Орусиянын армиясы 29-мартка караган түнү Украинанын аймагына жапырт сокку урду. Бул тууралуу Украинанын Аба күчтөрү кабарлап, өлкө боюнча 400дөн ашуун «Кинжал» баллистикалык ракетасы менен чабуул болгонун билдирди.
Жергиликтүү полиция Харьков облусундагы аткылоодон жети киши жабыркаганын маалымдады. Жарандык машинага дрон түшкөн учурда үч киши жараат алды. Дагы үчөө турак жайдагы соккуда жабыркаган. Алардын бири 90 жаштагы аял.
Одессада дрондор энергетикалык объектилерге сокку уруп, бир нече калктуу конуштарда көйгөй жаралганын өзгөчө кырдаалдар кызматы билдирди.
Донбасс.Реалий басылмасынын журналисти билдиргендей, орус армиясы Донецк облусундагы “Украина” отелине сокку уруп, өрт тутанган. Бир киши жараат алганы кабарланууда.
Чернигов, Сумы облустарында дрон чабуулунан кийин жыгач иштеткен ишкананын кампасында, башка дагы имараттарда ири өрт тутанды.
Орусиянын 28-марттагы аткылоосунан кийин Николаев облусунда жараат алгандардын саны өсүп, 10го жетти.
Орусия соңку чабуул тууралуу комментарий бере элек.
Согуш шартында тараптардын маалыматын көз карандысыз булактардан тактоого мүмкүн эмес.
Орусиянын Ленинград облусундагы Усть-Луга порту акыркы күнү үчүнчү жолу дрон чабуулуна туш болду. Жергилүү бийлик ондогон учкучсуз учактар атып түшүрүлгөнүн, жараат алгандар жок экенин,бирок порт зыянга учураганын билдирди. Кийинчерээк портто тутанган өрт өчүрүлгөнү кабарланды.
Соңку күндөрү Усть-Луга жана Балтика деңизиндеги Приморск ири мунай порту бир нече жолу украин армиясынын аткылоосуна туш болду. Экөөндө тең өрт тутанды.
Ленинград облусунун губернатору Александр Дрозденконун айтымында, түнү аймакта 30 дрон атып түшүрүлдү. Орусиянын Коргоо министрлигинин мааылматына ылайык, түнү менен жалпысынан 200 украин учкучсуз учагы жок кылынды. Канчасын атып түшүрүү мүмкүн болбогону маалыматта айтылган эмес.
Петербургда Пулково аэропортунда кайрадан чектөө киргизип, ондогон каттамдардын багыт өзгөрсө, айрымдары учпай калды.
Украинанын армиясы Усть-Лугага урулган соңку сокку тууралуу комментарий бере элек. Бул өлкөнүн Телеграм каналдары порттун өрттөнүп жатканы тартылган видеолорду жарыялап жатат.
28-мартка караган түндө орус аскерлери Одессага дрон менен жапырт сокку урушту. Облустук администрация башчысы Сергей Лысак соккудан эки адам мерт кеткенин билдирди.
Бир адамдын сөөгү урандылардын алдынан табылган, экинчиси ооруканада каза тапты. Кеминде 11 адам жаракат алганы, арасында 9 жаштагы бала бар экени кабарланды.
Украинаны калыбына келтирүү боюнча вице-премьер-министр Алексей Кулеба Одесса облусунда порттогу инфратүзүм чабуулга кабылганын, дрон дан сакталган кампага тийгенин билдирди.
Жергиликтүү бийликтин маалыматына караганда, шаардын өзүндө төрөт үйлөрүнүн биринин чатыры жабыркады, андагы 80 адам эвакуацияланды.
Приморскиде, Хажибей жана Киев райондорунда бир нече жер үй жабыркады. Бир катар көп кабаттуу үйлөрдө балкондору, терезелер сынган, өйдөңкү кабаттарда өрт чыккан. Жер үйлөр да өрттөнүп, ондон ашуун автоунаа зыянга учурады.
Украинанын президенти Владимир Зеленский түн бою Одессага 60тан ашуун дрон чабуулу жасалганын билдирди.
"Эч кандай аскердик мааниси жок: бул карапайым жарандардын өмүрүнө карата чыныгы террор. Зыян тарткан объектилердин арасында төрөт үйү, турак жай имараттары, ишканалар, порт жана маанилүү инфраструктура болгон", - деп жазды ал өзүнүн Telegram каналында.
Орус армиясы бул түндө Одессадан тышкары Полтава жана Днепропетровск аймактарын да аткылады. Полтаванын облустук администрация башчысы Виталий Дьяковнич билдиргендей, Полтава районунда дрон үйгө жана өнөр жай объекттерине тийген, бир адам мерт кетти.
Кривой Рогдо өнөр жай ишканасы жабыркаганы, мерт кеткендер жана жаракат алгандар бар экенин ишембинин таңында облус башчысы Александр Ганжа маалымдады.
Украин Аскер-аба күчтөрүнүн маалымдашынча, 28-мартка караган түндө Орусиядан Украинага 273 учкучсуз учак жиберилген. Анын 252си жок кылынган.
"21 дрон 18 локацияга тийгени жана тогуз жерге дрон сыныктары түшкөнү катталды", - деп жазылды маалыматта.
Орусия азырынча түн ичиндеги чабуул тууралу комментарий бере элек.
АКШнын мамлекеттик катчысы Марко Рубио Украина үчүн каралган курал-жарак эгер Иран менен жаңжал курчуп кетсе Жакынкы Чыгышка жиберилиши мүмкүн экенин билдирди.
27-мартта Францияда "Чоң жетинин" (G7) тышкы иштер министрлеринин жолугушуусунан кийинки сөзүндө Рубио АКШ курал-жаракты жеке артыкчылыктарына карай колдонорун билдирди.
"Эгер бизге Америка үчүн бир нерсе керек болсо жана ал Американыкы болсо, анда биз аны биринчи кезекте Америка үчүн калтырабыз. Азырынча мындай учур боло элек", -деп белгиледи Мамдепартаменттин башчысы. Анын сөзүн Bloomberg жарыялады.
Сөз ошол эле учурда 2025-жылы макудашылган PURL (Prioritized Ukraine Requirements List) программасы боюнча курал берүү жөнүндө да болууда. Анын алкагында Украина керектүү курал-жарактын тизмесин түзөт, ал эми европалык союздаштары аны АКШдан сатып алышат.
Politico маалымдагандай, Вашингтон союздаштарга курал-жаракты жеткирүү жакынкы айларда жайлап каларын же токтой турганын эскертти. Атап айтканда, Patriot абадан коргонуу системалары үчүн ок-дары жана атып түшүрүүчү ракета жеткирүү токтошу мүмкүн.
Ошол эле учурда америкалык тарап союздаштар атайын Украина үчүн гана сатып алган курал-жарак (Жакынкы Чыгышка) берилбей турганын билдирди. Бирок, The Washington Post жазгандай, Пентагон Жакынкы Чыгыштагы жеке корун толтуруу үчүн курал-жарактын кайсы бир бөлүгүн кайра бөлүштүрүүнү караштырып жатат.
НАТОнун башкы катчысы Марк Рютте эң негизги маанилүү жабдуулар, анын ичинде атып түшүрүүчү ракеталар Киевге жиберилип жатканын билдирди. Анын сөзүнө караганда, курал жеткирүү үзгүлтүксүз жүрүүдө. Мурдараак ал 2026-жылы АКШ Киевге Европа жана Канада төлөгөн 15 млрд долларлык курал берүүнү көздөп жатканын, ай сайын бир млрд евро өлчөмүндөгү курал жеткирилерин айткан.
Украинанын президенти Владимир Зеленский буга чейин АКШнын негизги көңүлү Жакынкы Чыгышка бурулганын айткан эле.