Киевде Орусиянын соккусунан каза тапкандар тогузга жетти. Куткаруучулар урандылардын алдынан дагы бир адамдын сөөгүн алып чыкканын Киев шаардык аскер администрациясынын башчысы Тимур Ткаченко билдирди.
Муну менен каза болгондордун саны тогузга жетти. Сокку болгон жерде издөө-куткаруу операциясы уланууда.
Украинада Жогорку антикоррупциялык сот президенттин аппаратынын мурдагы жетекчиси Андрей Ермакка 140 миллион гривна күрөө коюу мүмкүнчүлүгү менен камакка алуу түрүндөгү бөгөт чарасын тандады. Ермак көрсөтүлгөн сумманы төксө эркиндикте калат, болбосо камакка алынат.
Айыптоочу тарап соттон Ермакты камакка алууну жана күрөө катары 180 миллион гривна белгилөөнү сураган. Ошентип сот прокуратуранын өтүнүчүн жарым-жартылай канааттандырды.
Киевдин четиндеги элиталык курулушта 460 миллион гривнаны легалдаштырууга шектелип жаткан Ермакка бөгөт коюу чарасын Жогорку антикоррупциялык сот 12-майда карай баштаган.
Коррупцияга каршы адистештирилген прокуратуранын прокурору Валентина Гребенюк камакка алуу жана альтернативдүү күрөө өтүнүчүн негиздеп жатып Ермак чет өлкөдө да, Украинада да жашырынууга жетиштүү ресурсу бар экенин билдирди. Прокуратуранын маалыматы боюнча, учурда анын төрт дипломатиялык паспорту бар, эң акыркысынын мөөнөтү 2030-жылга чейин жарактуу.
Ермак өзүнө коюлган айыптарды негизсиз деп эсептейт. 13-майдагы отурумда ал күрөө үчүн 180 миллион гривнасы жок экенин айтты.
Ермактын жактоочулары соттон бөгөт чарасы катары “мыйзамда каралган чектерде” күрөө тандап берүүнү, ошондой эле анын Украина ичинде эркин жүрүүсүнө чектөө койбоону суранышты. Анткени бул анын адвокаттык ишмердүүлүгүнө терс таасирин тийгизиши мүмкүн экенин белгилешти.
Украинанын Коррупцияга каршы улуттук бюросу (НАБУ) 11-майда “Киевдин четиндеги элиталык курулушта 460 миллион гривнаны легалдаштырууга катышкан уюшкан топтун” бети ачылганын кабарлаган. Тергөөнүн маалыматы боюнча 2021–2025-жылдар аралыгында шектүүлөр Киев облусундагы Козин айылында коттеж куруу аркылуу 460 миллион гривнадан ашык каражатты “адалдашкан”. Кеп жалпы аянты 8 гектарга жакын жер тилкесиндеги төрт жеке резиденция, кошумча имараттар жана курулуштар, ошондой эле жалпы колдонуудагы өзүнчө резиденция тууралуу болуп жатат.
Бул иш боюнча дагы алты адам шектүү катары өтүүдө. Алардын арасында мурдагы вице-премьер, ишкер (2025-жылдын ноябрындагы «Мидас» атайын операциясынын алкагында бети ачылган кылмыштуу уюмдун жетекчилеринин бири) жана башка адамдар бар.
“Суспільне” телеканалына маегинде Ермактын адвокаты Игорь Фомин анын Киевдин четиндеги элиталык курулушта 460 миллион гривнаны легалдаштырууга тиешеси бар деген маалыматты четке какты. Ал “бул кырдаалдын баары коомдук басым аркылуу жасалма түрдө уюштурулган” деп эсептейт.
2025-жылдын ноябрында Украинанын президенти Владимир Зеленский аппаратынын жетекчиси Андрей Ермак кызматтан кетүү тууралуу арыз жазганын билдирген. Бул окуя Ермактын үйүндөгү тинтүү учурунда болгон. Коррупцияга каршы улуттук бюро 28-ноябрда президенттин аппаратынын жетекчисинде тергөө амалдары жүрүп жатканын тастыктаган, бирок иштин чоо-жайын ачыктаган эмес.
Кызматтан кеткенден кийин Ермак фронтко аттана турганын, ошондой эле “ар кандай кесепеттерге даяр” экенин айтып, өзүн “ак ниет жана таза адам” деп эсептей турганын белгилеген.
Орусия 14-майга караган түнү Украинага 56 ракета, анын ичинде үч «Кинжал» аэробаллистикалык ракетасы, 18 «Искандер-М» ракетасы жана 35 Х-101 канаттуу ракетасы менен чабуул койду. Мындан тышкары 675 дрон колдонулган. Бул тууралуу украин армиясы билдирди.
Маалыматка караганда, алардын ичинен 41 ракета жана 652 дрон атып түшүрүлгөн. Бул сандарды көз карандысыз булактар азырынча ырастай элек.
Негизинен башкалаа Киев жана Киев облусу бутага алынган.
Киевдин Дарницкий районунда тогуз кабаттуу үй жабыркаганын шаар мэри Виталий Кличко билдирди. Анын айтымында, 18 батир талкаланган. Окуя болгон жерден тартылган сүрөттөр менен видеолордо үйдүн бир подъезди толугу менен урап түшкөнү көрүнүп турат.
Бийликтин акыркы маалыматына ылайык, Киевде беш адам каза болду.
Жараат алгандардын саны 39га жетти. Алардын арасында бир айлык ымыркай да бар экенин Кличко кошумчалады.
Урандылардын алдынан 28 адам куткарылды. Куткаруучулар дагы деле урандыларды тазалоону улантып жатышат, алардын алдында адамдар болушу мүмкүн.
Өзгөчө кырдаалдар боюнча мамлекеттик кызмат чабуулдун кесепеттерин жоюу иштери уланып жатканын билдирди.
Киев облусунда Өзгөчө кырдаалдар кызматы бир катар райондордо соккулардан улам кыйроолор катталганын маалымдады. Айрым жерлерде өрт тутанган.
Андан тышкары Одесса облусуна коюлган чабуулдун натыйжасында порттогу жабдуулар, имараттар жана жүк ташуучу автоунаалар жабыркаган. Бул тууралуу аймак башчысы Олег Кипер билдирди.
Чернигов районунда орус армиясынын дрон соккуларынан энергетикалык объект жабыркап, 31 миңден ашуун киши электр жарыксыз калганы кабарланды.
Харьков облусунун бийлиги билдиргендей, аба чабуулдан тогуз адам жабыркады.
Украинанын президенти Владимир Зеленский орус аскерлери кадимки турак үйлөрдү, мектепти, ветеринардык клиниканы жана башка жарандык инфраструктураны бутага алганын билдирди.
Орус аскерлери азырынча бул чабуулдар боюнча комментарий бере элек. Адатта Москва жарандык жайларга жасалган соккуларды четке кагып, бир гана аскердик объектилерди бутага аларын билдирип келет.
Financial Times басылмасы Путин менен байланышта болгон адамдарга, кырдаалды ичинен билгендерге жана украин чалгын кызматынын баасына таянып жазгандай, Орусиянын аскердик жетекчилиги президент Владимир Путинди Донбассты толук басып алууну ушул жылдын күзүнө чейин аяктайбыз деп ишендирген.
Басылманын үч маектешинин айтымында, Донбассты басып алгандан кийин Путин «ок атышууну токтотуунун баасын көтөрүүнү» көздөп жатат.
Украинанын Коргоо министрлигине караштуу Башкы чалгын башкармалыгынын жетекчисинин орун басары Вадим Скибицкийдин пикиринде, Донбасстагы ийгилик Кремлге кийинки аймактык талаптарды коюуга мүмкүнчүлүк берет.
Тактап айтканда, Орусия азыр да бир кыйла бөлүгү Украинанын көзөмөлүндө турган Запорожье жана Херсон облустарын өткөрүп берүүнү талап кылышы мүмкүн.
Басылма сүйлөшкөн эки булактын айтымында, Путиндин Донбассты басып алуу аракети күчөп жатат.
«Мен аны дайыма азыркы майдан сызыгында токтоого көндүрүүгө аракет кылам. Бирок ал баш тартууда», — деген булактардын бири.
Согушту токтотуу боюнча расмий эмес сүйлөшүүлөргө катышкан эки булактын айтымында, Путиндин «чыныгы дымагы» Украинанын көпчүлүк бөлүгүн, анын ичинде Днепр, Киев жана Одесса шаарларын көзөмөлгө алуу.
Эки тараптын позициясынан кабардар булактардын айтымында, Украина менен Орусия АКШнын ортомчулугу менен тынчтык сүйлөшүүлөрүнүн кайра жанданышына анча үмүт артпай жатышат.
АКШ президенти Дональд Трамп 12-майда журналисттердин суроолоруна жооп берип жатып, Путин менен Орусия «Донбассты бүт алат» деген келишим болбогонун билдирди.
Ошондой эле ал быйыл Орусияга барышы мүмкүн экенин айтып, Украинадагы согушту токтотуу үчүн «зарыл болгон бардык нерсени» жасай турганын белгиледи.
Трамп согуштун аякташы жакындап калды деген пикирин билдирди. Бирок Financial Times басылмасы сүйлөшкөн булактардын айтымында, азыр эки тарап тең сүйлөшүүлөрдү улантуунун маанисин көрбөй жатат.
Басылманын маалыматына караганда, Украина сүйлөшүүлөр акыркы жолу февралдагы орус-украин жолугушуусунан кийин эле туңгуюкка кептелди деп эсептейт жана Вашингтон Путинге басым жасай албаганына нааразы.
Москва согушту токтотуу үчүн Киев аскерлерин Донецк облусунан чыгарып кетиш керек деген талапты коюп келет.
Украина болсо согуш аракеттерин азыркы фронт сызыгы боюнча токтотууну сунуштоодо.
Мындай учурда Донбасстын чоң бөлүгү Орусиянын көзөмөлүндө калмак. Ошол эле учурда Украина муну юридикалык жактан тааныбай турганын билдирип келет.