Өткөн суткада Запорожье облусунун айланасында аба соккуларынан бир киши каза тапканын облустук аскердик администрация башчысы Иван Федоров билдирди. Анын маалыматында, 629 сокку урулуп, 45 калктуу конуш бутага алынган.
Херсон облусунун аймагында соңку суткада Орусиянын 34 калктуу конушту бутага алганын облустук администрация жетекчиси Александр Прокудин билдирди. Үч адам жарадар болуп, олуттуу кыйроолор катталды.
Корюковка шаарында дрон соккусунан эки адам жабыркады.
Украинанын Куралдуу күчтөрүнүн Башкы штабы фронтто 141 кагылыш катталганын маалымдады. Мурдагы күндөрдөгүдөй эле кандуу салгылаштар Покровск багытында (55) жана Константиновка багытында (26) катталган.
Украинанын чыгышында согушкан орусиялык топтор 112 украин пункттары учкучсуз учак аркылуу талкаланганын билдиришти.
Согуштук аракеттер учурунда маалыматты согушуп жаткан тараптардан же көз карандысыз булактардан ырастоо мүмкүн эмес.
26-апрелге караган түндө орусиялык аскерлер Украинага 144 дрон менен сокку урду, анын 124ү атып түшүрүлгөнүн украин Куралдуу күчтөрү кабарлады. Бутага Одесса да алынган.
Украин өкмөтүнүн вице-премьери Алексей Кулеба өзүнүн Телеграм каналына жазгандай, соккунун натыйжасында Одессанын портундагы логистикалык инфратүзүм, кампалар, техникалык жабдуулар, жүк сактагычтар, администрациялык имараттар жана жүк ташуучу унаалар жабыркаган. Палау желеги менен жүргөн жарандык кеме да жабыркаганы катталды.
Облустук администрация башчысы Олег Кипер соккунун кесепети тартылган сүрөттү жарыялап, бир адам жабыркаганын маалымдады.
Украинанын Чукул кырдаалдар боюнча мамлекеттик кызматы Орусиянын Днепропетровск облусуна соккусунун кесепеттеринин сүрөтүн жарыялады. Ал жакта адамдардан жабыркагандар жок экени айтылды.
Согуш учурунда маалыматтарды көз карандысыз жактардан тактоо мүмкүн эмес.
Жекшембиге караган түндө Украинанын аскерлери Орусиянын Ярославль облусундагы мунай иштетүүчү "Славнефть-ЯНОС" заводун бутага алды.
Күбөлөрдүн сүрөт жана тасмалары, ошондой эле спутник аркылуу Жердеги өрттөргө көзөмөл кылган NASA FIRMS сервисинин маалыматтары жарыяланды.
Ярославль облусунун губернатору Михаил Евраев Телеграм каналына "украиналык дрондордун ири чабуулунун мизи кайтарылганын" жазган.
Чабуулга Вологда облусунун Череповец шаарындагы "Апатит" ишканасы да кабылган. Губернатор Георгий Филимоновдун айтымында, соккудан беш адам жаракат алган, алардын биринин абалы оор.
PhosAgro Group компаниясынын курамына кирген "Апатит" акционердик коому Европадагы жер семирткичтердин, фосфор жана күкүрт кислоталарынын эң ири өндүрүүчүсү экени веб-сайтында жазылган. Бул заводго быйыл 13-апрелде да Украина чабуул болгон.
Орусиянын Коргоо министрлиги жекшембиге караган түнү Ярославль жана Вологда облустарынын үстүнөн украиналык 49 дронду жок кылганын билдирди.
Маалыматты көз карандысыз булактардан тактоо мүмкүн эмес.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болду. Орус аскерлери Украинага күн сайын сокку уруп жатат. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.
Москванын согушуна жооп иретинде Украина Орусиянын армиясынын каржы булагы деп эсептелген мунай заводдорун жана башка объектилерин маал-маалы менен бутага алып келет.
