Америка Кошмо Штаттарынын президенти Дональд Трамп жана Орусиянын мамлекет башчысы Владимир Путин 12-февралда телефондон сүйлөштү. Дональд Трамп өзүнүн Truth Social социалдык түйүнүнө орус лидери менен “узак жана өтө майнаптуу баарлашуу” болгонун жазды.
“Биз орус-украин согушунда болуп жаткан миллиондогон адамдардын өлүмүн токтотууну каалайбыз, буга экөөбүз тең макул болдук... Биз бири-бирибиздин өлкөлөрүбүзгө баруу менен абдан тыгыз иштешүүнү макулдаштык. Ошондой эле биздин тиешелүү командалар сүйлөшүүлөрдү токтоосуз баштоого макул болдук жана Украинанын президенти Зеленскийге телефон чалып баштайбыз”, - деди Трамп.
АКШ президенти ошондой эле Украина менен Орусиянын ортосунда тынчтык келишимин түзүү боюнча сүйлөшүүлөрдү жүргүзө турган командасынын курамын жарыялады.
Ага мамлекеттик катчы Марко Рубио, Борбордук Чалгын кызматынын (ЦРУ) башчысы Жон Рэтклифф, Трамптын улуттук коопсуздук боюнча кеңешчиси Майкл Уолтц жана Жакынкы Чыгыш боюнча атайын чабарманы Стив Уиткофф кирди.
Путин менен Трамптын сүйлөшүүсү дээрлик бир жарым саатка созулганын орус президентинин басма сөз катчысы Дмитрий Песков билдирди. Ал Путин Трампты Москвага чакырганын айтты.
Көп өтпөй Украинанын президенти Владимир Зеленский Дональд Трамп менен телефондон “дипломатиялык, аскердик, экономикалык” маселелерди талкуулаганын кабарлады.
Кремлдин басма сөз катчысы Дмитрий Песков Орусия менен Украинанын ортосунда "аймактарды айырбаштоо мүмкүн эмес" деп билдирди. Анын айтымында, Москва өз жерлерин алмаштырууну эч качан талкуулаган эмес жана мындан ары да талкуулабайт.
"Украин күчтөрү ал аймактардан сүрүлүп чыгат. Жок кылынбагандар куулат", - деп айтты Песков.
Мунун алдында украин президенти Владимир Зеленский Орусия менен сүйлөшүүлөр болуп калса, Курск облусунун украин армиясы көзөмөлдөгөн жерлерин орус күчтөрү басып алган аймактарга айырбаштоону сунуш кылышы мүмкүн деп айткан.
Президент Орусия менен сүйлөшүүгө даярдыгын, ал үчүн Украинанын күчтүү позицияда болушун кааларын белгиледи.
Былтыр 6-августта украин армиясы Орусиянын Курск аймагына кирип барып, аймактын жарымын өз карамагына алган. Орус күчтөрү айрым райондорду кайтарууга жетишкен, бирок бир нече айыл-кыштак, анын ичинен Суджа районунун борбору украин аскерлеринин көзөмөлүндө калууда.
Зеленский бул операцияны Харьковдон орус ракеталарын оолактатуу үчүн буфердик зона түзүү аракети катары түшүндүргөн.
Ал эми Орусия аннексияланган Крымдан тышкары Донбасстын ири бөлүгүн, Херсон жана Запорожьенин кээ бир райондорун басып алган.
Кремль Киев менен сүйлөшүү жүргүзүү үчүн учурдагы реалдуулукту эске алыш керек деп буга чейин билдирген.
Украинанын президенти Владимир Зеленский Орусия менен сүйлөшүүлөр болуп калса, Курск облусунун украин армиясы көзөмөлдөгөн жерлерин орус күчтөрү басып алган аймактарга айырбаштоону сунуш кылышы мүмкүн. Бул тууралуу ал британиялык The Guardian гезитине берген маегинде айтты.
"Биз бир аймакты башкасына алмаштырабыз. Кайсынысына экенин азырынча билбейм, аны көрөбүз, бизге бардык жерлерибиз маанилүү, артыкчылыктуу деп айырмаланганы жок", - деп белгиледи Зеленский.
Президент Орусия менен сүйлөшүүгө даярдыгын айтып, ал үчүн Украинанын күчтүү позицияда болушун кааларын айтты.
Зеленскийдин айтымында, согушту токтотуу үчун Киев Европадан гана эмес, АКШдан да коопсуздук кепилдиктерин алууга тийиш.
Буга чейин АКШ президенти Дональд Трамптын улуттук коопсуздук боюнча кеңешчиси Майкл Уолтц Вашингтон урушту токтотууга кызыкдар экенин, бирок коопсуздукту кепилдөө маселеси Европага жүктөлөрүн билдирген.
Трамп Ак үй Украинага аскердик жардам берүүгө даяр деп, бирок ал үчүн өлкөдөн сейрек металлдарды сураган.
Bloomberg агенттиги АКШнын финансы министри Скотт Бессент ушул аптада Киевге барып, бул маселени талкуулай турганын жазды.
Зеленский айдын башында Украина металлдарды казуу тармагында кызматташууга даяр деп айткан.
Былтыр 6-августта украин армиясы Орусиянын Курск аймагына кирип барып, аймактын жарымын өз карамагына алган. Орус күчтөрү айрым райондорду кайтарууга жетишкен, бирок бир нече айыл-кыштак, анын ичинен Суджа районунун борбору украин аскерлеринин көзөмөлүндө калууда.
Зеленский бул операцияны Харьковдон орус ракеталарын оолактатуу үчүн буфердик зона түзүү аракети катары түшүндүргөн.
Ал эми Орусия аннексияланган Крымдан тышкары Донбасстын ири бөлүгүн, Херсон жана Запорожьенин кээ бир райондорун басып алган.
Кремль Киев менен сүйлөшүү жүргүзүү үчүн учурдагы реалдуулукту эске алыш керек деп буга чейин билдирген.
Украинанын өзгөчө кырдаалдар кызматы борбор калаа Киевде 12-февралга караган түнү орус армиясынын ракеталык соккусунан бир кишинин өмүрү кыйылганын тастыктады.
Маалыматта айтылгандай, Киевдин Оболонский районунда ири өрт тутанды, кеңселер жайгашкан имараттын жети кабаты күйүп, ал жерде бир адам каза болду.
Шаар мэри Виталий Кличко үч адам жабыркап, анын ичинде тогуз жаштагы кыз ооруканага жеткирилгенин билдирди.
Киевдин Голосеев районунда 600 чарчы метр аянтты ээлеген эки кабат кампа күйүп жатканы маалымдалды. Соломенский районунда көп кабаттуу үйдүн чатырынан өрт чыкты.
Мэр Дарницкий районунда менчик ишкананы өрт чалганын кошумчалады.
Украинанын куралдуу күчтөрү Киев жана Кривой Рог шаарларына “Искандер” баллистикалык ракеталар менен сокку урулганын аныктады. Алтоо Брянск облусунан, бирөө аннексияланган Крымдан учурулганы, украин аймагына коюлган чабуулга андан тышкары жүздөн ашуун дрон тартылганы маалымдалды.
Киев облусунун Борисполь районунда учкучсуз учактын сыныктарынан тогуз жер там жана бир машина зыян тартты.
Кривой Рогдо көп кабаттуу үч турак жай жана административдик имараттарга залака тийди, бирок жабыркагандар болбогону кабарланды.
Украин президенти Владимир Зеленский башкалаага урулган таңкы соккуларды Орусиянын Украинага каршы террору деп атады:
“Путин тынчтыкка умтулган жок, ал адамдарды өлтүрүүнү, шаарды талкалоону улантууда”, - деп айтты украин лидери.
Орусиялык мамлекеттик медиа Киевдеги кампада өрт болгонун жазып, шаар ракета соккусуна кабылганын кабарлаган эмес.
Орусиянын Коргоо министрлиги чабуулдар тууралуу колмментарий кыла элек.
Далилдерге карабай Москва кошуна өлкөсүнүн жарандык инфраструктурасын, карапайым адамдарды бутага алганын танууда.