АКШ президенти Дональд Трамп 2014-жылы Москва Украинанын Крым жарым аралын аннексиялап алгандыгы үчүн Орусияга каршы киргизилген санкциялардын мөөнөтүн дагы бир жылга узартты. Бул тууралуу маалымат 19-февралда АКШнын өкмөттүк документтеринин жыйнагы болгон Федералдык реестрде жарыяланды.
"Мен №13660 жарлыкта жарыяланган "өзгөчө кырдаалды" бир жылга узартам", - деп айтылат Ак үйдүн башчысы кол койгон документте. Бул буйрукту алгач ошол кездеги президент Барак Обама 2014-жылдын 6-мартында чыгарган.
"Өзгөчө кырдаал" санкциялары кийинчерээк 2017-жылдын 6-мартына чейин, андан кийин дагы бир нече жолу узартылган. Ал "Украинадагы демократиялык процесстерди жана институттарды бузган, анын тынчтыгына, коопсуздугуна, эгемендигине жана аймактык бүтүндүгүнө коркунуч келтирген" деп жооптуу жеке адамдардын жана юридикалык жактардын активдерин камоого уруксат берген.
Санкция мөөнөтү Украина боюнча үч тараптуу сүйлөшүүлөр уланып жатышына карабастан узартылды.
Женевада Орусиянын Украинага каршы согушун тынчтык жолу менен жөнгө салуу боюнча консультациялар 17 жана 18-февралда өттү. Орус делегациясынын башчысы Владимир Мединский консультацияларды татаал, бирок иштиктүү деп мүнөздөдү. Өз кезегинде Украинанын Улуттук коопсуздук жана коргонуу кеңешинин катчысы жана украин делегациясынын башчысы Рустем Умеров бир катар маселелер такталып калганын белгиледи, бирок "бул этапта чоо-жайын ачыктоого мүмкүн эмес" деп белгиледи. Ал ошондой эле орус тарап менен болгон талкууну "интенсивдүү жана маңыздуу" деп мүнөздөдү.
Чувашиянын жетекчиси Олег Николаев шаршембиде эртең менен украиналык пилотсуз учактар Чебоксары шаарына чабуул койгонун билдирди.
Анын айтымында, эки жолу удаа-удаа сокку урулган. Бирөө “ВНИИР-Прогресс" заводу орун алган калаанын Новоюжный районуна туура келгенин айткан Николаев жабыркагандар жана кыйроолор жок экенин, бир нече машина зыян тартканын кошумчалады.
Жергиликтүү тургундар шаар четинде жарылуулардын добушу угулуп, асманга коюу кара түтүн көтөрүлгөнүн Shot Телеграм-каналына айтып беришти.
Росавиация Чебоксарыдагы аэропортту дээрлик төрт саатка жаап, кайра ачты. "Чувашия без цензуры" каналынын маалыматына ылайык, калаага төрт дрон менен чабуул коюлганда бир киши жарадар болду.
Украиналык Supernova мониторинг Телеграм-каналы украин армиясынын учкучсуз учактары “ВНИИР-Прогресс" ишканасынын жанындагы энергетикалык жайга тийгенин жазды. Ал жер былтыр декабрда да бутага алынган.
“ВНИИР-Прогресс" радиоэлектрондук өнүмдү, анын ичинде армия колдонгон антенналарды жана "Калибр", "Искандер" ракеталары үчүн спутник сигналдарын кабыл алган жабдыктарды чыгарат.
Украиналык куралдуу күчтөр былтыркы жайда, ноябрь жана декабрда ал ишкананы аткылаган. Биринчи соккудан кийин завод ишин убактылуу токтоткон.
Орусиянын баскынчылыгына дуушар болгон Украина коргонуу максатында ал жактын согуштук машинасын камсыздаган жайларды бутага алып келет.
Женевада Украина, Орусия жана АКШнын өкүлдөрүнүн катышуусунда согушту жөнгө салууга багытталган сүйлөшүүлөр башталды.
ТАСС агенттигинин маалыматына караганда, орус делегациясы сүйлөшүү өтө турган жерге полициянын коштоосунда барды. Кабыл алуучу тарап катары Швейцариянын тышкы иштер министри Иньяцио Кассис катышууда.
Украин делегациясынын башчысы Рустем Умеров билдиргендей, күн тартибинде коопсуздук жана гуманитардык маселелер бар.
«Биздин милдет туруктуу тынчтыкка жакындата турган чечимдерди мүмкүн болушунча алдыга жылдыруу», — деп жазды ал.
Эки күндүк сүйлөшүүлөр жабык форматта өтөт. Журналисттер киргизилбейт.
РИА Новости агенттиги билдиргендей, Женевадагы Intercontinental мейманканасына Британиянын делегациясы да барды. Аны премьер-министр Кир Стармердин коопсуздук боюнча кеңешчиси Жонатан Пауэлл жетектөөдө.
Маалыматка ылайык, ал АКШ президентинин атайын өкүлү Стив Уиткофф жана АКШ армиясынын министри Дэн Дрисколл менен жолукту.
Орусия президенти Владимир Путиндин басма сөз катчысы Дмитрий Песков билдиргендей, тараптар Абу-Дабидеги өткөн сүйлөшүүлөргө караганда кененирээк маселелерди, анын ичинде аймактык теманы талкуулашат.
Бул жолу украин делегациясынын курамына Улуттук коопсуздук кеңешинин катчысы Умеров, президенттик кеңсенин башчысы Кирилл Буданов жана анын биринчи орун басары Сергей Кислица, Жогорку Рададагы «Эл кызматчысы» фракциясынын жетекчиси Давид Арахамия жана Украинанын чалгын кызматынын жетекчисинин орун басары Вадим Скибицкий кирди.
АКШ тараптан сүйлөшүүлөргө Стив Уиткофф, Дональд Трамптын күйөө баласы Жаред Кушнер, Дэн Дрисколл жана НАТО күчтөрүнүн Европадагы башкы командачысы Алексус Гринкевич катышууда.
Орус делегациясын бул жолу Чалгын кызматынын башчысы Игорь Костюков эмес, Путиндин жардамчысы Владимир Мединский жетектеп жатат. Ал 2022-жылдагы жана 2025-жылы Стамбулда өткөн сүйлөшүүлөрдө да делегацияны башкарган. Костюков делегация курамында калган. Ошондой эле тышкы иштер министринин орун басары Михаил Галузин жана Путиндин атайын өкүлү Кирилл Дмитриев кошулган. Кремлдин маалыматына караганда, Дмитриев «өзүнчө багыт боюнча» иш алып барат. Жалпысынан орус делегациясы 15–20 адамдан турат.
Тараптардын айтымында, эң татаал маселелердин бири аймактык дооматтар. Москва украин аскерлерин Донбасстан чыгарууну талап кылууда. Киев болсо «турган жерибизде турабыз» деген позицияны карманып, аймактарды берүүдөн баш тартууда. Украина президенти өлкө аймагын «кимдир бирөөгө белек кылууга» ниети жок экенин бир нече жолу айткан.
"Орусия толуктай ала тургандан көбүрөөк жоготууга дуушар болуп жатат", - деп билдирди Улуу Британиянын коргоо министри Жон Хили Bloomberg агенттигине курган маегинде. Ал мунун айынан Москва чет өлкөлүк жалданма жоокерлерге көбүрөөк көз каранды болуп жатканын белгилеген.
Агенттик Мүнхен коопсуздук жыйынынын алкагында министрдин сөздөрүн мисал келтирип, акыркы эки айда Украина, өзүнүн маалыматы боюнча, Орусия жаңы жоокерлерди жалдап жетишкенден да көбүрөөк жоготууга учураганын билдирген.
Bloomberg Батыштагы аты аталбаган аткаминерлердин божомолуна таянып, өткөн жумада Орусия согуш талаасында болжол менен 9 миң адамга көп жоготууга учураганын жазды. Жоготуулардын көбөйүшү украиналык дрондордун ийгиликтүү операциялары менен түшүндүрүлөт.
Украинанын санариптик трансформация министри Михаил Федоров Орусиянын жоготууларын болжол менен 30 миңден 50 миңге чейин көбөйтүүнү максат кылып жатат. Батыш өкүлдөрү бул Орусия президенти Владимир Путин үчүн кандайдыр бир мобилизация ыкмасын колдонбосо, аскерлерди толуктоону кыйындатат деп эсептешет.
Батыштын баалоосу боюнча, Орусия өткөн жылы болжол менен 415 миң адамдан айрылган, ал эми согуш башталгандан берки жалпы жоготуулар 1,2 миллиондон ашкан.
"Батыштагы расмий өкүлдөр Орусия быйыл да Украинадагы согуштук аракеттерин улантат деп эсептейт - буга аскердик өнөр жай өндүрүшү жана Кытай сыяктуу өлкөлөрдүн колдоосу жардам бериши мүмкүн", - деп жазды Bloomberg.