Киевге сокку урулуп, 11 адам жараат алды
Ишембиге караган түнү Орусия Украинанын борборуна дрондор жана ракеталар менен дагы сокку урду. Украинанын куткаруу кызматтары кеминде 10 адам жараат алганын билдирүүдө. Киевдин мэри Виталий Кличко өзүнүн Телеграм-каналында жабыркагандардын арасында 11 жаштагы бала бар экенин жазды. Кийинчерээк жараат алгандардын саны 11ге жеткени белгилүү болду.
Шаардын Днепр районунда соккунун кесепетинен турак эмес имараттан өрт чыгып, учурда ал толугу менен өчүрүлдү.
Украинанын армиясы бул түнү өлкө аймагына жалпысынан алты баллистикалык ракета учурулганын билдирди.
Украинанын Аба күчтөрүнүн басма сөз кызматы Телеграм-каналында Орусиянын Х-59/69 үлгүсүндөгү эки башкарылуучу авиациялык ракетасы жана ар кандай типтеги 111 учкучсуз учуучу аппараты атып түшүрүлгөнүн билдирди.
Украин аскерлери 11 локацияда баллистикалык ракеталар, эки башкарылуучу авиациялык ракета жана жети сокку уруучу дрон бутага тийгенин, ошондой эле үч локацияда атып түшүрүлгөн аппараттардын сыныктары чачыраганын катташкан. Радиолокацияга каршы ракета боюнча маалыматтар такталууда.
Жума күнү Украинанын президенти Владимир Зеленский жакын арада АКШ Украинага "Искандер", "Кинжал" жана башка орусиялык ракеталарды атып түшүрүүгө жөндөмдүү Patriot абадан коргонуу тутумдары үчүн жаңы ок-дарыларды өткөрүп берерин билдирген.
Орусиянын аскерлери 10-июлга караган түнү Украинанын аймагына 137 дрон менен чабуул койду. Бул тууралуу украин армиясынын Аба күчтөрү билдирди.
"Алдын ала маалыматтар боюнча, саат 08:00гө карата өлкөнүн түндүк, түштүк жана чыгыш аймактарында абадан коргонуу күчтөрү тарабынан душмандын "Шахед", "Гербера", "Италмас" жана башка типтеги 114 дрону атып түшүрүлдү же зыянсыздандырылды", - деп жазылган маалыматта.
Аскер кызматкерлеринин айтымында, 18 дрон 16 жерде бутага тийген, төрт жерде сыныктары чачыраган.
Аба күчтөрү чабуул уланып жатканын жана өлкөнүн аба мейкиндигинде бир нече орус дрондору бар экенин эскертти.
Орусиянын армиясы Украинанын шаарларын жана жарандык инфраструктураларын дрон, ракета, аралыктан башкарылуучу авиабомбалар жана реактивдүү системалар баштаган курал-жарактар менен тынымсыз аткылап келет.
Украин бийлиги жана эл аралык уюмдар бул соккуларды Орусия Федерациясынын аскердик кылмышы катары баалашат.
Калкты электр энергиясы, жылуулук, суу, байланыш, медициналык жардам өңдүү жашоого зарыл шарттардан ажыратуу максатында тиричиликке керектүү тутумдарды жана ооруканаларды аткылоо геноциддик аракеттердин белгиси болуп саналат.
Орусиянын жетекчилиги ири масштабдуу согуш учурунда армиясы Украинанын жарандык инфраструктурасына атайылап сокку уруп, жарандарды өлтүрүп, ооруканаларды, мектептерди, бала бакчаларды, энергетика жана суу менен камсыздоо объекттерин талкалап жатканын четке кагып келет.
Украинанын президенти Владимир Зеленский Вишневое шаарындагы ок-дары кампасында жарылуудан кийин күнөөлүүлөр жоопко тартыларын жана "Укроборонпром" мамлекеттик концернинде кадрдык өзгөрүүлөр болорун жарыялады.
"Үрөй учурган кырдаал. Вишневоедо ок-дары кампасы бар болчу, душман бул кампага сокку урганда адамдар жабыркап, жоготуулар көп болду. Көңүл айтам... Бирок жөн гана сооротуу жетишсиз, ошондуктан Украинанын Коопсуздук кызматынан, Ички иштер министрлигинен жана Башкы прокуратурадан бардык маалыматтарды алдым. Кылмыш иши козголду, күнөөлүүлөр жоопкерчиликке тартылат жана албетте, "Укроборонпромдо" өзгөрүүлөр болот. Анткени бул кампа "Укроборонпромдун" ишканаларынын бирине таандык болчу", - деди Зеленский 9-июлда журналисттердин суроолоруна жооп берип жатып.
6-июлга караган түнү Орусиянын куралдуу күчтөрү Украинанын аймагына ар кандай типтеги аба, жердеги жана деңиз базасындагы ракеталар, дрондор менен жапырт сокку урган. Жалпы 68 ракета жана 351 учкучсуз учак учурулуп, негизги бута Киев болгону кабарланды.
Облустук аскердик администрациянын маалыматында, чабуулдан Киев облусунун төрт району: Буча, Бровары, Борисполь жана Вышгород райондору жабыркаган. Киев облусунда 6-июлдагы соккунун кесепетинен тогуз адам каза болуп, 50дөн ашыгы жараат алган.
Эң чоң кыйроолор соккудан кийин ири жарылуу (детонация) орун алган Вишневое шаарында катталды. Кампага чектеш көчөлөрдүн тургундары коопсуз жайларга эвакуацияланды.
Украинанын Куралдуу күчтөрүнүн Башкы штабы жарылуу болгон объект өлкөнүн Куралдуу күчтөрүнүн карамагында болбогонун билдирди. Украинанын президенти Коопсуздук кызматына жана чалгындоо кызматына детонациянын себептерин аныктоону тапшырды.
Орусиянын Коргоо министрлиги ал убакта Киев облусунун Вишневое шаарындагы күйүүчү-майлоочу майлардын кампасына ("Нефтеэкспериментальное КП"), зениттик-ракеталык системаларды жана авиациялык техника үчүн тетиктерди чыгарып, техникалык тейлөө жана оңдоо иштерин жүргүзгөн Жуляндагы "Визар" машина куруу заводуна сокку урулганын жарыялаган.
Мекеме бул соккунун кесепетинен дагы бир жолу жарылуу болгонун билдирген.
Трамп Киевге Patriot ракеталарын чыгарууга уруксат берилерин айтты
Орусия бир апта ичинде Киевге үчүнчү ирет жапырт сокку урган күнү украин президенти Владимир Зеленский мекенинен 1200 чакырым алыста жүрүп, дал ошол чабуулдардын мизин кайтарууга же жок дегенде туруштук берүүгө өбөлгө болчу куралдарды өндүрүүгө уруксат сурады.
Орусиянын 52 айдан бери уланып жаткан баскынчылыгына каршы туруу үчүн Украинага азыр көп нерсе керек. Эң оболу Орусиянын кыйраткыч баллистикалык ракеталарын асмандан жок кылчу курал-жабдык аба-суудай эле зарыл.
Буга чейин АКШ берген Patriot абадан коргонуу комплекси Москванын баллистикалык ракетасынан ишенимдүү коргоп турган жалгыз система деп саналчу. Бирок Украинада Patriot системасына керектелчү ракеталардын запасы азайып баратат.
Буга кошул-ташыл болуп, АКШнын кампалары да бошой баштады. Соңку маалда Вашингтон Жакынкы Чыгыштагы америкалык күчтөрдү жана өнөктөштөрүн Ирандын чабуулдарынан коргоо үчүн дал ушул ракеталарды колдонууда.
Киев болсо Patriot комплексине ракеталарды Украинада чыгарууга кызыкдар. Ал үчүн АКШнын расмий лицензиясын алуу зарыл эле. 8-июлда украин президенти Зеленскийдин ою оңунан чыккандай болду.
Түркияда өткөн НАТО саммитинин алкагында АКШ президенти Дональд Трамп украин лидери менен жолукканда Киевге Patriot ракеталарын чыгарууга уруксат берилерин билдирди.
"Биз силерге Patriot чыгарууга укукту беребиз", – деди Трамп.
"Ошондо силер бизге жетиштүү көлөмдө бербей жатасыңар деп доомат артпай каласыңар. Мен эми өзүңөр чыгара бергиле дейм", – деди америкалык лидер.
Лондондо жайгашкан Маалыматтык жактан туруштук берүү борборунун эсебине ылайык, январдан бери украин армиясы Орусия алыс аралыктан учурган дрондордун 90% абадан жок кылган. Ошондой эле 722 канаттуу ракетанын 80% атып түшүрүлгөн.
Бирок баллистикалык ракеталарга келгенде абал оор. Быйыл эле орустардын 522 баллистикалык ракетасынын болжол менен 70% мээлеген бутасына тийген.
Орусиянын башкы баллистикалык куралы – жерден атылуучу "Искандер-М" ракетасы. 500 чакырымга чейин жетип, үн ылдамдыгынан жети эсе тез учушу ыктымал. Башкача айтканда мындай ракета бир нече мүнөттө эле бутага жетет.
Украин аба күчтөрүнүн маалыматына ылайык, 6-июлдагы чабуул маалында атылган 23 "Искандер-М" ракетасынын бирөөнү да абадан кармай алган эмес. Ошондой эле "Циркон" деп аталган алты гиперүндүү канаттуу ракета да өз бутасына жеткен. Анткени аларды асмандан кармап жок кылуучу ракеталар тартыш.
"Баллистикалык ракеталарды атып түшүрүү үчүн атайын жабдыктар керек. Бизде системалар жетиштүү, бирок ракеталардын туруктуу запасы аз", – деди украин аба күчтөрүнүн өкүлү, полковник Юрий Игнат 2-июлдагы кандуу чабуулдан кийин мамлекеттик телеканалга.
Аскердик адис белгилегендей, Орусия ушул тапта Украинада жана дүйнө жүзүндө Patriot системалары үчүн ракеталар тартыш экенинен пайдаланып жатат.
"Ошондуктан Москва барган сайын баллистикалык ракетага көбүрөөк басым жасоодо", – деди Игнат.
Patriot - өтө татаал технология
АКШнын аскердик ири компаниялары Lockheed Martin жана Raytheon чыгарган Patriot комплекси бир нече негизги бөлүктөн турат. Ааларга абадан тосуп жок кылуучу ракеталар, аларды учура турган түзүлүш, радар, жогорку жыштыктагы антенна, башкаруу пункту жана электр генератору кирет.
Стратегиялык жана эл аралык иликтөөлөр борборунун маалыматына ылайык, бир Patriot комплексинин жалпы баасы болжол менен 1,1 миллиард доллар. Анын ичинен 400 миллион доллары ракета учуруучу түзүлүштөргө жана башка жабдууларга кетсе, 690 миллион долларга жакыны ракетага жумшалат.
Маалыматка таянсак, ушул тапта Украинада кеминде жети Patriot системасы бар. Алардын үчөөнү АКШ, дагы үчөөнү Германия берген. Бери дегенде дагы бирди Европадагы өнөктөш өлкөлөрдүн тобу жеткирген.
Бирок бул системалар толугу менен дайыма колдонулбайт. Техникалык тейлөө жана оңдоо иштеринен улам алардын айрымдары убактылуу иштен чыккан.
Украин армиясында Франция менен Италия бирге өндүргөн SAMP/T абадан коргонуу системалары да бар. Бул система канаттуу ракеталар менен дрондордун мизин кайтарууда майнаптуу деп эсептелет. Бирок баллистикалык ракеталар өтө бийик жана тез учкандыктан, SAMP/T баарын толук тосуп кала албайт.
Украинада жетишпей жаткан негизги ресурс – Patriot системасы колдонгон PAC-2 жана андан жаңыраак PAC-3 үлгүсүндөгү абадан атып түшүрчү ракеталар.
Украин бийлиги акыркы айларда бул маселени чечүү үчүн АКШ администрациясы менен активдүү сүйлөшүүлөрдү жүргүздү. Ошондой эле Киев европалык өнөктөштөрдүн колдоосун алууга дагы жан үрөп жатат.
"Украиналыктар бир жылга жетпеген маалда дээрлик PAC-2ге тең келчү абадан жок кылуучу ракетаны иштеп чыгып, аны көп санда өндүрө аларын айтууда. Эгер алар аны ишке ашыра алышса, биз кубаттайбыз", – деди "Азаттыкка" НАТОдогу жогорку даражалуу дипломат.
Ошол эле учурда адистер Украина жакын арада мындай ракеталарды толук көлөмдө өндүрүп жиберет дегенге этият карашат. Patriot үчүн ракета чыгарууга өтө татаал технологиялар, өндүрүштүк база жана узак убакыт талап кылынат. Андыктан лицензия алуу маанилүү кадам болгону менен иш жүзүнө анын жыйынтыгы дароо эле байкалбашы мүмкүн.