Орусиянын Коргоо министрлиги 13-майга караган түнү 14 аймакта, аннексияланган Крымда, Азов жана Кара деңиз акваториясында Украинанын 286 дронун атып түшүргөнүн билдирди.
Краснодар крайында Волна кыштагындагы ишкананын аймагына дрон кулап, өрт чыкканын жергиликтүү бийлик билдирди. Бир киши жабыркаган, өрттү өчүрүүгө 96 адам, 29 техника тартылган.
Дагы бир киши Таман кыштагына дрон чабуулу учурунда жараат алды. "Крымский ветер" Телеграм каналы спутниктен алынган маалыматтарга таянуу менен Таман портундагы мунай базасында өрт чыкканын жазды.
Ярослав облусунун губернатору Михаил Евраев өнөр жай ишканасына дрон калдыгы түшкөнүн, эч ким жабыркабаганын кабарлады.
Астрахандагы газды кайра иштетүүчү заводдо да учкучсуз учактардын калдыктары кулатылганда өрт тутанганын облус башчысы Игорь Бабушкин маалымдады.
Москванын мэри Сергей Собяниндин билдирүүсүндө, борборду көздөй учурулган эки дрон атып түшүрүлдү.
Башкырстанда "Нурлино" өндүрүш-диспетчердик станциясында өрт чыкканын Телеграм каналдар кабарлашты. Өрттүн себеби аныктала элек.
Astra каналы аймакта абадан коркунуч тууралуу белгилер жарыяланбаганын жазды. Жергиликтүү бийлик кийинчерээк үч киши жабыркаганын, экөөнүн абалы өтө оор экенин билдирди.
Өрттүн алдында жарылуу болгону айтылды. Бийлик дрон чабуулу эмес, технологиялык бузулуу болгонун маалымдап жатат.
Украина Орусиянын аймактары жана аннексияланган Крымга соккулар тууралуу комментарий бере элек.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болду. Ошондон бери орус аскерлери Украинага күн сайын сокку уруп жатат. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.
Москванын согушуна жооп иретинде Украина Орусиянын армиясынын каржы булагы деп эсептелген мунай заводдорун жана башка объектилерин маал-маалы менен бутага алып келет.
АКШ президенти Дональд Трамп 12-майда Кытайга учар алдында журналисттердин суроолоруна жооп берип жатып Владимир Путин менен "Донбассты бүт бойдон Орусия алат" деген келишимге барбаганын билдирди.
Журналисттин Путин экөөнүн ортосунда Орусия Донбассты бүт алат деген "түшүнүк" болду беле деген суроосуна Трамп кыскача "жок" деп жооп берип, жагдайын айткан жок.
ТАССтын кабарчысынын суроосуна жооп берип жатып Трамп быйылкы жылы Орусияга барарын, Украинадагы согуштун аякташына "колдон келгенди" кыларын айтты. Ал ошондой эле согуштун аягы жакын калганы тууралуу оюн да билдирди.
Москва украин аскерлеринин Донецк облусунун аймагынан чыгып кетишин Украинадагы согушту токтотуунун шарты деп атап келет. Орусиянын жогорку деңгээлдеги ишмерлери акыркы күндөрү бир нече жолудан бул Москва Киевден күтүп жаткан негизги чечим экенин айтышты.
Ачык айтпаганы менен орусиялык өкүлдөр былтыр августта бул маселе АКШ менен Орусия лидерлеринин Анкориждеги жолугушуусунда талкууланганын ишара кылып келишет.
Украинанын бийлиги Донбассты Орусияга өткөрүп берүү талабына макул эместигин билдирип келет.
Кремлде жакынкы аралыкта Украина менен туткун алмашуу аягына чыгарына үмүттөнүп жатышканын басма сөз катчысы Дмитрий Песков "Интерфакска" 11-майдын кечинде билдирди.
11-май, АКШ президенти Дональд Трамп жарыялагандай, Орусия менен Украинанын атышпоо боюнча макулдашуусунун акыркы күнү. Трамп жана согушуп жаткан тараптар миңден туткунду алмашарын ырасташкан. Бирок 11-майда да алмашуу тууралуу эч кандай маалымат берилген жок.
Песковдун сөзүнө караганда, алмашууга даярдык уланып жатат, "тиешелүү кызматтар бул багытта иштеп жатышат". Кремлдин өкүлү алмашуу кайсы күнү болорун айткан жок. Украин тарап да туткун алмашуунун болжолдуу мөөнөтүн билдире элек.
Орусиянын президенти Владимир Путин 9-майдын кечинде Украинадан туткундардын тизмесин ала электигин билдирген. Украинанын өкүлдөрү тизме берилгенин жана алмашууга даяр экенин айтышкан.
Бирок атышпоо макулдашылган үч күн бою эки тараптан тең аткылоо токтобогонун Орусия да, Украина да кабарлаган. Ошондой эле фронт чегиндеги аймактарда да сокку уруу уланган, украин бийлиги аскерлер жана жай тургундар жаракат алганын кабарлашкан, жарадарлар тууралуу орусиялык аймактардын бийликтери да маалымдашкан.
Украин президенти Владимир Зеленский 11-майда фронтто согуш уланып келатканын, Украина Орусиянын жаңы чабуулдарына даярданып жатканын белгилеген. "Орусиянын бул согушту токтотуу ою да жок экенин көрүп турабыз, тилекке каршы, биз жаңы чабуулдарга даярданып жатабыз", -деди Зеленский.
Орусиянын армиясы 12-майга караган түнү Украинанын Киев, Харьков, Днепропетров жана Херсон облустарына сокку урду.
Шейшембиге оогон түнү Украина менен Орусиянын ортосундагы үч күндүк элдешүү келишими аяктады. Келишим тууралуу өткөн аптада АКШнын президенти Дональд Трамп жарыялаган.
Бирок тараптар бири-бирин ок атышпоо режимин бузду деп айыптап келишти, ошол эле маалда үч күн аралыгында жапырт соккулар болгон жок.
Түндө Киев облусунун Фастов районунда Орусиянын чабуулунун кесепетинен бала бакчанын чатыры өрттөндү. Ага танапташ жайгашкан төрт кабаттуу үйдүн терезелери күбүлдү. Эки жер тамга зыян келтирилди.
Бактыга жараша жапа чеккендер катталбаганын Украинанын Өзгөчө кырдаалдар кызматы кабарлады.
Киевдин мэри Виталий Кличко шаарда учкучсуз учактын калдыгы 16 кабаттуу турак жайдын чатырына кулап, өрт чыкканын билдирди. Техникалык кабаттын чатыры зыянга учураган.
Харьков облусунун Купянск районунда дрон чабуулунан ишканалардын биринин аймагында турган автобус менен жүк ташуучу унаа күйүп кетти. Бир жер тамга зыян келтирилди.
Днепрде чабуулдун кесепетинен бир киши жараат алып, орто оор абалда ооруканага жаткырылганын облустук аскердик администрациянын башчысыс Александр Ганжа кабарлады. Мындан тышкары Днепропетров облусунун Синельников районунда жер тамдар, чарбалык курулуш, автоунаа зыян тарткан. Бир киши каза таап, дагы бири жараат алды. Павлоградда тогуз кабаттуу үй жана машинелер зыянга учурап, эки киши жабыркады.
Херсондо артиллериялык аткылоолордон 68 жаштагы аял жараат алып, ооруканага түшкөнүн шаардык бийлик кабарлады.
Шейшембиде орус тарап Житомир облусунун жарандык инфраструктурасын да бутага алганда бир нече турак үй жана чарбалык курулуштарга зыян келтирилди.
Орусиянын Коргоо министрлиги орусиялык учактар чалгын дрондору менен биргеликте "атайын операция аймагында" (орус бийлиги Украинага кол салуусун ушинтип атайт) украин күчтөрүнүн учкучсуз авиациясынын башкаруу пункттарына сокку урганын жарыялады. Москва Украинанын жарандык жайларга атайлап сокку уруп жатат деген маалыматын моюнга албайт.
Украинанын Куралдуу күчтөрүнүн маалыматына караганда, 12-майга караган түнү орус армиясы 216 дрон учурду, анын 192си жок кылынды.
Орусиянын Коргоо министрлиги өткөн түнү Белгород, Воронеж жана Ростов облустарында 27 украин дрону кармалып же жок кылынганын билдирди.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болду. Ошондон бери орус аскерлери Украинага күн сайын сокку уруп жатат. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.