Киевде Орусиянын 22-сентябрга караган түндөгү чабуулунда жараат алгандар 17ге жетти. Алардын төртөө балдар. Соккуда 100дөн ашык үй, бизнес-объекттер, кампа, кеңсе, гараж жана автоунааларга зыян келтирилгенин Киев облустук мамлекеттик администрациясынын башчысы Николай Калашник билдирди. Буга чейин 15 киши жараат алганы кабарланган.
Львов шаарынын мэри Андрей Садовой жекшембиге караган түнү шаарда теракт болгонун билдирди. Мунун алдында полиция шаарда жардыруу болгонун, окуя болгон жерге барган полиция кызматкерлери жабыркаганын маалымдаган.
Садовойдун ырасташынча, 23 жаштагы айым полиция кызматкери мерт болуп, кеминде дагы 14 киши жараат алып ооруканага жеткирилди.
Львов облустук прокуратурасы жардыруунун айрым жагдайы тууралуу маалымат берди. Ага ылайык, жергиликтүү убакыт менен 00:30да полицияга шаардын борбордук көчөлөрүнүн бириндеги дүкөндө уурулук болгону тууралуу кабар түшкөн.
“Патрулдук полиция кызматкерлери айтылган дарекке келгенде жардыруу болгон. Экинчи экипаж барганда жардыруу дагы кайталанган",-деп жазылган маалыматта.
Прокуратура буга байланыштуу кылмыш ишин козгоп тергей баштады.
Кол салууга байланыштуу эч ким жоопкерчиликти ала элек.
Согуш маалында бул маалыматтарды бейтарап булактардан ырастоо мүмкүн эмес.
АКШ президенти Дональд Трамп 2014-жылы Москва Украинанын Крым жарым аралын аннексиялап алгандыгы үчүн Орусияга каршы киргизилген санкциялардын мөөнөтүн дагы бир жылга узартты. Бул тууралуу маалымат 19-февралда АКШнын өкмөттүк документтеринин жыйнагы болгон Федералдык реестрде жарыяланды.
"Мен №13660 жарлыкта жарыяланган "өзгөчө кырдаалды" бир жылга узартам", - деп айтылат Ак үйдүн башчысы кол койгон документте. Бул буйрукту алгач ошол кездеги президент Барак Обама 2014-жылдын 6-мартында чыгарган.
"Өзгөчө кырдаал" санкциялары кийинчерээк 2017-жылдын 6-мартына чейин, андан кийин дагы бир нече жолу узартылган. Ал "Украинадагы демократиялык процесстерди жана институттарды бузган, анын тынчтыгына, коопсуздугуна, эгемендигине жана аймактык бүтүндүгүнө коркунуч келтирген" деп жооптуу жеке адамдардын жана юридикалык жактардын активдерин камоого уруксат берген.
Санкция мөөнөтү Украина боюнча үч тараптуу сүйлөшүүлөр уланып жатышына карабастан узартылды.
Женевада Орусиянын Украинага каршы согушун тынчтык жолу менен жөнгө салуу боюнча консультациялар 17 жана 18-февралда өттү. Орус делегациясынын башчысы Владимир Мединский консультацияларды татаал, бирок иштиктүү деп мүнөздөдү. Өз кезегинде Украинанын Улуттук коопсуздук жана коргонуу кеңешинин катчысы жана украин делегациясынын башчысы Рустем Умеров бир катар маселелер такталып калганын белгиледи, бирок "бул этапта чоо-жайын ачыктоого мүмкүн эмес" деп белгиледи. Ал ошондой эле орус тарап менен болгон талкууну "интенсивдүү жана маңыздуу" деп мүнөздөдү.
Чувашиянын жетекчиси Олег Николаев шаршембиде эртең менен украиналык пилотсуз учактар Чебоксары шаарына чабуул койгонун билдирди.
Анын айтымында, эки жолу удаа-удаа сокку урулган. Бирөө “ВНИИР-Прогресс" заводу орун алган калаанын Новоюжный районуна туура келгенин айткан Николаев жабыркагандар жана кыйроолор жок экенин, бир нече машина зыян тартканын кошумчалады.
Жергиликтүү тургундар шаар четинде жарылуулардын добушу угулуп, асманга коюу кара түтүн көтөрүлгөнүн Shot Телеграм-каналына айтып беришти.
Росавиация Чебоксарыдагы аэропортту дээрлик төрт саатка жаап, кайра ачты. "Чувашия без цензуры" каналынын маалыматына ылайык, калаага төрт дрон менен чабуул коюлганда бир киши жарадар болду.
Украиналык Supernova мониторинг Телеграм-каналы украин армиясынын учкучсуз учактары “ВНИИР-Прогресс" ишканасынын жанындагы энергетикалык жайга тийгенин жазды. Ал жер былтыр декабрда да бутага алынган.
“ВНИИР-Прогресс" радиоэлектрондук өнүмдү, анын ичинде армия колдонгон антенналарды жана "Калибр", "Искандер" ракеталары үчүн спутник сигналдарын кабыл алган жабдыктарды чыгарат.
Украиналык куралдуу күчтөр былтыркы жайда, ноябрь жана декабрда ал ишкананы аткылаган. Биринчи соккудан кийин завод ишин убактылуу токтоткон.
Орусиянын баскынчылыгына дуушар болгон Украина коргонуу максатында ал жактын согуштук машинасын камсыздаган жайларды бутага алып келет.