Президент Садыр Жапаров Венгриянын тышкы экономикалык байланыштар жана тышкы иштер министри Петер Сийяртону "Достук" ордени менен сыйлады. Мамлекет башчысы аны Бишкекте 3-майда кабыл алганын президенттик администрациянын басма сөз кызматы билдирди.
Жапаров венгер министринин эки тараптуу мамилени чыңдоого кошкон жеке салымын белгиледи:
"Биз буга Украинадан жүздөн ашуун жарандарыбызды эвакуациялоо учурунда дагы бир жолу ынандык", - деди президент.
Орусия Украинага басып киргенден кийин ал жактагы кыргыз жарандарынын көбү Венгрия аркылуу мекенине кайткан.
Расмий маалыматка ылайык, быйыл Венгриянын премьер-министри Виктор Орбандын Кыргызстанга мамлекеттик сапары күтүлүүдө.
Бишкекке 3-майда келген Петер Сийярто венгер экономикасы Кыргызстан менен кызматташуудан көп пайда көргөнүн белгилеген.
2021-жылдын ноябрында Бишкекте Кыргыз-Венгер өнүктүрүү фондунун расмий ачылышы болгон.
Андан бир ай мурун президент Садыр Жапаров Кыргызстандын тышкы саясаты тууралуу баяндаганда Европадан Венгрия менен мамиле бекемделип жатканын айткан. (SE)
