"Орус ыктыярчылар корпусу" (РДК) уюмдун негиздөөчүсү жана командири Денис Капустин Запорожье багытында "согуштук тапшырманы аткарып жатып" окко учканын билдирди.
Алдын ала маалыматтарга караганда, 41 жаштагы Капустин түн ичинде FPV-дронунун соккусунан мерт болгон.
"Окуянын чоо-жайы кийинчерээк жарыяланат, учурда эмне болгонун тактоо иштери жүрүп жатат", - деп кабарлады РДКнын Telegram-каналында.
Орусиянын жараны Денис Капустин 2017-жылы Киевге көчүп барган. Согушка чейин ал оңчул көз караштагы адамдар үчүн мушташ клубдарын уюштуруп келген. White Rex деген каймана ат менен таанымал Капустин өзү дагы ашынган оңчул көз караштагы адам болгон.
Мындай ишмердүүлүгү үчүн 2019-жылы Капустинге Шенген аймагына кирүүгө 10 жылга тыюу салынган. Bellingcat иликтөөчү тобу кийин ал тыюуга карабастан Германия менен Францияга барганын аныктаган.
2022-жылы Капустин жалаң орус жарандарынан турган "Орус ыктыярчылар корпусун" түзгөн. РДК уюму Украина тарапты жактап, азыркы орус бийлигине армиясына каршы күрөшө турганын билдирген. Орусия РДКны террордук уюм катары тааныган.
- 2023-жылдын апрелинде РДКнын Брянск облусуна чабуулунан кийин Денис Капустин Орусиядагы террорчулар жана экстремисттер тизмесине киргизилип, федералдык издөөгө алынган. "Орус ыктыярчылар корпусу" андан кийин да бир канча жолу Украинага чектеш Орусиянын аймактарына чабуул койгон.
- 2023-жылдын ноябрь айында Орусиядагы сот Капустинди сыртынан өмүр бою эркинен ажыраткан чечим чыгарган. Тирүү кармалса, ал өзгөчө режимдеги колонияда жазасын өтөмөк. Орус соту аны мамлекеттик чыккынчылыкка, террордук аракеттерге, террордук ишмердүүлүккө үйрөтүүгө, террордук коомчулук түзүүгө жана жардыргыч заттарды мыйзамсыз сатып алууга айыптуу деп тапкан.
Украинанын Куралдуу күчтөрүнүн Башкы штабы орус армиясынын Гуляйполе жана Мирноград шаарларын алганы тууралуу кабарларды төгүндөдү.
Украин тарап орус армиясынын өкүлдөрү жана президент Владимир Путиндин Запорожье облусундагы Гуляйполе жана Донецк облусундагы Мирноград шаарларын ээледи деген билдирүүлөрү ырасталбаганын кабарлады.
"Гуляйполеде абал оор болгону менен коргонуу операциясы уланып жатат. Украинанын жоокерлери баскынчылардын калаадагы жөө аскерлерин жок кылуу операцияларын жигердүү жүргүзүүдө. Мирноградда да кырдаал оор, бирок душмандын Покровск-Мирноград агломерациясын басып алуу планы жүзөгө аша элек, мындан улам алар дезинформацияны курал катары колдонууга аргасыз", - деп жазылган маалыматта.
Украина Орусиянын Донецк облусундагы Костантиновка шаарынын жарымын көзөмөлгө алдык деген маалыматы да чындыкка жатпай турганын айтууда.
Мындан тышкары Башкы штаб Купянск шаарын ээлегенин да орус тарап бир нече жолу жарыялаганын эске салды. Иш жүзүндө Украинанын күчтөрү Купянскини орус аскерлеринен тазалап жатканын, калааны былтыркы сентябрдан бери алуу аракети ишке ашпай келатканын билдирди.
Орусиянын Коргоо министрлиги 27-декабрда Украинанын аймагына жапырт чабуул жасалганын кабарлап, үндүн ылдамдыгынан да тез учуучу жана аэробаллистикалык ракеталар, согуштук дрондор колдонулганын билдирди.
Мекеме бутага "украин аскерлеринин кызыкчылыгы үчүн колдонулуучу" энергетикалык инфраструктура объектилери, аскердик өнөр жай комплексинин ишканалары алынганын, максатына жетишкенин кабарлады.
Украинанын президенти Владимир Зеленский ишембиге караган түнү жана эртең менен Орусия 500дөй учкучсуз учак, 40 ракета, анын арасында "Кинжалдарды" учурганын, негизги бутага борбор калаа Киев, энергетика жана жарандык инфраструктура алынганын билдирген.
Киевдин мэри Виталий Кличко шаарда жапырт аткылоодон жараат алгандар 27 кишиге жеткенин, Киев облусунда 47 жаштагы аял каза тапканын, жабыркагандар арасында балдар да бар экенин маалымдады.
Украин борбор калаасында жалпысынан 11 саат абадан коркунуч тууралуу эскертүү берилип жатты.
Днепров, Дарница, Десна, Оболонь, Шевченко райондорунда көп кабаттуу үйлөрдө өрт чыкканы, сыныктар тийип, жабыркаганы белгилүү болду.
Ал тапта украин президенти Владимир Зеленский АКШга баратып жолдон Канадада токтоп, бул өлкөнүн премьер-министри Марк Карни менен жолугушуу өткөрөрүн «РБК-Украина» жазды.
«Биз Европа лидерлери менен чогуу онлайн сүйлөшөбүз деп пландап жатабыз, мен АКШ президенти менен талкуулай турган документтердин деталдарын, бардык маселелерди карап чыгабыз», — деди ал.
Зеленский менен Трамптын кезектеги жолугушуусу 28-декабрда Флоридада өткөнү жатат.
Украин лидери буга чейин америкалык делегация менен өткөн сүйлөшүүлөрдө согушту токтотуу планынын 90% макулдашууга жетише алышканын айткан.
АКШ президенти Politico басылмасына «Анда эч нерсе жок, мен жактырмайынча... Эмнени сунуштайт болду экен, көрөбүз», - деп билдирген.
Ошондой эле Трамп Зеленский менен жемиштүү жолугушуу болорун күтүп жатканын айтты.
Politico жазгандай, бул жолку жолугушууда АКШнын коопсуздук кепилдиктери, Запорожье атомдук электр станциясын башкаруу жана Москва өз карамагына алууну көздөп жаткан Донбасстын аймактарын көзөмөлдөө талкууланалары күтүлүүдө.
Орусия коңшусу Украинага каршы толук масштабдуу согуш ачканына төрт жылга жакындады. Украинада дээрлик күн сайын жайкын тургундар, анын ичинде балдар каза болуп, жараат алып, бутага жарандык инфраструктура алынарын Москва танып келет.
Украинада 24-декабрга караган түнү Орусиянын соккусунан айрым жерлерде адамдар жабыркап, имараттар зыянга учурады. Запорожье шаарында көп кабаттуу үйлөрдүн кеминде 13ү дрон соккусуна кабылып, терезе, балкондору талкаланганын жергиликтүү бийлик башчысы Иван Федоров маалымдады.
Анын айтымында, үч киши жараат алып, дарыгерлерге кайрылды. Алар 75 жана 35 жаштагы эки аял, 46 жаштагы бир эркек тургун.
Ал тапта Орусиянын борбор калаасы Москвага өткөн түнү да согуштук дрондор учурулганы белгилүү болду. Калаа мэри Сергей Собянин кеминде үч учкучсуз учак атып түшүрүлгөнүн, айрым аэропорттордун ишине убактылуу чектөө киргизилгенин маалымдады.