Бүгүн 31-мартта Украинанын Буча шаарынын орус аскерлеринен бошотулушунун төрт жылдыгын эскерүү иш-чараларына Европа Биримдигинин тышкы иштер министрлери да катышууда. Киевге Европа дипломатиясынын башчысы Кая Каллас баштаган делегация барды.
Эскерүү иш-чараларынан тышкары алар украин жетекчилиги менен жолугушуу өткөрүп, кызматташтык маселелерин талкуулоодо. Еврошаркеттин каржылык жардам берүүсүн бөгөттөп жаткан Венгрия темасы, ок атышууну токтотуудан кийин Орусияны согуш кылмыштары үчүн жазага тартуу маселелери да каралат.
Киев облусуна караштуу чакан Буча шаары Орусиянын Украинага толук масштабдуу согушу башталгандан беш жума өткөндөн кийин, 2022-жылдын 31-мартында бошотулган. Шаар бийлигинин маалыматына караганда, Бучадагы оккупация учурунда 458 жайкын тургун каза болгон, алардын 419ун атып же кыйнап өлтүрүшкөн. Буча орус аскерлеринин мыкаачылыгынын символуна айланган.
Украин бийлиги Буча окуяларын геноцид деп жарыялоо зарылдыгын айтып келет. Орусия айыптоолорду четке каккан.
Орус аскерлери бул шаарга 2022-жылдын 27-февралында кирип барышкан. Калаа толук бошотулганын мэр Анатолий Федорук 31-мартта жарыялаган.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болду. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.
Москванын согушуна жооп иретинде Украина Орусиянын армиясынын каржы булагы деп эсептелген мунай заводдорун жана башка объектилерин маал-маалы менен бутага алып келет.
Орусиянын аскерлери Украинага күн сайын сокку уруп жатат. Жекшембиге караган түнү орус тарап 400дөн ашуун дрон менен чабуул койгонун Киев билдирген. Жекшембиде Украинанын Донецк облусундагы Краматорск шаарына Орусиянын чабуулунда үч киши каза тапты, арасында 13 жаштагы бала бар. Жараат алгандар акыркы маалымат боюнча 14 кишиге жетти.
Орусиянын Ростов облусунун бийлиги украиналык дрондордун жапырт чабуулунан Таганрог шаарында бир киши каза тапканын, сегизи жараат алганын билдирди.
«Таганрог абадан жапырт чабуулга кабылды. Абадан коргонуу күчтөрү баарын жарактан чыгарды», — деп жазды Таганрогдун мэри Светлана Камбулова.
Учкучсуз учактардын калдыктары кулаганда бир нече турак жай, социалдык жана өнөр жай ишканаларына зыян келтирилген.
Ростов облусунун губернатору Юрий Слюсарь аймакта абадан коркунуч тууралуу эскертүү жарыяланганын айтты.
Финляндиянын аймагына алгачкы жолу эки дрон түштү. Жергиликтүү бийликтер учкучсуз учактар украиндерге таандык болушу ыктымалдыгын айтышууда. Дрондор тууралуу Финляндиянын премьер-министри Петтери Орпо маалымдады. Анын сөзүнө караганда, күч кызматтары иликтөө жүргүзүп жатышат.
Финляндиянын Коргоо министрлиги жекшембинин таңында, 29-мартта өлкөнүн аймагында бир нече учуучу аппарат байкалганын билдирди. Дрондордун бири Коуволынын түндүк тарабына, дагы бири шаардын чыгыш тарабына түшкөн.
Yle жазгандай, фин премьер-министри дрондор украиндерге таандык болушу ыктымал деп божомолдоп жатат. Орпо учкучсуз учактар өзү кулаганын белгиледи. Ал жакында эле украин аскерлери Орусиянын Финляндия менен чектешкен аймактарын аткылашканын кошумчалады.
29-март күнү Украинанын Коопсуздук кызматы Орусиянын Ленинград облусундагы мунай портуна сокку урганын маалымдаган. Орусиянын бийлиги аскерлер Ленинградда украин тараптын ондогон дрондору жок кылынганын билдирген.