Линктер

ЧУКУЛ КАБАР!
23-Апрель, 2024-жыл, шейшемби, Бишкек убактысы 11:15

БУУ: Украинадагы согушта сегиз миңден ашуун карапайым тургун набыт болду


Херсондо тартылган сүрөт.
Херсондо тартылган сүрөт.

Бириккен Улуттар Уюмунун Адам укуктары боюнча Жогорку комиссарлыгы Орусиянын Украинадагы согушу башталгандан бери сегиз миңден ашуун карапайым адам набыт кеткенин билдирди.

Жаңы баяндамага ылайык, былтыр 24-февралдан быйыл 15-февралга чейинки аралыкта каза болгону аныкталган 8006 кишинин 487си балдар. Жараат алган 13 287 кишинин 1000ге жакынын балдар түзөт.

Өлгөндөрдүн, жарадарлардын эң көбү Донецк жана Луганск облустарында: бул аймактарда бир жылда 4295 адам каза болуп, 7327си жараат алды.

Карапайым калктын көбү ракеталык соккулардын курмандыгы болгон. Баяндаманын авторлору согуш учурунда маалыматтарды тактоонун кыйынчылыгын эске алганда, каза болгондордун чыныгы эсеби мындан көп болушу мүмкүндүгүн белгилешет.

Буга чейин Украинанын Улуттук полициясынын Башкы тергөө башкармалыгы 16 миңден ашуун украиналык согушта өлгөнүн билдирген.

Андан тышкары, Киев майданда 13 миңдей жоокери курман болгонун былтыр жыл соңунда билдирген. Орусиянын Коргоо министрлиги акыркы жолу 21-сентябрда согушта 6 миңдей аскерин жоготконун маалымдаган.

Би-Би-Си жана Mediazona басылмасынын журналисттери улантып жаткан иликтөөдө согушта орус армиясынын катарында набыт болгон 14 709 кишинин өлүмүн тастыктаганын 17-февралда жарыялаган.

Пентагон орус армиясынын жоготуулары өлгөндөрдү жана жараат алгандарды кошкондо 100 миңден көп деп эсептеген.

Орусия Украинага 2022-жылдын 24-февралында басып кирген.

Facebook шеринеси

XS
SM
MD
LG