Орус армиясынын ракета жана дрондор менен урган соңку соккуларынан Украинада кеминде 11 жай тургун каза болуп, дагы 40 адам жараат алды.
Бул тууралуу Украинанын президентиВладимир Зеленский билдирди. Ал чабуулду "үрөй учурган сокку" деп мүнөздөдү.
Зеленскийдин айтымында, орус армиясынын ракеталык соккусу Днепр шаарында беш адамдын өмүрүн алып, 29 кишини жарадар кылган.
Ошондой эле орус күчтөрүнүн дрону Запорожье шаарында жүргүнчү ташыган кичи автобуска тийип, үч адам набыт болгон.
Сумы облусунда дрондордун чабуулунан 69 жаштагы аял жана 77 жаштагы эркек каза болгонун Украинанын Улуттук полициясы билдирди.
Ал эми Харьковдун мэри Игорь Терехов күндүзгү соккусунан бир адам каза болуп, дагы беш киши жаракат алганын маалымдады.
Украинанын бийлиги билдиргендей, адам өмүрүн алган чабуулдар өлкөнүн дагы кеминде алты аймагында катталган. Алар боюнча кошумча маалымат азырынча бериле элек.
Орусиянын бийлиги 29-июндагы соккулар тууралуу эч кандай билдирүү жасаган жок. Адатта Москва бир гана аскердик жайларды бутага аларын билдирип, карапайым тургундар жашаган райондорго сокку урганын четке кагып келет.
Днепрге сокку: төртөө каза болуп, 28и жарадар
Днепр шаарына абадан урулган соккудан төрт адам каза таап, 28и жарадар болду.
Бул тууралуу Днепропетровск облустук аскердик администрациясынын башчысы Александр Ганжа билдирди.
Анын маалыматында, сокку жеке ишканага тийген. Жарадарлардын бешөө оор абалда.
Орусиянын президенти Владимир Путин өлкөдө күйүүчү май тартыштыгы жаралганын моюнга алып, бул көйгөй жарандарга жана бизнеске таасирин тийгизип жатканын билдирди.
28-июнда бийликтеги "Единая Россия" партиясынын жетекчилери менен жолугушууда ал айдоочулар менен ишкерлер кабылган көйгөйлөр чечиле электигин айтып, май куюучу жайларда кезектер дагы эле бар экенин белгиледи.
Путин бул абалды Украинанын Орусиянын аймагындагы энергетикалык объектилерге жасаган дрон чабуулдарына байланыштырды. Анын айтымында, "жарандык объектилерге жана инфраструктурага жасалган террордук чабуулдардын кесепеттерин мүмкүн болушунча азайтуу" зарыл.
Украинанын соккулары бир нече айдан бери мунай терминалдарын, кайра иштетүүчү заводдорду жана куурларды бутага алган.
Натыйжада Орусиянын кеминде 17 аймагында бензин менен дизелди сатууга милдеттүү чектөөлөр киргизилип, дагы ондогон аймактарда күйүүчү май тартыштыгы же жеке компаниялар тарабынан киргизилген чектөөлөр тууралуу маалыматтар тарады.
Кийинчерээк Кремл жарыялаган маегинде Путин энергетикалык инфраструктурага урулган соккулар көйгөй жаратып жатканын моюнга алып, ошол эле учурда абалды жеңилдетүүгө аракет кылды.
"Учурда белгилүү бир тартыштык бар, бирок ал критикалык деңгээлде эмес", – деди ал.
Украинанын басып алынган аймактарындагы блэкаут
Орусия аннексиялап алган Крымда жана Украинанын басып алынган аймактарында электр берүү үзгүлтүккө учураганы тууралуу кабарлар түшүүдө.
"Крымский ветер" телеграм-каналы жергиликтүү жашоочуларга таянып, Бахчысарайдын төмөн жагындагы Некрасовка айылына сокку урганын билдиришти.
Блэкаут тууралуу маалымат оккупация болгон Донецк облусунан да түшүп жатат.