Орусиянын армиясы 12-августка караган түнү Украинанын бир катар аймагын аткылады.
Соккулардын көбү турак жайларга тийди, курман болгондор, жараат алгандар бар.
Херсон шаардык аскердик администрациясынын башчысы Ярослав Шанько билдиргендей, турак жайларды аткылоо учурунда эки киши каза тапты.
Херсон облустук аскердик администрациясынын башчысы Александр Прокудин дагы эки киши жабыркаганын билдирди.
Запорожьеде орус армиясынын чабуулунан кийин соода борбору өрттөндү. Турак жайга зыян келтирилди. Запорожьеде 1200дөй абонент жарыксыз калды.
Одессада соккулардан он кабаттуу үйдүн бешинчи кабатындагы батирде өрт чыкты. Украинанын Өзгөчө кырдаалдар кызматы өрт өчүрүлгөнүн, бактыга жараша жабыркагандар жок экенин маалымдады.
Полтава облусунда өндүрүш ишканасын да өрт чалды.
Орусия Украинага негизсиз кол салган 2022-жылдын февралынан бери күн сайын сокку уруп келет, андан бери бейкүнөө өлгөн кишилер, жараат алгандар миңдеп саналат. Миңдеген киши үй-жайын таштап кетүүгө аргасыз болду. Миңдеген киши жакындарын жоготуп, миңдеген бала жетим калды. Украинанын шаар-кыштактары, инфраструктурасы талкаланды. Киев өзүнө кол салууга жооп иретинде, Орусиянын мунай заводдорун жана башка армияны каржылаган объектилерине сокку уруп келатат. Украин тарап мунай жайларына чабуулдарын быйыл жаздан тарта күчөтүп, Орусиянын өзүндө эле эмес, андан кара май алган өлкөлөрдө да кризис пайда болду.
Америкалык Center for Strategic and International Studies (CSIS) борборунун жаңы маалыматына ылайык, Орусия Украинага кол салгандан бери эки тараптан тең каза болгон жана жараат алган аскерлердин жалпы саны 2 миллиондон ашты.
Изилдөөчүлөрдүн тыянагында, 2026-жылдын биринчи жарымында орус аскерлеринин жоготуулары беш эсеге өскөн.
Орусиянын Краснодар аймагынан губернатору Вениамин Кондратьев 12-августка караган түнү аймакка жүздөгөн дрондор чабуул койгонун билдирди.
Анын айтымында, Новороссийск шаарында сегиз жаштагы бала чарчап калды. Сегиз адам жараат алды, алардын арасында да бир бала бар.
Кондратьев дрон сыныктары төрт ишканага жана 21 турак үйлөргө түшкөнүн кабарлады.
Новороссийск шаарынын мэри Андрей Кравченко үйдүн чатырына тийген соккунун кесепетинен алты жаштагы бала жараат алганын ырастады.
Темрюк районунун Волна айылында дрон сыныктары жеке үйдүн короосуна түшүп, бир адам жабыркаган.
"Дарыгерлер колдон келгендин баарын жасады, өкүнүчтүүсү, эркек кишини сактап калууга мүмкүн болгон жок", - деп жазды Кондратьев.
Анапада турак үй кыйрап, эки адам жараат алса, Геленжикте үч үй бузулуп, эки адам жабыркаган.
Astra басылмасы Новороссийск шаарындагы чабуулдун кесепетинен Орусиянын Аскер-деңиз флотунун кемелери токтоочу жайдын жанындагы №15 орто мектепке зыян келтирилгенин жазды. Украиналык Exilenova+ мониторинг каналы эки элеваторду жана порттук курулмаларды камтыган Новороссийск дан азыктары комбинатына (НКХП) чабуул коюлганын кабарлады.
"Крымский ветер" каналы NASA FIRMS сервисинин маалыматына таянып, өрт "Шесхарис" мунай терминалынын четинде жана Кара деңиз флотунун кемелери менен суу астындагы кайыктары токтоочу жайынын аймагында катталганын белгилейт.
Орусиянын Коргоо министрлиги Белгород, Брянск, Калуга, Курск, Липецк, Орёл облустарынын, Краснодар крайынын, аннексияланган Крымдын аймактарында жана Кара деңиз акваториясында Украинанын 502 дрону атып түшүрүлгөнүн кабарлады.
Украина Орусия «парламенттик шайлоо өткөрүмүш болгондон кийин» эки этап менен мобилизация жарыялоого даярданып жатат деп эсептейт. Бул тууралуу 11-августта украин президенти Владимир Зеленский кечки видео кайрылуусунда Украинанын Коргоо министрлигине караштуу Башкы чалгындоо башкармалыгынын жетекчиси Олег Иващенконун баяндамасына таянып билдирди.
Зеленскийдин айтымында, украин чалгындоосу аныктаган мындай маалыматты «Орусиянын ички документтери» да ырастайт. Бирок ал кайсы документтер жөнүндө сөз болуп жатканын тактаган жок.
«Путиндин планы анчейин татаал эмес: ал орусиялыктар согушту колдойт деген көрүнүштү түзүүнү каалайт. Анткени азыр шайлоого катышууга уруксат берилген бардык партиялар тигил же бул деңгээлде тынчтыкка каршы турушат», — деди украин президенти.
Анын сөзүнө караганда, андан соң «шайлоо» өткөрүлгөндөн кийин жыл аягына чейин дагы бир нече жүз миң орусиялыкты тез арада мобилизациялоо, ал эми кийинки жылы дагы ушунча адамды чакыруу пландалууда.
Орусиянын Мамлекеттик Думасына шайлоо 18-20-сентябрга белгиленген.
Зеленский Орусияда жакын арада жаңы мобилизация болушу мүмкүн экенин биринчи жолу айтып жаткан жок. 25-июлда ал украин чалгын кызматынын маалыматына таянып Орусия мобилизация үчүн «шарт үзүп жатат» деп билдирген.
Украин президентинин айтымында, учурда орус армиясынын фронттогу жоготуулары келишимдик негизде кызмат өтөөгө келген жаңы аскерлердин санынан жогору болуп жатат.
Ошол эле учурда Зеленский Түндүк Корея Орусияга кошумча аскердик контингент жөнөтүүгө даярданып жатканын да айткан. Ал бул билдирүүсүн 10-августта дагы бир жолу кайталады.
Учкучсуз учактар Орусиянын Воронеж облусундагы Wildberries логистикалык борборуна жана Оренбург облусундагы "Орскнефтеоргсинтез" мунайды кайра иштетүүчү заводуна чабуул койду.
Воронеж облусунун губернатору Александр Гусев абадан коргонуу күчтөрү түндө Воронеж шаарынын жана аймактын беш районунун үстүнөн 15 учкучсуз учакты атып түшүргөнүн билдирди. Новоусман районунда 49 жаштагы киши каза таап, дагы эки адам жараат алды. Жабыркагандардын бири чабуул учурунда көчөдө, экинчиси ири логистикалык борбордун аянтында болгон.
Губернатордун айтымында, "дрондун кулашынын кесепетинен" ири компаниянын эки кампасында өрт тутанган. Бир объектиде 16 миң чарчы метр аянтты каптаган өрт өчүрүлдү, экинчисинде 20 миң чарчы метр аянттагы өрттү өчүрүү иштери жүрүүдө.
Окуя болгон жерде ыкчам кызматтар иштеп жатат. Мындан тышкары, үч жүк ташуучу жана бир жеңил автоунаа жабыркаган.
Оренбург облусунда украиналык Exilenova+ жана Supernova+ мониторинг каналдарынын маалыматында, Орск шаарындагы "Орскнефтеоргсинтез" мунайды кайра иштетүүчү заводуна чабуул коюлду (шаар Орусия менен Украинанын чек арасынан 1400 чакырым ыраак жайгашкан). Кубаттуулугу жылына 1,6 миллион тоннаны түзгөн гидрокрекинг комплекси жабыркаганы болжолдонууда.
Supernova+ каналы жазгандай, Орск шаарындагы "Механикалык завод" да соккуга кабылган. Желеде жарыяланган видеолордон өрттүн бир канча очогун көрүүгө болот.
Оренбург облусунун губернатору Евгений Солнцев жана Орск шаарынын мэри Артем Воробьев 11-август күнү эртең менен дрон чабуулунун коркунучу бар экенин жарыялады. Оренбург жана Орск шаарларында "Ковер" планы ишке киргизилди. Кийинчерээк Солнцев аймактын үстүнөн сегиз учкучсуз учак атып түшүрүлгөнүн жазды.
"Дрон сыныктарынын чачырашынын кесепетинен өнөр жай ишканаларынын биринде өрт чыкты. Алдын ала маалыматтар боюнча, жабыркагандар жок", - деп билдирди ал.
Украинанын Куралдуу күчтөрүнүн башкы штабы "Орскнефтеоргсинтезге" сокку урулганын ырастады.
"Орскнефтеоргсинтез" ААК - Орусиядагы мунайды кайра иштетүүчү ири заводдордун бири. Ишкана бензин, дизел, авиациялык керосин, мазут жана майлоочу майларды чыгарат. Мунайды кайра иштетүү боюнча кубаттуулугу жылына 6,6 миллион тоннаны түзөт.
Орусиянын Коргоо министрлиги Белгород, Брянск, Владимир, Воронеж, Калуга, Курск, Липецк, Оренбург, Орёл, Ростов, Рязань, Тамбов, Тула жана Москва облусунда жана аннексияланган Крымда Украинанын 396 учкучсуз учагы атып түшүрүлгөнүн кабарлады.