Орусиялык аскерлер Одесса облусундагы жарандык инфраструктурага сокку урду
Одесса облусунун администрациясынын башчысы Олег Кипердин маалыматында, чабуулдун натыйжасында азык-түлүк сакталган кампада өрт чыккан.
Анын айтымында, эки адам 29 жана 41 жаштагы эркектер жабыр тарткан.
"Дарыгерлер алардын биринин абалын орточо оор деп баалашууда, экинчисинин абалы канааттандырарлык", - деп жазды Кипер.
Орусиянын Белгород аймагында ракеталык чабуулдан кийин электр энергиясы жана суу берүү үзгүлтүккө учурады
Белгород шаары жана Белгород району Украинанын Куралдуу күчтөрүнүн чабуулуна кабылганын 4-июлга караган түнү аймактын губернаторунун милдетин аткаруучу Александр Шуваев билдирди.
Анын айтымында, Белгороддо инфраструктуралык объектилер жабыркап, анын кесепетинен электр энергиясы жана суу менен камсыздоо үзгүлтүккө учураган.
Ишемби күнү эртең менен аймактык ыкчам штаб коммуналдык кызматтар ракеталык чабуулдун кесепеттерин жоюу иштерин улантып жатканын маалымдады.
"Электр энергиясын калыбына келтирүү үчүн адистер тармактарды резервдик электр камсыздоо схемаларына кошуп жатат. Ушуга байланыштуу шаардын айрым райондорунда маал-маалы менен электр жарыгы өчүшү мүмкүн", - деп айтылат билдирүүдө.
Ыкчам штаб суу берүү дагы үзгүлтүккө учурашы мүмкүн экенин билдирди.
Орусиянын Коргоо министрлиги ишембиге караган түнү абадан коргонуу күчтөрү Украинанын 389 дронун атып түшүргөнүн билдирди.
Мекеменин маалыматында дрондор Белгород, Брянск, Владимир, Калуга, Курск, Липецк, Ленинград, Новгород, Орёл, Псков, Ростов, Рязань, Саратов, Смоленск, Тверь жана Тула облустарынын үстүнөн, ошондой эле Краснодар крайында, Москва аймагында, аннексияланган Крымда жана Азов менен Кара деңиздин акваторияларында жок кылынган.
Орусиянын жоготуулары Украинаныкына караганда жогору. Киев басып алынган жерлерин кайра кайтарууда.
Америкалык Center for Strategic and International Studies (CSIS) борборунун жаңы маалыматына ылайык, Орусия Украинага кол салгандан бери эки тараптан тең каза болгон жана жараат алган аскерлердин жалпы саны 2 миллиондон ашты.
