8-ноябрда Түркиянын ички иштер министри Сулейман Сойлу "Ата-Бейит" мемориалдык комплексине барып, 1937-38-жылдардагы репрессия курмандыктарынын сөөгү көмүлгөн жерге, Чыңгыз Айтматовдун мүрзөсүнө жана 2010-жылдагы Апрель элдик революциясынын баатырларынын мемориалына гүл койду.
Иш-чарага ички иштер министри Улан Ниязбеков баштаган ИИМдин кызматкерлери катышты.
"Тарых жана ата-бабаларды эскерүү күнүнө" карата Бишкекте акыркы 30 жылда саясий куугунтукка кабылгандарга жана 1937-38-жылдардагы репрессиянын курмандыктарына байланыштуу жыйын өтүп, анда азыркы бийлик мурдагы президенттер кетирген каталардан сабак албай жатканы айтылды.
23-24-октябрда Ички иштер министрлиги жыйырмадан ашуун активисттерди, саясатчы, блогерлерди камакка алган. Эл аралык жана жергиликтүү укук коргоочулар бул жапырт камоолорду "саясий куугунтук" катары сыпаттап, аларды камактан чыгарууну талап кылууда.