9-июлга караган түнү украин дрондору Орусиянын бир нече аймагындагы күйүүчү май инфраструктурасынын объекттерине кайрадан чабуул койду.
Бул жолу Тверь облусундагы жана Ставрополь крайындагы мунай базаларына жана Таганрог булуңундагы эки танкер соккуга кабылды.
Тверь облусунун губернатору Виталий Королёв чабуулдан кийин "Тверьнефтепродукт" мунай базасынын резервуарларынын бири өрттөнгөнүн билдирди.
Анын айтымында, өрт чектөөгө алынып, жабыркагандар болгон жок. ASTRA басылмасы белгилегендей, ишкананын резервуарларынын бир бөлүгү буга чейин дронго каршы торлор менен жабдылганына карабастан, талкаланган.
Ставрополь крайындагы Вязники хуторунда жайгашкан мунай базасынын аймагында да өрт чыкты. Аймактын башчысы Владимир Владимиров алгач өнөр жай объектинде өрт чыкканын кабарлап, кийинчерээк жалын май куюлган резервуарларга жайылганын тактады. Жакын жердеги үйлөрдүн тургундары коопсуз жайларга көчүрүлдү.
ASTRA'нын маалыматы боюнча, сөз "Лукойл-Югнефтепродукт" мунай базасынын жанында жайгашкан Вязникидеги ири мунай сактагыч жөнүндө болуп жатат.
Ростов облусунда эки күндөн бери катары менен Таганрог булуңундагы танкерлерге чабуул жасалууда. Губернатор Юрий Слюсарь билдиргендей, эки кеме механикалык зыянга учурап, экөөндө тең өрт чыккан. Кемедеги экипаждар эвакуацияланып, жабыркагандар катталган жок.
Орусия тарабынан дайындалган Херсон облусунун башчысы Владимир Сальдо энергетикалык инфраструктура объекттерине урулган соккулардан кийин, аймактын Орусиянын көзөмөлдөгөн бөлүгү толугу менен же жарым-жартылай электр энергиясыз калганын жарыялады.
Орусиянын Коргоо министрлиги түн ичинде абадан коргонуу күчтөрү өлкөнүн 11 аймагында, анын ичинде аннексияланган Крымда жана Азов деңизинин үстүндө Украинанын 73 учкучсуз учагын атып түшүргөнүн маалымдады.
- Акыркы айларда украин дрондору Орусиянын мунай инфраструктурасына тынымсыз сокку уруп келет. Чабуулдарга өлкөнүн бардык ири мунай кайра иштетүүчү заводдору дуушар болду. Орусияда күйүүчү май кризиси сакталып турат. Дээрлик бардык аймактарда бензин сатууга чектөөлөр киргизилген.
8-июлга караган түнү украин учкучсуз учактары Орусиянын аймагындагы инфраструктуралык мунай объекттерине жана аскер буталарына кайрадан сокку урду.
Саратовдо чабуулдан кийин мунай өндүрүүчү заводдо өрт тутанды. Губернатор Роман Бусаргин бир адам каза болуп, бир нечеси жараат алганын билдирди. Анын айтымында, жарандык инфраструктуралык объекттерге зыян келтирилген.
Мониторинг жүргүзгөн Телеграм-каналдар чабуулдун бутасы "Роснефть" компаниясынын мунай өндүрүүчү заводу (МӨЗ) болгонун ырасташууда.
Татарстандын Нижнекамск шаарында, украин мониторинг каналдарынын жана Astra басылмасынын маалыматында ТАИФ-НК жана "Танеко" мунайды кайра иштетүүчү ишканалары жайгашкан өнөр жай зонасына сокку урулду.
Окуянын күбөлөрү өрт чыккан жерден сүрөт жана видеолорун жарыялашууда. Бийлик органдары учкучсуз учактар чабуул койгонун ырасташты, бирок анын кесепеттери тууралуу маалымат беришкен жок.
ASTRA басылмасынын маалыматында Воронеж облусунда чабуулдан кийин Борисоглебск аскер аэродромунун аймагында өрт тутанган.
Украиналык "Supernova+" Телеграм-каналы учкучсуз учактар аэродромдун жанындагы мунай базасына да чабуул койгонун айтууда. Жергиликтүү бийлик аба коркунучу тууралуу айгай жарыяланганын ырастаганы менен, кандайдыр бир объекттердин жабыркаганын кабарлаган жок.
Ростов облусунда украин дрондорунун чабуулунан Ростов-на-Дону шаарына багыт алган эки бош танкер зыянга учурады. Губернатор Юрий Слюсарь билдиргендей, эки адам жеңил жараат алып, кемелердин биринин экипажы эвакуация болгон.
Анын айтымында, мунай өнүмдөрү деңизге төгүлгөн эмес.
Телеграм-каналдарда таңга маал Уфа шаарына да учкучсуз учактар чабуул койгону тууралуу маалыматтар пайда болду. Жарыяланган кадрларга караганда, мунайды кайра иштетүүчү ишканалардын биринин аймагынан коюу түтүн көтөрүлгөнүн көрүүгө болот.
Орусиянын Коргоо министрлиги абадан коргонуу күчтөрү түндө Украинанын 415 учкучсуз учагын жок кылганын жарыялады. Мекеме алардын канчасы бутага тийгенин кабарлаган жок. Украина тарап азырынча түнкү соккулар боюнча расмий түшүндүрмө бере элек.
Украинанын Куралдуу күчтөрү 6-июлда Омск шаарындагы мунай өндүрүүчү заводго сокку урду.
Аталган аймак Украинадан 2500 чакырым алыс.
Бул тууралуу Украинанын мониторинг жүргүзүүчү Exilenova+ жана Supernova+ Телеграм-каналдары жарылуулардын жана болжолдуу өрттүн кадрларын жарыялоо менен билдиришти.
Украинанын Куралдуу күчтөрүнүн Башкы штабы заводго сокку урулганын ырастады.
"Бул украин аскерлери чабуул койгон Орусиядагы эң ири 11 бензин өндүрүүчүлөрдүн акыркысы", - деп билдирди Башкы штаб.
Омск облусунун губернатору Виталий Хоценко тургундарга учкучсуз учактар коркунучу тууралуу эскертип, андан кийин абадан коргонуу күчтөрү украин дрондорун атып түшүргөнүн жана чабуулдун кесепеттери такталып жатканын жазган.
Кийинчерээк губернатор украин чабуулунун бутасы Омск мунай өндүрүүчү заводу (МӨЗ) болгонун моюнга алды. Аткаминер Коргоо министрлиги "учкучсуз учактардын басымдуу бөлүгүн жок кылганын" айтты. Анын белгилешинче, каза болгондор жана жабыркагандар жок.
Омск мунай өндүрүүчү заводу - Орусиядагы ири ишканалардын бири. "Газпром нефть" ачык акционердик коомунун (ААК) курамына кирет. Компаниянын сайтында Омск заводу Орусиядагы эң заманбап мунай өндүрүүчү ишканалардын бири экени айтылат.
Завод өндүргөн күйүүчү майын сыртка экспорттоп турган, анын негизги кардарларынын бири Кыргызстан. Заводго сокку урулганы ушу тапта социалдык тармактардын кыргыз сегментинде кызуу талкууланууда.
2026-жылдын жаз жана жай айларында украин аскерлери Орусиянын мунай өндүрүүчү заводдоруна сокку урууну күчөткөн. Мындан улам Орусиянын өзүндө күйүүчү май тартыштыгы жаралганы кабарланууда.
Күйүүчү майды негизинен Орусиядан алган кыргыз өкмөтү бир катар мамлекеттер менен сүйлөшүү жүргүзүп жатканын кабарлаган.