Санарип укуктарды жана байланышты көзөмөлдөөчү Netblocks уюму Иранда азыр "интернет дээрлик толугу менен өчүрүлүп жатат" деп билдирди.
Өткөн айда Иранда интернетке кирүү бир нече жумага созулган кандуу нааразылык акциялары учурунда да токтотулган. Укук коргоочулар бул кадамды өкмөткө каршы демонстрацияларды басуу учурунда Ирандын коопсуздук күчтөрү жасаган кылмыштарды жаап-жашыруу аракети деп аташкан.
Иран Катар жана Бириккен Араб Эмирликтерин бутага алып жатканы кабарланды
AFP агенттиги Катардын бийлигине шилтеме кылып Ирандан учурулган ракета өлкөнүн аба мейкиндигинен кармалганын жазды.
Бир катар дүйнөлүк маалымат агенттиктеги Бириккен Араб Эмирликтеринин аба мейкиндиги убактылуу жабылганын билдиришти.
Мунун алдында Бахрейнде жарылуулар болгону тууралуу кабарлар чыккан эле.
Израилдин премьер-министри Биньямин Нетаньяху соңку окуяларга байланыштуу элине кайрылуу жасады.
Ал Иранга каршы чогуу операция баштаганы үчүн АКШнын президенти Дональд Трампка “тарыхый лидерлиги” үчүн ыраазычылык билдирди.
“Бир нече убакыт мурда Израил менен Кошмо Штаттары Ирандагы террордук режим жараткан коркунучту болтурбоо үчүн операция баштады. Акыркы 47 жылдан бери аятолланын режими “Израилге өлүм”, “Америкага өлүм” деген чакырыктарды жасап келди. Ал биздин каныбызды төктү, көптөгөн америкалыктарды өлтүрдү, өзүнүн элин азапка салды. Бул канкор террордук режимдин өзөктүк куралга ээ болушуна, бүткүл адамзатына коркунуч жаратышына жол берилбеши керек”,-деди Нетаньяху.
Ирандагы маалымат каражаттары израил-америка соккуларынан беш шаар жабыркаганын жазышты.
Fars маалымат агенттиги жардыруулар Тегерандан сырткары Исфахан, Кум, Каража жана Керманшах шаарларында дагы угулуп жатканын билдирди.
Ошондой эле атомдук станция турган Бушер шаарына дагы чабуул жасалганы тууралуу маалыматтар чыкты, бирок азырынча расмий бышыктала элек.
Израилдин Коргоо министрли Иран дагы ракеталар менен аткылай баштаганын, абадан коргонуу системасы иштеп жатканын кабарлады.
Вашингтон Иранга каршы "ири масштабдуу аскердик операция" баштаганын АКШнын президенти Дональд Трамп 28-февралда билдирди. Бир нече саат мурда Израил Иранга "алдын алуучу сокку" урганын жарыялаган.
Дональд Трамп маалыматты өзү тастыктап, Truth социалдык түйүнүнө сегиз мүнөттүк кайрылуусун жарыялады жана АКШнын Иранга сокку урууга түздөн-түз катышы бар экенин билдирди.
"Америкалык аскерлер Иранда ири аскердик операция башташты. Биздин максатыбыз - Иран режими жаратып жаткан коркунучтарды жок кылуу менен Америка элин коргоо", - деди Трамп.
Ал тапта Израил армиясы (ЦАХАЛ) өлкө аймагында Иран тараптан учурулган ракеталар аныкталганын билдирди.
"Коргоо системалары жаралган коркунучту бөгөттөө аракетин көрүп жатышат", — деп билдиришти изарилдик аскерлер.
Израил 28-февралда Иранга каршы "алдын алуучу сокку" урганын билдирген. Өзүлөрү превентивдик деп атаган бул соккудан улам Жакынкы Чыгыштагы абал чыңалып, Тегеран менен Вашингтондун ортосундагы Ирандын ядролук программасы боюнча дипломатиялык чечимге болгон үмүт алсырады.
"Израил мамлекети Израил мамлекетине карата коркунучту жок кылуу үчүн Иранга каршы алдын алуучу сокку урду", - деген Израилдин коргоо министри Исраэл Кац.
Жарылуу болуп жатканы тууралуу алгачкы маалыматтар Тегерандын борборунан келе баштаган, социалдык медиада шаардын үстүн түтүн каптап жатканы көрсөтүлгөн сүрөттөр жана видеолор тараган.
АКШ бийлигиндеги кеминде эки жогорку даражалуу кызматкер Иранга "америкалык аскердик сокку" урулуп жатканын "Эркин Европа/Азаттык" радиосуна ырасташкан. Бир катар ирандык маалымат каражаттары Тебриз жана Тегеран шаарларында жарылуулар болгонун айтып чыгышкан.
"АКШ бүгүн эртең мененки чабуулга катышты, сокку урду", - деген АКШнын жогорку кызматтагы өкүлдөрүнүн бири. Экинчиси бул билдирүүнү тастыктаган.
"Ислам революциясынын сакчылары корпусуна" байланышы бар Fars маалымат агенттиги Данешгах (Университет) жана Жомхури (Республика) көчөлөрүнө "бир нече ракета" атылганын билдирген.
Жабыркагандар бар же жоктугу тууралуу азырынча так маалымат айтыла элек.
Бийликке жакын Tasnim маалымат агенттиги Ирандын аба мейкиндиги жабылганын билдирди.
Ирандагы соккулардан кийин Израилде сиреналар угулуп, өлкөнүн коргонуу күчтөрү тургундарга коопсуз жерлерде боло туруу керектигин эскертти.
Талдоочулар Израилдеги мындай эскертүүнү элди Ирандан жооп катары урулушу ыктымал соккуларга даярдоо чарасы деп атап жатышат.
Бүгүнкү чабуул Иран менен АКШ Тегерандын өзөктүк программасы боюнча көптөн бери созулуп келе жаткан талаш-тартышты чечүүгө багытталган сүйлөшүүлөрдүн үчүнчү айлампасы аяктагандан бир нече күн өткөндөн кийин болуп олтурат. Кезектеги сүйлөшүүлөр кийнки аптада Венада өтөрү айтылып жаткан эле.
Reuters агенттиги Израилдин Коргоо министрлигинин өкүлүнүн айтканына таянып соккулар Вашингтон менен координацияланганын билдирген.
Шерине