Виктория Нуланд Москва өзөктүк курал колдонушу мүмкүн экенин танбайт
АКШнын мамкатчысынын орун басары Виктория Нуланд Украинага согуштун жүрүшүндө Владимир Путин "оор кесепеттерге алып келүүчү куралды, анын ичинде өзөктүк куралды колдонууга уруксат бериши ыктымал" экенин билдирди. Нуланд бул тууралуу украиналык "Европа чындыгы" басылмасына берген интервьюсунда айтты.
Анын айтымында АКШ жана анын өнөктөштөрү Кремлге өзөктүк куралды колдонуунун кесепети Путин жана Орусияга үчүн оор болорун эскертип жатат. Нуланд окуя кандай жол менен өнүкпөсүн Батыштагы өнөктөштөр "Украинаны жалгыз калтырбай турганына" токтолду.
Америкалык дипломат өзөктүк курал колдонуу "кырдаалды такыр башка деңгээлге" өзгөртүшү мүмкүн экенин белгиледи.
Өзбек дипломаттары Киевге кайтты
Өзбекстандын Украинадагы элчилиги 22-апрелден баштап Киевдеги ишин толук жандандырды. Бул тууралуу расмий Ташкент маалымат таратты.
Украинада каза болгон Исломжан Камиловдун сөөгү туугандарына бериле элек
Өзгөндө чоңоюп, кийин орус жарандыгын алган Исломжан Камиловдун сөөгү туугандарына бериле элек. Ал Украинадагы согушта каза болгонун, сөөгү Орусиянын Канттагы авиабазасына алып келингенин агасы Акбар Хабибуллаев 23-апрелде "Азаттыкка" билдирди.
“Бүгүн Өзгөнгө тик учак менен жеткиребиз деп айтышкан. Күтүп жатабыз. Туугандарыбызды жаназага чакырып койгонбуз”, - деди ал.
Украинада орус аскерлери басып алган Виноградное айылындагы көрүстөндүн жанында адамдар жапырт көмүлгөн дагы бир болжолдуу мүрзөнүн спутниктен тартылган сүрөтү жарыяланды.
Айыл Мариуполдон беш чакырымдай алыс экенин "Азаттыктын" украин кызматынын "Схемалар" долбоору маалымдады.