Кыргызгидромет борбору билдиргендей, 10-11-февралдагы жаан-чачынга байланыштуу тоолуу райондордо, Төө-Ашуу, Ала-Бел, Өтмөк жана Чапчыма ашууларында, Чычкан капчыгайында, Мырза-Аке-Кара-Кулжа-Алайкуу автоунаа жолунун 70-107 чакырымдарында, Красная-Горка-Акташ автоунаа жолунун 0-2 чакырымдарында кар көчкү түшүп, күрткү пайда болот.
Жолдор тайгак болуп муз тоңот. Автоунаалардын ортосундагы 500 метр аралык кыймыл чектелиши зарыл.
10-февралда түнкүсүн Жалал-Абад облусунун көпчүлүк аймактарында, Чүй, Ош, Баткен, Ысык-Көл, Нарын облустарынын айрым жерлеринде кар жаайт.
Күндүз Нарын облусунун айрым жерлеринде, Жалал-Абад облусунун тоо этектеринде жана тоолуу райондорунда, Чүй, Ысык-Көл облустарынын тоолуу райондорунда кар жаайт. Чүй, Ош, Жалал-Абад, Баткен облустарынын айрым жерлеринде туман түшүшү мүмкүн.
Жолдор тоңголок, тайгак болот. Батыштан соккон шамалдын ылдамдыгы секундасына 4-9 метрден, Ысык-Көл акваториясында 15-20 метрге чейин жетет.
Абанын температурасы:
Чүй өрөөнүндө түнкүсүн -8…-13, күндүз 0…-5,
Талас жергесинде түнкүсүн -10…-15, күндүз 0…-5,
Баткен, Ош, Жалал-Абад аймактарында түнкүсүн -2…-7, күндүз 0…5,
Ысык-Көл дубанында түнкүсүн -7…-12, күндүз -2…+3,
Нарын облусунда түнкүсүн -13…-18, күндүз -5…-10,
Бийик тоолуу аймактарда түнкүсүн -23…-28, күндүз -8…-13 градус болот.
Бишкек шаарында түнкүсүн кар жаайт. Абанын түнкү төмөнкү температурасы -10…-12°, күндүзгү жогорку температурасы -3…-5° болот. (TAb)
