АКШнын президенти Дональд Трамп 4-июлда - Америка эгемендигинин 250 жылдыгын белгилеген күнү Украинанын президенти Владимир Зеленский жана Орусиянын президенти Владимир Путин менен телефондон сүйлөштү.
Сүйлөшүүдөн кийин Зеленский Трампка Украинаны колдогону үчүн ыраазылык билдирди.
"Биз Америка көз карандысыздыкты коргоодо бизди колдоп жатканын абдан баалайбыз", – деп жазды ал өзүнүн Телеграм каналында.
Зеленскийдин айтымында, тараптар согушту токтотуу маселесин талкуулады.
"Бул согушту токтотуунун реалдуу болочогу бар, мында Американын чечкиндүүлүгү чечүүчү мааниге ээ болот", – деген украин президенти тараптар НАТОнун Анкарадагы саммитинде талкууну улантууну макулдашканын кошумчалады.
Орус президентинин жардамчысы Юрий Ушаков болсо телефондон сүйлөшүүдө Путин "тарыхтын жалпы барагына, анын ичинде СССР менен Экинчи дүйнөлүк согуш маалындагы өнөктөштүккө аяр мамиле кылуунун маанисин" белгилегенин билдирди.
Ушаковдун айтымында, тараптар украин-орус согушун да талкуулады. Трамп согуштук аракеттерди тез арада токтотууга көсөктөшүүгө, конфликтти жөнгө салуу жолдорун издөөгө даярдыгын айткан. Путин Орусиянын армиясы чабуулду улантып жатканын билдирген.
Украинанын Башкы штабы Донецк облусундагы Константиновка шаарын орус армиясы алганы тууралуу маалыматтар чындыкка коошпой турганын билдирди.
4-июлда Украинанын Куралдуу күчтөрүнүн Башкы штабынын өкүлү Андрей Ковалев украин аскерлеринин "Восток" тобу коргонуу операцияларын улантып жатканын айтты.
"Константиновка калктуу пункту Украинанын коргонуу күчтөрүнүн көзөмөлүндө", - деди Ковалев.
Ошол эле кезде ал орус тарап шаарды алууга аракеттенип жатканын белгиледи.
Украин президенти Владимир Зеленский муну "орустардын кезектеги калпы" деп атады.
4-июлда Орусиянын Башкы штабынын өкүлү Сергей Рудской брифингде орус армиясы Константиновкага толук көзөмөл орнотконун, ал үчүн салгылаштар 2025-жылдын октябрынан бери жүрүп жатканын жарыялаган.
"РБК-Украина" басылмасы украиналык DeepState долбоорунун картасына таянып, Константиновка орус тарапка өтпөгөнүн жазды. Картага ылайык, орусиялык аскерлер аталган калктуу пункттун жанында турат, бирок аны ээлешкен эмес.
Бир күн мурда Орусиянын Башкы штабынын башчысы Валерий Герасимов президент Владимир Путинге майдандагы кырдаал тууралуу маалымат берип жатып, Константиновка алынганын айткан. Путин аскер кызматкерлери менен жолугушууда "Луганск Элдик Республикасы" (ЛЭР) деп атап алышкан аймак "толук бошотулганын" айткан.
- Орусиянын бийлиги Украинадагы тиги же бул калктуу пункттарды басып алышканын буга чейин да бир нече ирет жар салган. Ал маалыматтар иликтөөлөрдө аныкталбаган, украин тарап четке каккан учурлар болгон.
- Украинанын Луганск облусуна (Кремль ЛЭР деп атайт) толук көзөмөл орногонун Москва акыркы жолу быйыл апрелде жарыялаган. Киев муну четке каккан.
Украинанын Башкы штабы орусиялык бийликтердин армия Донецкидеги Константиновка шаарына көзөмөл орноткону тууралуу маалыматын "чындыкка дал келбейт" деп төгүндөдү.
Ишемби күнү Украинанын Куралдуу күчтөрүнүн башкы штабынын башчысы Андрей Ковалев "Восток" күч түзүмүнүн аскерлери калктуу конуштардын чет жакасында жана ага жакын аймактарда коргонуу операцияларын жүргүзүп жатканын билдирди.
"Константиновка калктуу конушу Украинанын Коргонуу күчтөрүнүн көзөмөлүндө", - деп белгиледи Ковалёв. Ошол эле учурда ал Орусия шаардын үстүнөн көзөмөл орнотуу аракеттерин токтотпой жатканын айтты.
Украинанын президенти Владимир Зеленский кабарды "эптеп жаңылык жаратуу үчүн айтылган кезектеги орус калпы" деп сыпаттады.
"Эгер Константиновка азыр Орусиянын көзөмөлүндө болсо, анда Путинге мени менен ошол жерде жолугуп, согушту токтотуу үчүн дипломатиялык чечимдерди табуу кыйын болбошу керек", - деп жазылган Зеленскийдин Tелеграм-каналындагы билдирүүсүндө.
Орусиянын Башкы штабынын Башкы оперативдик башкармалыгынын башчысы Сергей Рудской 4-июлдагы брифингде орус аскерлери 2025-жылдын октябрынан бери салгылашуулар жүрүп жаткан Константиновканы толугу менен карамагына алганын билдирген.
"РБК-Украина" басылмасы DeepState'ттин OSINT-долбоору жарыялаган картасы орус аскерлери калктуу конуштун жанында турганы менен аны толук көзөмөлгө алганы көрүнбөгөнүн жазды.
Бир күн мурда Орусиянын Башкы штабынын жетекчиси Валерий Герасимов фронттогу кырдаал боюнча президент Владимир Путинге отчет берип жатып Константиновка толук алынганын билдирген.
Ишембиге караган түнү Орусиянын армиясы Украинанын аймактарын "Искандер М", Х-59/69 авиациялык ракеталары жана 80ден ашуун дрон менен аткылады. Арасынан ракеталар жана 17 дрон бутага тийип, калгандарын Украинанын абадан коргонуу системалары атып түшүргөн.
Одесса облусунун жарандык инфраструктурасын аткылоо учурунда азык-түлүк кампасында өрт тутанганын облустук администрация башчысы Олег Кипер жазды. Анын айтымында, 29 жана 41 жаштагы эки адам жараат алып, биринин абалы оор.
Сумы шаарын аткылоодо үч киши каза болгонун, бирөө бала экенин Украинанын Өзгөчө кырдаалдар боюнча мамлекеттик кызматы кабарлады.
"Соккулар шаардын борбордук бөлүгүндөгү көчөлөргө урулган. Талкаланган көп батирлүү үйлөрдөн беш кишини куткарып калдык. Дагы 27 адам, анын ичинде жети бала түрдүү жарааттарды алды", - деп жазылган маалыматта.
Аймактын башчысы Олег Григоровдун билдиришинче, жараат алган бир адам ооруканада каза болду.
Харьков облусунун башчысы Олег Синегубовдун билдиришинче, 13 киши жараат алып, жарандык инфраструктура объекттери кыйраган.
Запарожьеде эки киши каза болуп, 39у жараат алды. Бир сутка ичинде тийиштүү кызматтарга турак жай, автоунаа жана инфраструктуралык объектилер жабыркаганы тууралуу 344 билдирүү түшкөн.
Донецкиде беш киши каза болуп, 12си жараат алды. Бул аймакка коюлган чабуулдан Дружковка, Славянск жана Краматорск көбүрөөк жабыр тарткан.
Орус армиясы Херсон облусундагы "Чернобаевская" канаттуулар фабрикасына авибомба таштаган.
4-июлдун таңында орусиялык дрондор Украинанын Полтава облусундагы "Нефтегаз" компаниялар тобунун газ өндүрүүчү объекттерине чабуул коюп, өрт чыккан ишканада жумуш токтоду. Бул тууралуу “Нафтогаз” башкармалыгынын төрагасы Сергей Корецкий маалымдады. Объектиге буга чейин дагы сокку урулган.