Украиналык мониторинг жүргүзүүчү Exilenova+ жана Supernova+ Telegram-каналдары Орусиянын Рязан облусундагы "Яндекс ДЦ" борборуна жана Башкырстандагы "Газпром нефтехим Салават" мунай иштетүүчү заводуна чабуул болгонун билдиришти.
Astra басылмасынын маалыматына караганда, өрт "Саста" станок куруучу заводунун аймагында чыккан. Бул аймакта Яндекстин дата-борбору да жайгашкан. Яндекс компаниясы Yandex Cloud платформа аймактарынын биринде электр энергиясы үзгүлтүккө учураганын жана анын кесепеттерин жоюу иштери жүрүп жатканын билдирди.
Кийинчерээк компания Сасоводогу дата-борбордо "инфратүзүмгө таасир эткен окуя" болгонун ырастаган.
"Учурда кырдаал көзөмөлдө. Жабыркагандар жок. Команда окуянын кесепеттерин жоюу жана жабыркаган сервистердин ишин калыбына келтирүү боюнча иштеп жатат", - деп билдирген компания РБК басылмасына.
Чабуулдан кийин Яндекстин айрым сервистеринин иши үзгүлтүккө учураган. "Дождь" телеканалы Рунеттеги айрым башка сайттар, анын ичинде автопостинг үчүн Postmypost платформасы жана "Комсомольская правда" басылмасынын аймактык версиясы да жеткиликсиз болуп калганын байкаган.
Ал эми Башкырстандагы өрттүн видеолорун изилдеген Astra өрт "Газпром нефтехим Салават" мунай иштетүүчү заводунун аймагында чыккан болушу мүмкүн деген жыйынтыкка келген. Бул Орусиядагы ири мунай иштетүүчү жана мунай-химиялык комплекстердин бири. Буга чейин ишкана украиналык чабуулдарга бир нече жолу кабылып, анын айынан ишин убактылуу токтоткон. Ишкана Украина менен чек арадан болжол менен 1400 чакырым алыстыкта жайгашкан.
Exilenova+ жергиликтүү тургундарга шилтеме жасап, Стерлитамак шаарында да жардыруулардын үнү угулганын билдирди.
Орусиянын Коргоо министрлиги өлкөнүн Белгород, Брянск, Волгоград, Воронеж, Курск, Липецк, Орёл, Оренбург, Пенза, Ростов, Рязан, Самара, Саратов, Смоленск, Тамбов, Тула жана Ульянов облустарынын, Москва аймагынын, Башкырстандын, аннексияланган Крымдын, Татарстандын аймагында жана Кара деңиздин үстүндө жалпысынан 399 украиналык дрон атып түшүрүлгөнүн маалымдады.
Украинанын Өзгөчө кырдаалдар боюнча мамлекеттик кызматынын маалыматына ылайык, Орусиянын Чернигов облусундагы Прилуки шаарына соккусунун кесепетинен каза болгондор 20га жетти. Алардын бешөө балдар.
ӨКМдин маалыматы боюнча, 55 адам жаракат алган, алардын арасында жети бала бар.
Беш кабаттуу турак үйдүн урандылары алдында издөө-куткаруу иштери уланууда.
7-октябрга караган түнү Орусия Украина аймагына баллистикалык жана канаттуу ракеталар, ошондой эле учкучсуз учактар менен кайрадан жапырт чабуул жасады. Соккулар Киев, Днепр, Запорожье, Кременчуг жана Прилуки шаарларына тийип, бир нече адамдын өмүрүн алды.
Киев шаардык аскердик администрациясынын маалыматына караганда, чабуулдан борбор калаанын Оболон, Шевченко жана Подол райондорундагы имараттар жабыркады. Оболон жана Шевченко райондорунда турак эмес объектилер зыян тартса, Подол районунда кампалар бузулган.
Кийинчерээк Дарница районунда ракеталардын сыныктары ачык аянтка жана гараж кооперативинин аймагына түшкөнү кабарланды. Соккунун кесепетинен эки адам каза болду.
Днепр шаарында сокку өнөр жай ишканасына тийген. Днепропетров облусунун аскердик администрациясынын башчысы Александр Ганжанын айтымында, жабыркагандар тууралуу маалымат такталууда. Ошол эле учурда аймакта коркунуч сакталып жатканын билдирди.
Запорожьеде транспорттук инфраструктура объектиси бутага алынды. Облустук аскердик администрациянын жетекчиси Михаил Семикин айрым жол тилкелеринде кыймыл убактылуу чектелиши мүмкүн экенин эскертти.
Полтава облусундагы Кременчуг шаарында ракета турак жай жайгашкан аймакка түшкөн. Натыйжада көп кабаттуу үйлөр жабыркап, эки адам каза болду. Дагы жети киши жаракат алды. Мындан сырткары Кременчуг районундагы ишканалардын бири дагы соккуга дуушар болгон.
Эртең менен Орусиянын аскерлери Чернигов облусундагы Прилуки шаарына да ракеталык чабуул жасаган. Облустук администрациянын башчысы Вячеслав Чаустун маалыматына караганда, ракета көп кабаттуу турак жайга тийген. Украинанын Өзгөчө кырдаалдар кызматы баштапкы маалымат боюнча төрт адам каза болуп, дагы 20 адам жаракат алганын билдирди. Жабыркагандардын арасында үч бала бар.
Жапырт чабуулдун фонунда Польша аба мейкиндигин көзөмөлдөөнү күчөтүп, аскердик авиациясын асманга көтөрдү. Өлкөнүн куралдуу күчтөрүнүн ыкчам командачылыгы абадан коргонуу жана радиолокациялык көзөмөл каражаттары да жогорку даярдыкка келтирилгенин билдирди. Варшава бул чаралар Польшага чектеш аймактардагы аба мейкиндигинин коопсуздугун камсыздоо максатында көрүлгөнүн кабарлады.
Кара деңизде Болгариянын жээгине жакын жерде эки коммерциялык кеме учкучсуз учуучу аппараттардын чабуулуна кабылып, алардын бири чөгүп кетти. Бул тууралуу болгариялык ЖМКлар, BGNEWS жана Nova кабарлашты.
Маалыматтарда дрондор кайсы мамлекетке таандык экени айтылган эмес.
Соккуга Того жана Палау желектери астында жүргөн кемелер кабылган. Того желеги астындагы “ALFA WATAN” кемеси чөгүп кеткен. Экипаждын тагдыры тууралуу маалымат жок, куткаруу операциясы уланууда. Кемеде канча адам болгону белгисиз. Ал эми “ABLE” аттуу экинчи кемеден 18 деңизчи куткарылганы кабарланды, алардын арасында жаракат алгандар бар. Кол салуу маалында эки кеме тең Болгариянын өзгөчө экономикалык аймагында болгон, бирок анын аймагында эмес.
ЖМКлар белгилегендей, бул - Болгариянын жээгине жакын аралыкта кемелерге дрондор менен жасалган биринчи чабуул. Окуяга байланыштуу Болгариянын премьер-министри Румен Радев мамлекеттик мекемелердин өкүлдөрү менен шашылыш жыйын өткөрдү.
Азырынча Орусия да, Украина да соккулар боюнча комментарий бере элек. Marine Traffic кызматынын маалыматына ылайык, чөгүп кеткен кеме Египеттен Румынияга бара жаткан, ал эми “ABLE” кемеси Румыниядан Стамбулду көздөй багыт алган.
Буга чейин Кара деңизде Румыниянын жээгине жакын жерде дрондун чабуулунан кийин Украинанын данын Италияга ташып бараткан түркиялык “Royad Mammadov” кемеси чөгүп кеткен.
HotNews басылмасы Румыниянын Ички иштер министрлигине шилтеме кылып жазгандай, эки адам каза болуп, экипаждын 11 мүчөсү куткарылган. Украинанын президенти Владимир Зеленский кемеге Орусиянын эки дрону сокку урганын билдирген. Анын айтымында, кемеде Азербайжан менен Индиянын жарандары болгон.
Акыркы кезде Орусия Украинанын портторуна, Кара деңизде Украинага бара жаткан же андан чыгып келе жаткан кемелерге соккуларды күчөттү. Москва муну украин тараптын кемелерге чабуулдарына жооп катары түшүндүрүп келет. Орусиянын президенти Владимир Путин мындай соккуларды токтотуу боюнча кандайдыр бир келишим түзүү мүмкүнчүлүгүн четке каккан.
Мындан улам Орусия менен Украинадан дүйнөлүк рынокко дан ташуу азайып, эң жакыр өлкөлөрдө ачарчылык күчөшү мүмкүн деген кооптонуулар айтылууда.