Беларус президенти Александр Лукашенко президент Садыр Жапаровду өлкөлөр ортосундагы дипломатиялык мамилелердин 30 жылдыгы менен куттуктады. Бул маалымат президенттин расмий сайтына 21-январда чыкты.
"Достуктун жана сый-урматтын салттарына таянуу менен акыркы он жылдыкта биздин мамлекеттер татыктуу биргелешкен жолду басып өтүштү. Минск менен Бишкектин өз ара аракеттенүүсү терең жана ар тараптуу мүнөзгө ээ болду. Соода-экономикалык жана гуманитардык кызматташтык активдүү өнүгүп жатат, интеграциялык бирикмелердин алкагында конструктивдүү диалог түзүлдү. Биргелешкен күч-аракеттер менен биздин өнөктөштүгүбүздүн бекем пайдубалы эки өлкөнүн жана элдин кызыкчылыгында мындан ары да чыңдалат деген ишенимди билдирем", — деп айтылат куттуктоодо.
Кыргызстан менен Беларус бир катар эл аралык жана аймактык уюмдарга тең укуктуу мүчө. Эки өлкөнүн алакасы 2010-жылы апрель окуясынан кийин солгундай түшкөн.
Учурда сыртынан соттолгон мурдагы президент Курманбек Бакиев Минск шаарында жашайт. 2019-жылы Кыргызстандын Тышкы иштер министрлиги Лукашенко Бакиев менен жолугушканына, аны менен расмий ачык байланышып жатканына нааразылык билдирген.
17-январда Курманбек Бакиевдин жубайы Назгүл Төлөмүшова каза болуп, сөөгү Кыргызстанга алып келинген. Башкы прокуратура мурдагы президент Курманбек Бакиев Кыргызстанга келсе ага чыккан сот өкүмдөрүнүн негизинде чара көрүлө турганын жана Мамлекеттик жаза аткаруу кызматы аны камакка алууга милдеттүү экенин билдирген. (BCh)
