Орусиянын армиясы 12-майга караган түнү Украинанын Киев, Харьков, Днепропетров жана Херсон облустарына сокку урду.
Шейшембиге оогон түнү Украина менен Орусиянын ортосундагы үч күндүк элдешүү келишими аяктады. Келишим тууралуу өткөн аптада АКШнын президенти Дональд Трамп жарыялаган.
Бирок тараптар бири-бирин ок атышпоо режимин бузду деп айыптап келишти, ошол эле маалда үч күн аралыгында жапырт соккулар болгон жок.
Түндө Киев облусунун Фастов районунда Орусиянын чабуулунун кесепетинен бала бакчанын чатыры өрттөндү. Ага танапташ жайгашкан төрт кабаттуу үйдүн терезелери күбүлдү. Эки жер тамга зыян келтирилди.
Бактыга жараша жапа чеккендер катталбаганын Украинанын Өзгөчө кырдаалдар кызматы кабарлады.
Киевдин мэри Виталий Кличко шаарда учкучсуз учактын калдыгы 16 кабаттуу турак жайдын чатырына кулап, өрт чыкканын билдирди. Техникалык кабаттын чатыры зыянга учураган.
Харьков облусунун Купянск районунда дрон чабуулунан ишканалардын биринин аймагында турган автобус менен жүк ташуучу унаа күйүп кетти. Бир жер тамга зыян келтирилди.
Днепрде чабуулдун кесепетинен бир киши жараат алып, орто оор абалда ооруканага жаткырылганын облустук аскердик администрациянын башчысыс Александр Ганжа кабарлады. Мындан тышкары Днепропетров облусунун Синельников районунда жер тамдар, чарбалык курулуш, автоунаа зыян тарткан. Бир киши каза таап, дагы бири жараат алды. Павлоградда тогуз кабаттуу үй жана машинелер зыянга учурап, эки киши жабыркады.
Херсондо артиллериялык аткылоолордон 68 жаштагы аял жараат алып, ооруканага түшкөнүн шаардык бийлик кабарлады.
Шейшембиде орус тарап Житомир облусунун жарандык инфраструктурасын да бутага алганда бир нече турак үй жана чарбалык курулуштарга зыян келтирилди.
Орусиянын Коргоо министрлиги орусиялык учактар чалгын дрондору менен биргеликте "атайын операция аймагында" (орус бийлиги Украинага кол салуусун ушинтип атайт) украин күчтөрүнүн учкучсуз авиациясынын башкаруу пункттарына сокку урганын жарыялады. Москва Украинанын жарандык жайларга атайлап сокку уруп жатат деген маалыматын моюнга албайт.
Украинанын Куралдуу күчтөрүнүн маалыматына караганда, 12-майга караган түнү орус армиясы 216 дрон учурду, анын 192си жок кылынды.
Орусиянын Коргоо министрлиги өткөн түнү Белгород, Воронеж жана Ростов облустарында 27 украин дрону кармалып же жок кылынганын билдирди.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болду. Ошондон бери орус аскерлери Украинага күн сайын сокку уруп жатат. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.
Москванын согушуна жооп иретинде Украина Орусиянын армиясынын каржы булагы деп эсептелген мунай заводдорун жана башка объектилерин маал-маалы менен бутага алып келет.
АКШнын ортомчулугу менен Орусия жана Украина макулдашкан үч күндүк элдешүүгө карабастан, акыркы суткада орус аскерлери Украина аймагына сокку урганы маалым болду. Украин бийлиги билдиргендей, соңку чабуулдардан өмүрү кыйылгандар жана жараат алгандар бар.
Херсон облусунда аткылоолордон эки адам набыт болуп, дагы эки киши жараат алды. Бул тууралуу облустук администрациянын башчысы Александр Прокудин билдирди.
Харьков облусунда аба чабуулдардан беш жайкын тургун жабыркаганын облустук администрациянын жетекчиси Олег Синегубов маалымдады.
11-майга караган түнү Днепропетров облусундагы Никополь району дрондордун чабуулуна кабылды. Облустук администрациянын башчысы Александр Ганжанын айтымында, бир ашкананы өрт чалып, чарбалык курулуш талкаланган.
Фронтто да салгылашуулар уланды. Украинанын Куралдуу күчтөрүнүн Башкы штабынын 11-майдын таңында тараткан маалыматына ылайык, акыркы суткада 180ге жакын кагылышуу катталган. Айыгышкан салгылаштар Покровск, Гуляйполе жана Лиман багыттарында жүрдү.
8-майда АКШ президенти Дональд Трамп Орусия менен Украинанын ортосунда үч күндүк элдешүү боюнча макулдашуу жетишилгенин билдирген. Кийинчерээк Киев менен Москва бул макулдашууну ырасташкан. Трамптын айтымында, элдешүү 9, 10 жана 11-май күндөрү уланмак жана ага согуш аракеттерин токтотуу менен катар “1000ге 1000” форматы боюнча туткундарды алмашуу да кирмек.
Трамп өзү жазгандай, элдешүү өтүнүчүн ал сунуштап, Орусия менен Украинанын президенттери буга макул болушкан.
Ишембинин кечинде орусиялык аскерлер Харьков шаарына дрон менен сокку урганын облустук аскер администрациясынын башчысы Олег Синегубов билдирди.
Дрон тогуз кабаттуу үйдүн техникалык кабатына тийген, натыйжада лифт шахтасы жарактан чыгып, 30дай айнек күбүлүп түштү. Беш адам түрдүү жаракат алды.
Андан тышкары Днепропетров облусунун Никополь жана Синельников райондоруна да чабуул болду. Инфратүзүм жабыркады. Үч жаштагы кыз жаракат алып, орточо оор абалда ооруканага жеткирилгенин облустук аскердик администрация башчысы Александр Ганжа маалымдады.
Донецкинин Дружковка шаарында дрон соккусунан тогуз кабат үйдө өрт чыкты, ал эми Краматорскиде эки май куюучу бекетте газ сакталуучу идиштер күйүп кеткенин Украинанын Чукул кырдаалдар боюнча мамлекеттик кызматы жекшембиде кабарлады. Херсон облусунда чабуулдан эки автоунаа жана жер үй өрттөндү.
Украин Аба күчтөрү түн оогондон таңкы саат 8:00гө чейин орусиялык аскерлер Украинага 27 дрон менен сокку урганын билдирди. Бардыгы жок кылынган.
- 8-майда АКШнын президенти Дональд Трамп Орусия менен Украина 9-10-11-май күндөрү ок атышпоону макулдашканын билдирген. Кийинчерээк Киев менен Москва аны ырасташкан. Макулдашуунун алкагында тараптар 1000 туткунду алмашары айтылган.
Орусия президентинин жардамчысы Юрий Ушаков Украина менен сүйлөшүүлөрдүн жаңы баскычы пландалбаганын кайрадан билдирди. Ал ошондой эле ок атышпоо келишими 11-майга чейин жетишилгенин, аны узартуу тууралуу сөз жоктугун белгиледи.
"Жок, ок атышпоо боюнча келишим Жеңиш күнүнө карата гана болгон, үч күн - 9-10-11-майда гана уланат", - деди ал.
АКШнын президенти Дональд Трамп 8-майда үч күндүк ок атышпоо тууралуу жарыялаган, ошол эле учурда сүйлөшүүнү улантуу жөнүндө айтып, ок атышпоо үч күндөн ашык убакытка созулушу мүмкүндүгүн билдирген.
Ушаков Трамп Орусия менен Украинанын ортосундагы ок атышпоо узартыларына ишенерин, бирок бул "бир гана андан көз каранды эмес экенин" айтты.
Трамптын келишимди узартуу боюнча үмүтүн Ушаков "негизсиз" деп атады. Сүйлөшүүлөрдүн уланышын украин аскерлеринин Донецк аймагынан чыгарылышы менен байланыштырды. Киев бул талапты кабыл албай турганы белгилүү.
Путиндин жардамчысынын сөзүнө караганда, президент мурдагыдай эле украин мамлекет башчысы Владимир Зеленский менен жолугушууга даяр, бирок Москвада гана.
Украин президентинин кеңешчиси Сергей Лещенко өз кезегинде Зеленский Путин менен Москвадан башка кайсы жерде болбосун жолугушууа даяр экенин билдирди.
"Москва - баскынчы мамлекеттин борбору. Мындай форматтагы сүйлөшүү мүмкүн эмес", - деди ал.
Ушаков мындан тышкары орус-америка байланышы Украинанын коркутуусу, ага Орусия Киевге сокку урарын билдирген жообунан кийин жанданганын айтты. Ишембиде алмашуу болбосун, учурда туткундардын тизмесин тактоо жүрүп жатканын айтты. Эки күн ичинде ок атышпоо, анын алкагында туткундарды алмашуу тууралуу макулдашууга жетишилди.