Орусиялык дрондор 12-апрелге караган түнү Киевге чабуул коюп, эки райондо өрт чыкты. Шаар мэри Виталий Кличко үч адам жабыркаганын билдирди.
"Бирөөнү ооруканага жаткырып, экөөнө жеринде жардам көрсөтүлдү", - деди Кличко.
Облустук администрациянын билдиришинче, бир сааттан ашуун абадан эскертүү берилген. Святошино районунда үч имараттын кампасында өрт чыгып, атып түшүрүлгөн дрон сыныгы балдар аянтчасына түшкөн.
Дрондор чабуулуна кабылган Днепропетровск облусунда бир түн ичинде 17 дрон атып түшүрүлгөн.
Украинанын Аскер аба күчтөрүнүн маалыматында, бир түндө Украинанын жалпы аймагына 88 орусиялык учкучсуз учак сокку урган. 56 дрон атып түшүрүлүп, көз жазгыра турган учкучсуз учактын 24ү максатына жеткен эмес.
Орусиянын Санкт-Петербург шаарында орус президенти Владимир Путиндин АКШнын президентинин атайын чабарманы Стив Уиткофф менен жолугушуусу өттү. 11-апрелдин кечиндеги жолугушуу жалпысынан 4,5 саат уланды.
Расмий сүрөткө түшүүдөн кийин Путин менен Уиткофф өзүнчө жабык жолугушууга жөнөштү. Кремлдин басма сөз катчысы Дмитрий Песков талкуулана турган маселе Украина болорун, андан кийин, балким, Путин Трамп менен телефон аркылуу сүйлөшүшү мүмкүн экенин айткан. Андай сүйлөшүү болдубу, жокпу, азырынча маалымдала элек.
АКШ администрациясынын басма сөз катчысы Кэролайн Ливитт брифингде Уиткоффтун Орусияга сапарын “тынчтыкка карай дагы бир кадам” деп атаган.
Трамп президенттик кызматка киришкенден бери бул Уиткоффтун Орусияга үчүнчү сапары.
Путин менен жолугушууга чейин Трамптын атайын чабарманы Путиндин чет өлкөлөр менен кызматташтык боюнча өкүлү Кирилл Дмитриев менен жолугушту. Алар өткөн аптада да Вашингтондо сүйлөшүү өткөрүшкөн.
АКШнын президенти Дональд Трамптын Жакынкы Чыгыш боюнча атайын өкүлү Стив Уиткофф Орусияга барды. Бул тууралуу алгач Axios басылмасы өз булагына жана FlightRadar24 кызматынын маалыматына таянып кабарлады. Кийинчерээк бул маалыматты Кремлдин басма сөз катчысы Дмитрий Песков ырастады.
Уиткофф Орусиянын президенти Владимир Путин менен жолугушуусу мүмкүн.
"Эгерде Путин Уиткофф менен жолукса, Кремль бул тууралуу маалымат берет", – деп билдирди Песков.
Бул Уиткофф менен Путиндин үчүнчү жолу жолугушуусу болот. Axios басылмасынын булагы билдиргендей, эгерде айдын аягына чейин ок атышууну токтотуу боюнча келишим жетишилбесе, анда президент Трамп Москвага карата кошумча санкцияларды киргизиши мүмкүн.
Март айынын аягында Уиткофф Вашингтондо Орусиянны Түз инвестициялар фондунун башчысы Кирилл Дмитриев менен жолукканы кабарланган.
Жолугушуудан кийин Дмитриев Трамптын администрациясынын негизги мүчөлөрү менен сүйлөшүүлөр болгонун жана эки өлкө ортосундагы диалогду калыбына келтирүү маселеси талкууланганын билдирген.
Анын айтымында, тараптар Арктикадагы кызматташтык, сейрек кездешүүчү металлдар жана Орусия менен АКШнын ортосундагы түз аба каттамдарын жандандыруу мүмкүнчүлүгүн талкуулашкан.
10-апрелге караган түнү орус армиясы Иранда жасалган “Шахед” түрүндөгү жанкечти дрондор менен Украинанын Киев жана Николаев шаарларына абадан сокку урду. Жергиликтүү бийликтин маалыматына караганда, бир катар жайкын тургундар жабыркап, турак жайлар жана башка имараттар талкаланды.
Киев шаарынын администрациясы дрон соккусунан жарандык жайлар жабыркаганын маалымдады. Киев облусунун акими Тимур Ткаченко Дарница районунда дрон сыныктары кулап, жеке менчик имарат кыйраганын, бир адам урандылардын алдында калышы мүмкүн экенин билдирди. Окуя болгон жерге Өзгөчө кырдаалдар кызматынын куткаруучулары жөнөтүлгөн.
Кийинчерээк маалым болгондой, Дарница районунда бир катар үйлөр жана автоунаалар зыянга учурап, чарбалык курулуш толугу менен күйүп кеткен. Эки аялга жеринде медициналык жардам көрсөтүлгөн.
Ошондой эле Голосеев районунда дрон сыныктары кампалар жайгашкан аймакка кулап, өрт чыккан. Киев шаарынын мэри Виталий Кличконун айтымында, тилсиз жоо толук өчүрүлдү.
Николаев облусунун администрациянын башчысы Виталий Ким билдиргендей, дрон чабуулунун натыйжасында эки жерде өрт чыккан. Он адам ар кандай деңгээлдеги жараат алып, үчөө ооруканага жаткырылган.
Ким кошумчалагандай, соккулардан үч автоунаа, 30 гараж жана бир административдик имарат да жараксыз абалга келди.
Орусиянын Коргоо министрлиги адатта аскердик жайларды гана бутага аларын билдирип, карапайым тургундар жашаган аймактарга сокку урганын четке кагып келет.