Сербиядагы грек-рим күрөшү боюнча Дүйнөлүк чемпионатта алтын медал алган кыргызстандын спортчулар Акжол Махмудов жана Жоламан Шаршенбеков, ошондой эле коло байге уткан Амантур Исмаилов Кыргызстанга кайтып келди.
Алар отурган учак 15-сентябрдын таңында "Манас" эл аралык аба майданына конду. Чемпиондорду аэропорттон жакындары, күйөрмандары жана мамлекеттик кызматкерлер тосуп алышты.
Күрөш боюнча Дүйнө чемпионаты 18-сентябрга чейин уланат.
Алдыда эркин күрөштөн таймаштар бар.
Кыз-келиндер күрөшү боюнча беттештерде Дүйнөнүн эки жолку чемпиону Айсулуу Тыныбекова коло байге үчүн таймашта украиналык Илона Пркопевнюкка бир упайдын айырмасында жеңилди (7:8). Ал эми Дүйнө чемпиону Мээрим Жуманазарова менен Дүйнө чемпионатынын коло байгесинин ээси Айпери Медет кызы алгачкы беттештеринде атаандаштарына утулуп, мелдештен четтеп калды.
