Казакстандын Актөбө облусунда учкучсуз учак кулады. Полициянын жергиликтүү башкармалыгы тараткан маалыматка караганда, жабдыктын сыныктары Алимбет айылынын сыртында табылды.
Тартип коргоочулар окуяны териштирип жатышат.
Дрондун сыныктары жерге түшүп жатат делген видеону Mash Телеграм каналы жарыялады.
Каргалы районундагы Алимбет айылы Орусиянын Орск шаарына 24 чакырым жакын жерде жайгашкан. Шаршембиде ал жер укрианалык учкучсуз учактардын чабуулуна туш болгону кабарланган.
Шаардын башчысы Артем Воробьёв бул маалыматты бышыктап, элди көчөгө чыкпоого жана терезелерден оолак болууга чакырган. Орск аэропортунун иши убактылуу чектелди.
Казакстанда буга чейин да дрондордун сыныктары табылган учурлар болгон. Былтыр Батыш Казакстан облусуна бери дегенде беш учкучсуз учактын калдыктары кулаган.
Облустун чек арага жакын райондорунда ракетанын калдыктарын бир нече жолу табышкан. Орусиянын коңшулаш Астрахан аймагында Капустин Яр деген аскердик полигон орун алган. 2018-жылы Казакстандын батышында табылган жабдыктардын бири ракетанын сыныгы болуп чыккан.
Орус аскерлеринин соккусуна 29-апрелге караган түнү Украинанын Сумы облусу да кабылды. Дрон жана ракета менен чабуул коюлганын аймактык аскер администрациянын башчысы Олег Григоров билдирди.
Ал Telegram баракчасындагы билдирүүсүндө жарандык инфраструктура жана турак жай имараттары жабыркаганын, "чоң өрт" кучагында калганын айтты.
Күйүп жаткан имараттардын биринде 60 жаштагы аял көмүртек кычкыл газынан ууланып каза болду.
Дагы эки адам медициналык жардамга кайрылды.
Калган тургундар тез арада эвакуацияланды.
Чабуул коюлган Шостка аймагы Украина менен Орусиянын чек арасына жакын жайгашкан жана орусиялык дрондордун чабуулуна көп кабылат.
29-апрелге караган түнү Орусия Украинанын Харьков аймагынын бир нече районуна дрон менен чабуул койгонун мэр Игорь Терехов билдирди. Анын айтымында, чабуулдан бир адам жаракат алды.
Соккулар инфраструктуралык объектилерге жана турак жайларга тийген: көп кабаттуу үйлөрдөгү терезелер талкаланган, ал эми даракка тийген дрондун калдыктары жеке сектордогу бир нече үйгө зыян келтирген.
Орусиянын чек арасына жакын жайгашкан Харьковго орусиялык аскерлердин чабуулдары жана соккулары дайыма болуп турат.
Орусиянын Краснодар крайындагы Туапсе шаарындагы мунай заводунда дрон чабуулунан кийин өрт чыкканы кабарланды.
Аймактын губернатору Вениамин Кондратьев Туапсе округунун башчысы Сергей Бойкого шилтеме берип билдиргендей, жабыркагандар жок, өрттү өчүрүүгө 122 адам жана 39 техника, Орусиянын Өзгөчө кырдаалдар министрлигинин аймактык бөлүмүнүн кызматкерлери тартылды.
Маалыматта мунай заводдун жанындагы имараттардын тургундары эвакуацияланып жатканы айтылат.