Кыргызстандын Украинадагы элчиси Идрис Кадыркулов элчилик Киевде штаттык режимде иштеп жатканын билдирди.
Ал Фейсбук баракчасында жарыялаган билдирүүдө Украинада кырдаал курч экенин, ракеталык-бомбалык соккулар өлкөнүн бүт аймактарында уланышы мүмкүн деген кооптонуу бардыгын белгилеген. Элчи бул өлкөдөгү кыргызстандыктарды коопсуз жерде болууга үндөгөн.
"Азыркы учурда кырдаал курч бойдон калууда, ракеталык-бомбалык соккулар Украинанын бүт аймактарында уланышы мүмкүн деген кооптонуу бар. Биздин элчилик, башка өлкөлөрдүн миссиялары менен катар Киев шаарында толугу менен штаттык түрдө кызматын аткарып жатат. Биздин жарандар менен күнү-түнү байланыштабыз жана консулдук тейлөө үзгүлтүксүз аткарылууда. Украинадагы мекендештерибизге дагы бир ирет кайрылам - өмүрүңөрдү тобокелге салбагыла, жеке коопсуздук талаптарды аткарып, коопсуз жерде калууну улантыңыздар", - деп жазган Кадыркулов.
Орусиянын Куралдуу күчтөрү Украинанын шаарларын жапырт аткылоосун 11-октябрда да улантты. Бул күнү дээрлик бардык облустарда аба айгайы (воздушная тревога) жарыяланды.
Киев жана Одесса облусундагы айылдар, Запорожье, Львов, Винница, Ивано-Франковск, Кривой Рог, Николаев жана башка шаарларга ракета, дрон жана артиллерия менен сокку жасалды. Ондогон имараттар талкаланды, бир нече адам өлдү. Жаракат алгандар да арбын.
Украинанын Өзгөчө кырдаалдар боюнча кызматы 11-октябрда кабарлагандай, дүйшөмбү күнкү жапырт соккунун курмандыктары 19 кишиге жетти. 105 киши жарадар болду. Учурда 300дөй айылда дале электр энергиясы берилбей турат, 3500дөй конушта ал калыбына келтирилген.(КЕ)
