Украинанын президенти Владимир Зеленский 22-июлда АКШ президенти Дональд Трамптын өкүлдөрү Стив Уиткофф жана Жаред Кушнер менен сүйлөштү. Бул тууралуу америкалык Axios басылмасы өз булактарына таянып кабарлады.
Сүйлөшүүлөр болгонун кийинчерээк Зеленский да ырастады.
Анын айтымында, "дипломатияны күчөтүү, тынчтыкка жакындоону талкуулаган маанилүү сүйлөшүү" болду.
Ал украин жана америкалык команда бири бири менен тыгыз байланышта экенин, талкууланып жаткан маселелердин үстүндө иштөөнү улантарын кошумчалады.
Сүйлөшүүлөр АКШнын мамлекеттик катчысы Марко Рубио менен Орусиянын тышкы иштер министри Сергей Лавровдун 23-июлда Манилада күтүлүп жаткан жолугушуусун утурлай өттү.
Рубио Лавров менен Украинадагы согуш маселесин талкуулоону көздөп жатканын айтты.
Буга чейин Москва Уиткофф менен Кушнерди кабыл алууга даярдыгын билдирген. Орус тышкы иштер министринин орун басары Сергей Рябков алардын Орусияга сапары күн тартибинде экенин, бирок мөөнөтү так эместигин билдирди.
Майдын этегинде Зеленский Уиткофф менен Кушнер Киевге эки апта ичинде келерине үмүт артып жатканын айткан. Бирок ал сапар болгон эмес.
Украина менен Орусиянын ортосунда тынчтык сүйлөшүүлөр АКШнын ортомчулугу менен быйыл февралда өткөн.
Жакынкы Чыгышта кырдаал курчуп кеткендиктен үч тараптуу сүйлөшүүлөр белгисиз мөөнөткө жылган.
Июнда Трамп Американын Иран менен жаңжалы жөнгө салынгандан кийин орус-украин согушун жөнгө салууга мүмкүнчүлүк болорун жарыялаган. Июлда АКШ менен Иран бири бирине кайра сокку ура баштады.
Орусиянын Мамлекеттик думасы өлкөдөн чыгып кеткен орусиялыктардын укуктарын чектеген мыйзам долбоорун дароо экинчи жана үчүнчү окууда кабыл алды.
Документке ылайык, Орусиядан чыгып кеткен жана кылмыш иши боюнча жаза аткаруудан же айрым административдик иштер боюнча жоопкерчиликтен качып жүргөн деп эсептелген жарандарга карата бир катар чектөөлөр киргизилет. Аларга чет өлкөлүк паспорт алуу, Орусиянын жарандыгынан чыгуу боюнча арыз берүү, Мамлекеттик кызматтар порталын пайдаланууга, Орусиядагы акча каражаттарын жана мүлкүн колдонууга тыяу салынат.
Орусиянын чет өлкөлөрдөгү дипломатиялык өкүлчүлүктөрү аларга юридикалык, консулдук жана нотариалдык кызматтардын көбүн көрсөтпөйт. Эки учурда гана, кишинин тирүү экени тууралуу күбөлүк, көзү азиз жарандардын кол тамгасын тастыктоодо гана мындай кызматтарды алууга уруксат берилет. Мыйзам армияны "дискредитациялоо", Орусияга каршы санкцияларды киргизүүгө чакыруу, өлкөнүн аймактык бүтүндүгүн бузууга үндөө, "Чет элдик агенттер" жөнүндө мыйзамды бузуу, "жагымсыз уюмдарга" байланышкан беренелер менен айыпталгандарга тиешелүү.
Башкы прокуратура бул чектөөлөргө туш болгон адамдардын ачык реестрин түзүп, аны өзүнүн расмий сайтына жарыялайт.
2025-жылдын декабрь айынан бери каралып жаткан документ Мамлекеттик Думанын азыркы чакырылышынын иш мөөнөтү аяктайын деп калганда кабыл алынды.
Буга чейин Орусияда саясий мүнөздөгү административдик беренелер боюнча жоопкерчиликке тартылган жана өлкөдөн чыгып кеткен жарандардын мүлкүн камакка алууга уруксат берген мыйзам кабыл алынган. Мүлк белгиленген айып пул толук төлөнгөндөн кийин камактан чыгарылат.
Орусия коңшусу Украинага кол салган 2022-жылдын февралынан бери согушту айыптаган, сындаган жарандарын куугунтукка алып келет.
Росавиация Москва аэропортторунун аймагында жарандык учактар үчүн уруксат берилген эң жогорку учуу бийиктигин 8550 метрден 4900 метрге чейин төмөндөттү. Ошондой эле транзиттик учууларга тыюу салынды. Бул тууралуу "Коммерсант" Аэронавигациялык маалымат борборуна таянып жазды.
Чектөөлөр Москва түйүндүк диспетчердик районуна киргизилди. Бул аймакка Шереметьево, Внуково жана Домодедово аэропорттору кирет. "Коммерсанттын" булактарынын маалыматына ылайык, бул чаралар Коргоо министрлигинин демилгеси менен, акыркы убактарда дрондордун чабуулдары көбөйгөнүнө байланыштуу кабыл алынган.
Росавиация бул өзгөртүүлөрдү ырастап, ал 11-июлдан 12-августка чейин күчүндө болорун билдирди.
"Бул чаралар учуулардын коопсуздугун камсыз кылуу максатында кабыл алынды", – деп маалымдады мекеме.
"Коммерсанттын" айрым булактары мындай чектөөлөр согуш аяктаганга чейин сакталып калышы мүмкүндүгүн, Орусиянын башка аймактарына да жайылышы ыктымал экенин айтышкан.
Учуу бийиктигинин төмөндөтүлүшү учактарга жакынкы аэродромдорго тезирээк конууга мүмкүндүк берет. Бирок ошол эле учурда күйүүчү май көп сарпталып, учуу убактысы узарат.
Басылманын булагынын эсептөөсү боюнча, транзиттик багыттарды айланып өтүүгө байланыштуу каттамдардын убактысы кеминде 20-30 мүнөткө узарары күтүлүүдө.
"Коммерсанттын" маектештери уруксат берилген учуу бийиктигинин төмөндөтүлүшү учактардын канаттуулар менен кагылышуу тобокелдигин да жогорулатышы мүмкүн деп эсептешет.
Украин аскерлери 22-июлга караган түнү Орусиядагы эң ири онлайн-соода операторлорунун бири болгон Wildberries компаниясынын логистикалык борборлоруна жана бөлүштүрүү кампаларына сокку урду. Бул тууралуу "Свобода" радиосу жазды.
Бутага Краснодар крайынын Краснодар шаарындагы жана Ставрополь крайынын Невинномысск шаарындагы объектилер алынды. Эки кампада тең өрт чыкты.
Буга чейин, 18-июлда жана 20-июлда да Украинанын Куралдуу күчтөрү Москва облусундагы үч ушундай кампаны жана Волгоград облусунун Котовск шаарындагы бир кампаны бутага алган. Эки жерде өрт чыгып, кампалардын бири толугу менен күйүп кеткен.
Краснодардагы Wildberries кампасында чыккан өрттү өчүрүүгө 105 адам жана 37 техника тартылганын аймактын Ыкчам штабы билдирди.
Орусиялык Telegram каналдардын маалыматына караганда, Краснодар крайындагы дрон чабуулунан беш адам жабыркады.
Ал эми Ставрополь крайында үч киши жаракат алганы кабарланган. Кийинчерээк Ставрополь крайынын губернатору Владимир Владимиров Невинномысск шаарынын четиндеги «кампа комплексине» сокку урулганын ырастап, жабыркагандардын саны беш адамга жеткенин маалымдады.
Орусиянын Wildberries маркетплейси аркылуу кийим-кечек сатып иштеген кыргыз ишкерлери өкмөткө кайрылып, миллиондогон рублдик товарлары дрон чабуулунан кийин өрт чалган кампада калганын билдирип чыккан. Бул тууралуу "Азаттык" кеңири макала даярдаган.
Украинанын президенти Владимир Зеленский Wildberries компаниясынын логистикалык борборлорунда учкучсуз аппараттар үчүн тетиктер сакталганын билдирген.