5-мартта Орусияда Украинага каршы согушка каршы чыккан активисттердин үйүнө укук коргоо органдары келип тинтүү жүргүзүп, кармап кеткени кабарланды.
Медиазонанын кабарлашынча, Петербургда жана Владимирде ондон ашуун активист, муниципалдык депутаттар, акцияга чыккандарды сотто коргогон укук коргоочулардын үйү тинтүүгө алынган.
Орус аскерлери көзөмөлдөп жаткан Чернобыл АЭСинин кызматкерлери станцияда он суткадан бери отуруп.
"Громадське" маалымат агенттиги Славутич шаарынын мэри Юрий Фомичевге шилтеме кылып, орус аскерлери көзөмөлдөп турган өзөктүк станциянын кызматкерлери он суткадан бери эки топко бөлүнүп иштеп жатканын кабарлады.
"Алардын тамак-ашы, дары-дармеги чектелүү. Оор шартта иштеп жатышат. Алардын жакындары кабар ала албай жатат", - деди Фомичев.
Мариуполдун жай тургундарын эвакуациялоо башталды
Украинанын Коргоо министрлиги 5-мартка карата орус армиясынын жоготуулары 10 миңден ашык жоокерди түзөрүн маалымдады. Мунун ичинде өлгөндөр, колго түшкөндөр, жарадарлар кошо саналып жатат.
Мекеме жаңы маалыматында, Орусиянын 39 учагы, 40 тик учагы, 269 танкы, 945 чопкутталган транспорту, 409 автоунаасы, 105 артиллериялык системасы, 74 замбиреги (пушка), бир “Бук” зениттик-ракеталык комплекси, 50 ракета атуучу системасы, 60 цистернасы, үч учуучу аппараты, эки кемеси, 19 абадан коргонуу системасы жок кылынганын кабарлады.
Орусиянын Коргоо министрлиги болсо алардын куралдуу күчтөрү он күндүк чабуулдарынын жүрүшүндө Украинанын 2037 аскердик объектисин иштен чыгарганын билдирди. Министрликтин расмий өкүлү Игорь Конашенков 5-мартта кабарлагандай, мындан сырткары Украинанын 708 танкы жана башка чопкутталган аскердик техникасы, 82 учагы, 74 ракета атуучу системасы, 261 талаа артиллериясы жана миномёттору жок кылынган.
Орусиянын Коргоо министрлиги Украинанын аймагындагы согуштук аракеттерде 498 жоокери каза болгонун, 1597и жаракат алганын 2-мартта моюнга алган. Мекеме андан бери каза болгон аскерлеринин саны тууралуу маалымат бере элек.