1-сентябрга караган түнү орус аскерлери Украинага жасаган жапырт чабуулдан ондогон жайкын тургун каза болду. Соккулар темир жол инфраструктурасына, турак жайларга, Борисполдогу ишканага жана кеме комплексине тийген.
"Укрзалызныця" мекемесинин жетекчиси Александр Перцовскийдин маалыматына караганда, баллистикалык ракеталар менен темир жол депосуна жана башка темир жол объектилерине сокку урулду. Натыйжада өндүрүш цехи толугу менен талкаланып, жети адам каза болду. Алардын алтоо темир жол мекемесинин кызматкерлери болгон. Дагы бир темир жолчу ооруканага жаткырылды.
Украинанын Өзгөчө кырдаалдар боюнча мамлекеттик кызматы Киевге баллистикалык жана канаттуу ракеталар, ошондой эле реактивдүү дрондор менен жасалган чабуулдан сегиз киши каза болуп, жети адам жараат алганын билдирди. Жабыркагандардын арасында үч бала бар.
Киев облусунун бийлиги Бориспол шаарында да бир нече имарат зыян тартканын кабарлады. Беш кабаттуу турак үйгө сокку урулуп, сегиз адам, анын ичинде эки бала жараат алды. Шаардагы ишканалардын бирине жасалган дагы бир чабуулдан эки киши каза болуп, үчөө жабыркады.
Киев облустук аскердик администрациясынын башчысы Тимур Ткаченконун айтымында, Борисполдогу чабуулдан жалпысынан төрт адам набыт болду.
Украинанын Мамлекеттик чек ара кызматы билдиргендей, Румыния менен чектеш аймактагы өткөрмө бекет да чабуулга кабылды. Одесса облусундагы эл аралык «Орловка» паром комплекси учкучсуз аппараттардын бутасына айланды. Имаратка жана анын айланасы аткыланып, өрт чыкты.
Ушундан улам бекет аркылуу жарандар менен транспорт каражаттарын өткөрүү убактылуу токтотулду.
Чернигов облусундагы Новгород-Северск шаарында жергиликтүү ишканалардын бири кеминде алты дрон соккусуна кабылганын райондук аскердик администрациянын башчысы Александр Селиверстов билдирди.
Харьков облусунда орус аскерлеринин соккусунан маанилүү инфраструктура объектиси жабыркады.
Днепропетровск облусунун аскердик администрациясынын башчысы Александр Ганжанын маалыматына ылайык, 31-августтун кечинен бери Орусия Никополь, Павлоград жана Синельников райондоруна 20дан ашык дрон менен чабуул жасады. Анын кесепетинен супермаркет, дүкөндөр, көп кабаттуу жана жеке турак үйлөр, ошондой эле автоунаалар жабыркап, Павлоград районунда өрт чыккан.
Ал эми Орусиянын Коргоо министрлиги Киевге, Киев жана Одесса облустарына, ошондой эле Одесса менен Кара деңиз портторуна жапырт сокку урулганын билдирди. Министрлик аскердик-өнөр жай жана отун-энергетика комплексине тиешелүү объектилер бутага алынганын маалымдады.
Орусия коңшусу Украинага каршы согуш ачканына беш жылга жакындады. Украинанын жарандык инфраструктурасы, жайкын тургундары бутага алынып жатканын Москва мойнуна албайт.
30-август күнү Киев дагы бир жолу учкучсуз учуучу аппараттардын чабуулуна кабылды. Бул тууралуу шаар мэри Владимир Кличко билдирди.
Анын айтымында, Голосеев районунда дрондун сыныктары түшүп, кафенин фасадына зыян келтирген. Жабыркагандар жок. Ал эми Шевченков районунда ээн имараттардын биринен өрт чыккан. Ушул эле күнү эртең менен Голосеев районундагы дагы бир имаратта дрондун сыныктары кулап, өрт чыкканы кабарланган.
Киев мэри 29-августтагы чабуулдун кесепеттери боюнча такталган маалыматтарды да жарыялады. Ага ылайык, эки жаштагы кыз каза болуп, Киевдин 12 тургуну жаракат алган. Жаракат алгандардын экөө ооруканага жаткырылган, алардын арасында үч жаштагы бала да бар.
Белгородго 30-августта кечке жуук Украина ракета менен сокку урганы белгилүү болду.
Телеграм-каналдардын билдиришинче, сокку Белгород ЖЭБ, электр көмөк чордондоруна жана Ozon маркетплейсинин кампасы жайгашкан "Эстейт Логистик" терминалына тийген.
"Пепел. Белгород" басылмасы ракета соккуларынан кийин кампада да, ЖЭБде да өрт чыкканын кабарлады.
Белгород облусунун губернаторунун милдетин аткаруучу Александр Шуваев жекшембинин кечиндеги маалыматка таянып, бир киши жана 16 жаштагы өспүрүм каза болгонун билдирди.
Кеминде 12 адам жараат алган, алардын арасында да жашы жете электер дагы бар. Абадан коргонуу системасы Белгороддун үстүнөн дрон атып түшүргөнү кабарланууда. Андан сырткары бир дрон облустук социалдык коргоо башкармалыгынын имаратына тийип, зыян келтирген.
Белгород телемунарасына жасалган чабуулдан улам шаардагы абоненттерде санариптик телевидение өчкөн. Ozon компаниясынан логистикалык борбор жана хаб чабуулга кабылганын билдиришти.
Кызматкерлер эвакуацияланып, жабыркагандар бар. Ozon "логистикалык чынжырчалар кайрадан жөнгө салынмайынча" Белгороддо жана облуста буюртмаларды кабыл алууну жана жеткирүүнү убактылуу токтотту.
Украина Куралдуу күчтөрүнүн Башкы штабынын 31-августтун таңкы маалыматында, өткөн суткаларда Орусиянын аскерлери болжол менен 1600 адамынан ажыраган.
Штабдын баалоосунда, Украинада согуш башталгандан бери Орусиянын армиясы жалпысынан 1 488 200дөй аскерин жоготту.
Мындан тышкары 12 316 танк (+5 өткөн суткада), 25 255 чопкутталган машина (+7,) 48 883 артиллериялык система (+50)
2 079 реактивдүү системасы (+7), 1 597 абадан коргонуу каражаты (+3), 440 учак, 354 тик учак, 2 442 жердеги роботтоштурулган комплекс (+7), 490 402 оперативдүү-тактикалык деңгээлдеги учкучсуз учак (+2 055), 5 060 канаттуу ракета, 35 кеме жана катер
2 суу астында сүзүүчү кеме, 141 920 автоунаа жана цистерна (+467)
4 621 бирдик атайын техника (+7).
Орусия азырынча жоготууларын расмий түрдө ачыктай элек.
Москва акыркы жолу каза болгондордун санын 2022-жылдын сентябрь айында атап, ал кезде 5 937 киши каза болгонун билдирген.
Буга чейин Би-Би-Синин орус кызматы "Медиазона" басылмасы менен биргеликте ушул жылдын июль айына карата Орусиянын каза болгон 235 миңге чукул аскер кызматкеринин аты-жөнүн жана башка маалыматтарын тактаган. Изилдөөчүлөрдүн айтымында, чыныгы сан мындан кыйла көп болушу мүмкүн. НАТОнун баалоосунда жарым миллионго жакын адам каза болгон.
Киев өзү дагы узак убакыт бою жоготууларын ачык айтпай, маалыматтар согуш аяктагандан кийин жарыяланарын билдирип келген. Украина президенти Владимир Зеленский 30-июлда Fox News телеканалына курган маегинде Украина 50 миң аскерин жоготконун, дагы 400 миңге чукулу жарадар болгонун, дайынсыз жоголгондордун саны көп экенин айткан.
Америкалык Стратегиялык жана эл аралык изилдөөлөр борборунун 1-июлдагы маалыматына ылайык, 2022-жылдын февралыннан бери Орусия менен Украинанын каза болгон жана жарадар болгон аскерлеринин жалпы жоготуусу 2 миллиондон ашты.