанын Сумы шаарында каза тапкандар 9 кишиге жетти, 13 тургун, анын ичинде жашы жете элек бала жарадар болду. Украинанын президенти Владимир Зеленский орус армиясынын 30-январдагы соккусун “үрөй учурган трагедия” деп атады.
“Дүйнө Орусияга жасаган террору үчүн басымды токтотпошу керек”, - деп билдирди Зеленский.
Өлкөнүн Башкы прокуратурасы маалымдагандай, өлгөндөрдүн арасында 61-74 жаштагы үч түгөй бар.
Дрон көп кабаттуу үйгө тийгенде беш батир кыйраган. Балкон, терезелер, көчөдөгү машиналар талкаланды. Соккудан кийин суу, электр энергиясы, жылуулук системасы жарактан чыкты.
Киев жана эл аралык уюмдар жайкын тургундарга, оорукана, мектеп жана маанилүү инфраструктурага мындай соккуларды согуш кылмышы деп сыпаттайт.
Орусиянын Коргоо министрлиги карапайым тургундар жашаган аймактарды эмес, аскердик жайларды бутага алганын билдирип келет. Ал эми карапайым тургундардын өлүмү тууралуу же үн катпайт, же украиндердин абадан коргонуу системасына шылтап коет.